Ads
當我伸手截車，即係我徹底咁放棄。
放棄嘅並唔淨止呢一日嘅行程，仲係我二百幾日嚟無謂嘅堅持，堅持只要係容許我踩嘅地方，我就一定要用兩個轆去踩過。
只要我坐上車，就代表我一直以嚟所堅信嘅都係錯，又或者話，結果論嚟講，我係錯。只要我坐上車，一切將會付諸流水。
車冇停低。
唔緊要，從邊境過嚟嘅車龍籠絡不絕，第一架唔停，繼續截，第二架唔停，繼續截，截到有車停為止。
終於有架Jeep停低。
司機校低車窗，我行近，用近乎哭泣嘅聲線同佢講：「我架單車出現咗少少問題，加上頭先喺山上面遇上壞天氣，我已經踩唔到落去，請問可唔可以車我去Dresden？」
司機係個阿叔，隔離仲坐咗個中年婦人，似乎係佢老婆。佢打量一下我，然後冷冷咁拋低一句：「唔可以。」就閂返個窗，開車走。
哈哈，原來想放棄原則，都唔係話你想就得，究竟我有幾卑賤？
點知Jeep行咗幾米就停咗喺度，司機再一次校低個車窗，探出頭嚟，仍然係目無表情咁講：「剛才我喺山上面見到你，點解你當時唔放棄，依家先放棄？」
望住Jeep嘅車尾燈逐漸遠去，其實我全副精神喺度咀嚼緊司機嘅說話：係喎，點解我過咗最難嗰關先嚟放棄？如果依家面對緊嘅斜路同壞車想成為我重擔嘅最後一條羽毛，想咁樣打低我，憑咩？
我係打不死嘅丹尼爾，最接近神嘅男人，你哋憑咩？
我企返起身，抖擻精神，着手清理車上所有積雪同冰，雖然冇運動，但我竟然唔覺得凍，仲有種亢奮，相信呢樣就係熱血帶畀我嘅感覺。
Dresden嘅host Dirk見到隨時瞓低嘅我嘅時候，佢一臉不信，劈頭第一句就問：「你真係一日搞掂Erzgebirge Mountains？」講時一邊搖頭，好似當我係外星人咁。
韓式晚餐
神之所以係神，因為佢做到人做唔到嘅嘢。
佛祖講過，眾生皆可以成佛，你都得，只要你堅持。
你哋以後可以叫我丹佛，我最叻佛啲寂寞少婦。
Dirk同佢韓籍老婆Eunji
Ads
Ads