Ads
上衫點越後d人臣服佢
早雲公因為出身而被關東班友歧視。咁木下滕吉朗農民出身，最後做埋關白天下人，D大名有冇歧視佢。我淨係知佢係信長時期，D人唔係咁like佢。
早雲公因為出身而被關東班友歧視。咁木下滕吉朗農民出身，最後做埋關白天下人，D大名有冇歧視佢。我淨係知佢係信長時期，D人唔係咁like佢。 北条歧視佢:^( :^(
金閣寺 係咪應仁之亂起源地？
想問下樓主d勢力地圖係邊睇？幾正:^(
此項法令消除現存既土地借貸關係，即係將土地還予農民，減少其稅務負擔，白話講句：「欠債歸零，當打個和啦！」農民歡天喜地，債主（商人、地主）含淚撕約。
對武田家黎講，「德政令」可防止人口流失，亦開創東國大名發佈「德政令」既先河。然而，「德政令」取消債權關係，會動搖整個經濟市場，所以大名都不會濫發，否則就會好似室町末期「德政一揆」事件一樣，農民策動一揆迫大名發令，造成權利關係紛亂，債仔仲惡過債權人，嚴重影響商業經濟。德政令要詳談，可能要另開篇幅，我地暫且不說。
如圖，德政令就係取消債權，全部歸零
回到正題，在關東建立包圍網時，甲斐國亦出現一輪動亂，武田信虎參加由山內上杉家發起既「北條包圍網」後，為積極對抗北條、今川，以及將勢力伸展至信濃國，積極親近上杉家，1530年武田信虎迎娶當時既山內家督 – 山內憲房之女兒為側室，建立與山內、扇谷既關係。然而，武田信虎呢次舉動，觸怒左部份家臣，包括栗原兵庫、今井信元、飯富虎昌、大井信業等，主要以出身甲斐西部既國人為主，而且武田信虎正室就係大井家成員，外來人入殿，有可能影響甲斐本土勢力，所以呢班家臣決定再次起兵造反。
1531年1月，以上四位家臣退出甲府城，在御岳一帶起兵，南信濃大名 – 諏訪賴滿亦響應舉動，關於諏訪家，話說戰國時代開始佢地一直盤踞諏訪郡，諏訪賴滿十歲時(1483年)，父親及兄長被同族大祝諏訪氏、金刺氏、高遠氏內訌殺死，諏訪賴滿等到1518年 先有機會反擊，將金刺氏逐出諏訪郡、高遠氏兵敗投降，賴滿從此統一諏訪郡，並響1527年開始與武田信虎衝突，一度將對方擊退，此後與甲斐處於備戰狀態。
武田信虎見國人反叛，先響2月討伐大井氏，大井信業兵敗逝世。到左4月再於韮崎河原部與諏訪、今井、栗原聯軍交戰，信虎斬殺諏訪家兩名重臣、栗原兵庫以及八百士兵，飯富虎昌向信虎投降回歸，隨後武田家平定殘餘勢力，到1532年9月將今井信元收服，今井氏投誠，甲斐國叛亂就此結束。
越後國方面，1530年傀儡上杉定實從弟 – 上條定憲與越後國人 – 揚北眾共同起事，意圖反抗長尾為景，為上杉家奪回政權，不過一年後長尾家靠山 – 京都管領細川高國利用時任將軍 – 足利義晴介入，停止叛亂。
不久京都卻發生變故，昔日細川高國、細川澄元在1507年永正錯亂後對立，澄元被放逐到近江，後來其子 – 細川晴元回歸，與重臣三好元長聯手，對抗細川高國。雙方各擁立足利義晴、足利義維為將軍，從1526年至今打足五年，終於兩派在1531年6月於京都決戰，播磨大名 – 浦上村景為統一領國，亦有參與決戰，支持細川高國，然而決戰途中，一直被浦上壓制既傳統勢力 – 赤松政祐背叛浦上家，從後偷襲，令高國派大亂，最終浦上村景戰死、細川高國在攝津大物被捕殺，細川晴元奪得室町管領一職，足利義晴被放逐到近江。
然而，京都方平，又添新亂，細川晴元、三好元長因為權鬥決裂，今次晴元仲搵全日本最惡勢力 – 本願寺光頭黨介入其中，結果三好元長兵敗身亡、足利義維被放逐，細川晴元邀請足利義晴回歸，此後暫且不談。
細川晴元、細川高國爭權經過
回到正題，細川高國敗死，上條定憲再聯合揚北眾造反，包括柿崎氏、新發田氏、本庄氏、色部氏、黑川氏等頑強勢力，揚北眾係自鎌倉幕府以來，一直盤據越後既傳統土豪，擁有強烈既獨立意識，每個都係豬頭骨。除此之外，長尾分家 – 上田長尾家因不滿長尾為景壟斷大權，亦參與叛亂。眼見越後對立，鄰近大名 – 會津蘆名家、出羽砂越家亦有份插手。