真田源次郎 2017-5-22 14:51:47 返工無野做，最好就係睇下歷史
打機只係會識武田上杉個d 出名武將
原來成個關東史係咁好睇

石田佐吉三成 2017-5-22 16:44:13

返工無野做，最好就係睇下歷史
打機只係會識武田上杉個d 出名武將
原來成個關東史係咁好睇

:^(

石田佐吉三成 2017-5-22 22:25:18 首先係武田既回合，1575年5月武田勝賴自高天神城獲勝後，開始意氣風發，點知傳來奧三河豪族 - 奧平貞昌叛投德川既消息。奧平氏響兩年前西上作戰時，被山縣昌景既氣勢震攝而投敵，當信玄撤退後德川家康開始收復失地，奧平貞昌得悉武田信玄已死，京都「織田包圍網」土崩瓦解，伊勢長島遭到血腥屠殺後，就決定做「魏俊傑」了。

織田信長有濃尾平原、京都、堺港等地既經濟優勢，相對武田家地處甲信山區，即使得到駿河後，亦因為信玄只管榨取現成充當軍費，欠缺長線發展，已經令武田家經濟、民生出現問題。現時武田家兵力仍能與之分庭抗禮，但過幾年後，織田既財富將會倍級遞增，而且仲計劃向西國擴張，屆時兩者差距將會拉得更大。武田勝賴為防止與織田、德川之間出現差距，並收復失地以宣揚軍威，就決定出兵攻打長篠城。

上萬人包圍長篠城，奧平貞昌響5月14日派家臣 - 鳥居勝商求援，成功潛行到岡崎城，向已抵達當地既織田信長、德川家康匯報事件，可惜在歸途上忠勇就義，臨死前向長篠城高喊：「各位守軍，援軍將至！頂住啊！」結果長篠城從絕望中奮起，織田、德川聯軍四日後抵達設樂原，腥風血雨既長篠之戰，一觸即發。關於長篠之戰經過及分析，已在主線詳述，請參考以下網址：

https://lihkg.com/thread/21926/page/22
https://lihkg.com/thread/21926/page/23



不得不提，本多忠勝點樣「殺死」山縣昌景

武田勝賴慘敗後，未計逃兵，身邊只係剩低約三千人，狼狽歸國。好彩高坂昌信到邊境接濟，並準備新簇既盔甲為之替換，等武田勝賴輸得好睇啲。長篠之戰後，主要老臣子幾乎戰死，幾乎將武田家多年積蓄全數敗盡。高坂昌信作為上代最後一根稻草，為重振武田，就提出強化與北條關係、收編老臣派子弟做家臣團、下令陣前逃亡既穴山信君、小山田信茂、武田信豐切腹。但除左第一點外，武田勝賴都冇接納。

「穴山信君、武田信豐同我關係親近，點會輕易殺死呢？」武田勝賴大概係咁諗，並趁機身邊近臣，既然老臣派戰死，勝賴大有本錢可以改革信玄遺留既問題，高坂昌信就專注北方防務，閒時會返黎甲斐。



高坂昌信

輪到關東既回合，北條氏政控制下總國後，於6月派北條氏照進攻下野國小山秀綱，並於8月出兵房總半島，收拾關東南部最後既敵人 - 里見義弘，在上總國以有木城做據點，與當地土豪 - 土岐氏聯手攻打里見家臣 - 酒井胤治。上杉謙信同時收到小山、里見兩家既求援，但房總半島被隔絕、下野國又難入，暫時一籌莫展，不過傳出上野國人 - 由良氏四處搗亂，上杉謙信就搵呢個鄰近勢力開齋，10月響金山城、桐生城一帶掃蕩。

然而遠水不能救近火，小山、里見兩家依然告急，即使上杉謙信、佐竹義重、宇都宮廣綱聯合出兵也好，仍無助解決困局，小山秀綱被圍到12月，終於守唔住，帶住幼子投靠佐竹義重，本據祗園城被北條氏照接收，然後改建成前線據點。到左1576年初，房總方面，酒井胤治等唔到援軍，響四面坐歌下交出兒子做人質投降，上總國第一防線 - 土氣城亦落入北條家手中，北條家已在房總半島佔盡優勢。



到現時為止，北條家大致領地範圍 (見橙色)

石田佐吉三成 2017-5-22 22:27:37 呢個時候，被織田放逐既將軍 - 足利義昭流亡到西國大名 - 毛利輝元旗下，建設「鞆幕府」，想糾合周邊勢力，進行第三次「信長包圍網」，除左本願寺、毛利、雜賀眾等原班人馬，仲計劃招攬武田、上杉、北條，以至九州既大友、島津參戰，但係九州勢力無一應邀，北條亦不大有興趣，武田亦只能牽制。

上杉謙信雖然想幫忙，但越中被光頭黨阻塞，於是足利義昭就做媒人，安排本願寺顯如、上杉謙信在1576年2月議和，光頭黨接受既原因並非只是將軍既面子，實際上織田信長去年在越前、加賀屠殺光頭黨，令越中光頭黨改變戰略。而家，越中就剩低神保長城，然而想出兵越中之前，關東又告急了。

5月，上杉謙信再向由良氏落手，為攻破重鎮 - 金山城，切斷周邊地區水源，但係北條、武田攜手出擊，迫使上杉軍撤退，北條軍試圖向厩橋城反擊，但被對方抵擋。足利義昭試圖令關東三英傑和睦，但佢地係水溝油，根本不可能成事。上杉謙信眼見北條站穩陣腳，就黯然撤回越後，今次係上杉謙信最後一次去關東。

由1561年至今，已經接近十六年，最初糾合十萬關東土豪，與關東勢力建立戰略同盟，威嚇北條家以振奮軍威，上杉謙信幾乎逢戰必勝，然而贏了戰鬥，卻輸了戰略，北條家依然順利擴張，原來支持上杉既土豪亦爭相叛變。上杉謙信苦心經營關東多年，但最後連利根川都過唔到，可管治重鎮得返上野厩橋、沼田城，所謂關東爭霸，亦不過如夢幻泡影，到頭來反而係北條家笑領關東。



堅持多年，卻是夢一場。

9月，由於足利義昭多番催促，上杉謙信終於出兵越中國，冇左武田、光頭黨既阻撓，各大重鎮包括富山、守山、增山城等地被輕鬆攻破，神保氏勢力沉寂，持續十六年既越中國終於被上杉控制。此時能登大名 - 畠山家因為家督早逝，年幼既畠山春王丸繼位，但係大權被家臣 - 長續連控制。

上杉謙信認為畠山家不穩，就以捍衛能登半島安穩為名，向七尾城進攻，畠山家以長續連為首反抗，並策動當地民眾搗亂，但被上杉軍逐一鎮壓，隨後畠山軍死守天下五大山城 - 七尾城，上杉謙信攻破周邊附城，孤立畠山軍。



七尾城之戰

同時，北條大舉進攻房總半島，里見義弘自知不敵，計劃議和。黎到呢到，關東英傑們即將步入終幕，迎來各自既結局。

第三章 - 「關東三國志」篇完

次回
終章 - 「英傑落幕」
「房相一和」 - 不平等的和議
「御館之亂」揭幕 - 越後分裂

文隼 2017-5-23 02:11:21 原來仲寫緊

:^(

石田佐吉三成 2017-5-23 07:02:40

原來仲寫緊

:^(

今次冇之前咁勤力，但不知不覺都寫到黎終章了

:^(

Dom祖舜落街 2017-5-23 08:33:29 諏訪之血為武田帶黎滅亡，真係諷刺

:^(

石田佐吉三成 2017-5-23 15:44:44

諏訪之血為武田帶黎滅亡，真係諷刺

:^(

差距越黎越大了

Hog_Rider 2017-5-23 16:09:53 上杉家真係幾勁
西打下 東打下 南打下
都仲要繼續打
係越後做農民真係慘撚過食屎

:^(

飛膠鑊 2017-5-23 16:18:26 上杉真係咁有趣，打黎打去但又縮係越後；唔通真係好似茂呂美耶咁講，謙信只係外表好強但內心脆弱，要留係越後國先搵到安全感？

:^(

石田佐吉三成 2017-5-23 19:02:56

上杉真係咁有趣，打黎打去但又縮係越後；唔通真係好似茂呂美耶咁講，謙信只係外表好強但內心脆弱，要留係越後國先搵到安全感？

:^(

我冇剖析過佢既心理，但佢擴張既地方真係冇越後咁穩定，班土豪一走就反骨，係我都冇安全感

:^(

當然係 2017-5-23 19:38:55 此回覆已被刪除

飛膠鑊 2017-5-23 20:23:52

越後其實好慘 佢東南西三面戰線 佢打邊一條另外個兩條必定出事 而且佢每次冬天一定收兵 其好戰局都係

冬天就落雪點打落去

:^(

深志 2017-5-24 01:27:46

上杉真係咁有趣，打黎打去但又縮係越後；唔通真係好似茂呂美耶咁講，謙信只係外表好強但內心脆弱，要留係越後國先搵到安全感？

:^(

我冇剖析過佢既心理，但佢擴張既地方真係冇越後咁穩定，班土豪一走就反骨，係我都冇安全感

:^(

揚北眾個自主性咁強，點可能傾全國之力打場仗

:^(

萬一上杉打仗失誤推左個土豪去死，隨時搞到越後內戰

:^(

所以打仗要揸流灘咁打

:^(

石田佐吉三成 2017-5-24 20:37:39 上杉謙信響1576年11月起攻打能登半島，包圍七尾城，直到3月傳出北條出兵上野既消息，一時從七尾城撤退，並且安排屬下把守各地，結果被畠山家得以喘息，一度收復熊木、富來、穴水等三座城池。

上杉謙信返到國內後，只係安排人手留意關東局勢，休養到7月再度出兵能登半島，又將畠山家困死七尾城。響重重包圍之下，七尾城因為缺水缺糧，加上城內衛生惡劣，疫病橫行、臭氣薰天，頓時變成「阿鼻地獄」。關於1576-77年既七尾城之戰，由於我響主線已經解說過，各位可以到以下網址查閱：

第634、641貼：「上杉謙信出擊 - 七尾城之戰」

https://lihkg.com/thread/21926/page/26

就響上杉出兵北陸既時候，北條家見武藏國已經安穩，就響1577年5月先進行「檢地」，該區由北條氏邦負責，除左發展出養蠶業外，仲任用當地人，被稱為北條家既內政能手。順便介紹氏邦，響北條氏康時代，河越夜戰後為左鞏固勢力，就將兒子送去關東土豪做養子，其中北條氏邦拜藤田康邦做養父，不久就得到對方退讓家督，然而康鄉仲有兩個直系後代 - 用土重吉、藤田信吉，令北條氏邦深感威脅，後來響1578年毒殺用土重吉，藤田信吉委身旗下。

到左6月，一直親近北條家既結城晴朝竟然叛變，投靠「關東本土戰線」，呢件事其實幾莫名其妙，結城晴朝雖然早年加入關東聯盟，但隨著北條壯大，就向其靠攏，一直幫忙抗衡敵對既小山氏、佐竹氏，亦參與攻打關宿城、救援小田氏。位於前線既北條氏照立即攻打結城家，但直到8月尾都無法攻破本據 - 結城城，只係向分城落手。

北條家戰線多向齊發，7月氏政南下房總半島，攻打里見義弘，由於上總勢力大多倒戈北條，所以今次應該可以決勝負了。北條家迫近重鎮佐貫城，里見義弘眼見大勢已去，就派正木賴忠做代表，向北條議和，對方派出松田憲秀代理。雙方以小櫃川、一宮川作為交界，廢棄前線據點，並且由義弘之子 - 里見義賴迎娶北條氏政之女 - 龍壽院，建立同盟關係。

聽落去，呢個似普通對等既同盟關係，但係里見家從義堯時代起，一直銳意統一房總半島，盛世時更進入下總國，與北條在國府台決戰。但係，隨著里見義堯病逝，形勢急轉直下，而家只剩低上總國南部、安房國；兩家結為姻親，好聽係打通關係，難聽就係北條可以藉外戚身份，將來干預里見家，呢場「房相一和」實際上，係對里見家既不平等和約。



房相一和後，勢力分佈略圖

至於北關東方面，北條氏繁在7月改建飯沼城一帶，作為猛將北條綱成之子，佢致力抵擋佐竹義重、多賀谷重經既入侵。同時，小田氏治響北條既支持下，趁佐竹義重因為過份擴張，忙於應付會津蘆名盛氏時，收復手子生城及部份失地，佐竹家亦因此收緊北部戰線，返黎常陸應付呢隻小強。

石田佐吉三成 2017-5-24 20:38:00 隨著里見家倒下，北條在關東既敵人只剩低常陸佐竹家、下野宇都宮、佐野、多賀谷等勢力，北條氏政為方便戰局，就派北條氏規聯絡蘆名盛氏，計劃夾擊「關東本土戰線」。因此，佐竹義重請上杉謙信出面，當時正值1577年12月，上杉剛從北陸遠征回歸，雖然控制能登半島，並入侵加賀、越前地區，但未能與織田信長決戰。

「冇問題，下年三月我會幫忙。」上杉謙信確實計劃如此，並發出遠征命令，然而響出征前幾日，即1578年3月9日，上杉謙信因為腦溢血發作，響春日山城既廁所昏迷，四日後急逝。

最後一位第三世代人物 - 「越後之龍」上杉謙信戎馬半生，多年向信濃、關東、越中多線擴張，雖然領兵高強，但因越後地緣問題而所得甚微，倒霉係被強敵武田信玄、北條氏康聯手制肘，無法順利擴張。不過，上杉謙信對越後勢力寬容，即使北條高廣、本庄繁長叛亂，都會饒過對方；但都有喜怒無常既一面，就係殺死犯顏直諫既長尾藤景。到此，龍虎獅終於可以響三途川聚首一堂，繼續佢地既三國志。

上杉謙信死後，由於生前一直冇明示繼任人，令兩大養子 - 上杉景勝、上杉景虎兩派為爭繼承權而對立，謙信病逝未夠15日，上杉景勝先發制人，搶佔春日山城本丸、武器庫、金庫等多個重要據點，並且拎出「書狀」，高呼：「謙信有云，喜平次（景勝）為繼承人！」

「呢份書狀根本移花接木，該死既景勝！」上杉景虎直斥其非，死守三丸頑抗，並且出信俾北條、武田家求助，會津蘆名家亦睇準時機介入。

5月5日，上杉景勝攻打景虎，半個月後上杉景虎離開春日山城，死守御館並拉攏越後勢力支持。由於繼承人爭權，一直以謙信馬首是瞻既家臣、國人都要選擇立場，越後國亦逐漸步入撕裂，其他勢力正密切跟進事件。



御館之亂　兩派位置（柿崎晴家之死仍有爭議）

呢度簡述兩派勢力，支持上杉景勝既大多係上杉謙信生前既近衛、重臣、另有上田長尾家，以及部份對謙信忠誠既揚北眾；相反，支持上杉景虎既，有山內憲政、古志長尾家，部份揚北眾、越後中部地區勢力，以及外部大名如武田、北條、蘆名、伊達等勢力。

大致陣容如下：

景勝派 - 上田長尾家、一門眾上條政繁、山浦國清；重臣齋藤朝信、河田長親、直江信綱、甘粕景持、樋口兼豐、樋口兼續、安田顯元；揚北眾本庄繁長、新發田長敦、新發田重家、色部長真

景虎派 - 古志長尾家、山內憲政、重臣神余親綱、北條高廣、北條景廣、揚北眾本庄秀綱、黑川氏、鮎川氏、加地氏；北條氏政、武田勝賴、蘆名盛氏、伊達輝宗等



兩派勢力分佈，黑色為景虎、白色為景勝派



左:上杉景虎、右:上杉景勝 概念圖 (來源：大河劇《天地人》)

次回
「御館之亂」
武田、北條介入
孤注一擲 - 甲越和議
亂象落幕

石田佐吉三成 2017-5-24 20:38:33 今集稍短, 敬請見諒

:^(

石田佐吉三成 2017-5-24 23:50:07

:^(

飛膠鑊 2017-5-25 00:15:35 會唔會講下甲斐姬同妙印尼？

:^(

:^(

兩個好強既女人

:^(

btw本書就睇到石田三成個part

:^(

伊夫．聖羅蘭 2017-5-25 02:16:50 四十九年一歲夢，一期榮華一盃酒

:^(

:^(

:^(

石田佐吉三成 2017-5-25 12:12:17

會唔會講下甲斐姬同妙印尼？

:^(

:^(

兩個好強既女人

:^(

btw本書就睇到石田三成個part

:^(

由良、成田家？成田甲斐我主線忍城之戰有提過
妙印尼我只知道守金山城，但唔知實際人物特色

:^(

石田佐吉三成 2017-5-25 18:08:20

開始前，兩派勢力圖

回顧上篇景勝、景虎派陣容分佈，可以見到上杉景勝既支持者，大多集中越後東、西部地區，主要係上田長尾家、上杉謙信勢力圈，以及揚北眾據點；上杉景虎支持者集中在越後中部，包括重鎮櫪尾城、三條城等地，分佈較集中亦威脅到春日山城。

上田長尾家重鎮 – 坂戶城、樺澤城都被景虎派城池截斷，呢兩座城鄰接北條高廣、北條氏政勢力，極其危險，更不用提北信濃空虛，武田勝賴可以長驅直入春日山城。東部戰線上，本庄秀綱、神余親綱阻擋揚北眾既攻勢，與會津蘆名盛氏成夾擊之勢，由此可見上杉景虎響地緣因素上，先佔優勢。

講完分佈之後，我地繼續「御館之亂」，上杉景虎退避御館之後，聯絡北條、武田求助，就連遠處既織田信長接報後，派家臣 – 小笠原貞慶游說東北既蘆名、伊達家介入，試圖策反本庄繁長，但係對方已非昔日叛將，堅決支持景勝並與景虎派既鮎川氏交戰。

5月22日，上杉景虎試圖進攻春日山城失敗，在城下放火擾亂。各地亦開始有爭亂，景虎派北條高廣、北條景廣父子從上野殺入，響越後中部一帶游走作戰，強攻多個景勝派據點，先攻破宮野城、小川城。路已經開好，上杉景虎準備迎接親戚 – 北條氏政入黎，但卻事與願違。

呢度要插播下野國既小事，親北條勢力 – 壬生綱雄響1576年被支持宇都宮家既叔父 – 壬生周長引到鹿沼城暗殺，並攻打本據 – 壬生城，卻在交手時被綱雄長子 - 壬生義雄殺死，壬生氏統一並繼續向北條效忠。當時下野國勢力多數加入「關東本土戰線」，既然壬生氏咁唔聽話，當然要教訓佢，本屬親北條勢力既那須資胤亦順應潮流，在1578年加入聯盟。

以佐竹義重為首既「本土戰線」在1578年4月聯合宇都宮、結城、皆川、佐野等下野勢力殺向壬生城，壬生、小田氏接報便向北條氏政求救。

北條氏政、氏照主力抵達後，響5月15日先攻打結城家既山川城。「本土戰線」見北條黎到，暫時放低壬生城，結城晴朝更邀請那須資胤參戰，聯軍響5月底轉戰小川台一帶，北條軍攻破幾座小城後，亦抵達此地，兩軍隔著鬼怒川對峙，並無任何動作。



1578年 下野國勢力圖

北條氏政呢個時候先收到上杉景虎求救，但大敵當前，主力被迫滯留下野國，北條唯有請武田勝賴幫手，入去越後撐場。

武田勝賴派武田信豐率兵二萬，從北信濃殺向越後。對上杉景勝而言，武田入侵猶如惡夢，各地都無暇抽身，如果對方長驅直入春日山城，就輸梗了。

就響眾人一籌莫展之際，家臣新發田長敦獻計：「武田入侵只為響應盟友，勝賴戰略水平不下信玄，假如景虎獲勝，武田就要面臨織田、德川、北條三面包圍局面，將終日困守山地，不利擴張。應趁機向武田結盟，咁就無後顧之憂了。」

對上杉而言，武田家係世仇，與敵結盟有違家中戰略，但人係要變通既。剛好武田勝賴想調停兩派，兩家在6月於北信濃海津城會面，上杉由齋藤朝信、新發田長敦、竹俁慶綱做代表，而武田由跡部勝資、高坂昌信做代表。

上杉將北信濃地區割讓武田，並准許對方出入東上野，以換取兩國友好，和議順利完成，武田暫時停止進軍。

順帶一提，高坂昌信在協議後病逝，畢生為基友 – 武田信玄守護北方邊境，到勝賴失勢時從旁扶持，雖然對方未有遵從所有獻計，但依然對武田鞠躬盡瘁，武田四名臣最後一人，在此退出歷史舞台，與基友相會。

暫無後顧之憂既景勝，即刻響6月13日將景虎派直峰城攻破，恢復春日山城與坂戶城既聯絡，然後將古志長尾家督 – 上杉景信擊殺，兩派在越後中西部發生連串激戰，下面會簡略介紹：

中部方面，景勝派重臣 -  齋藤朝信、直江信綱既居城 - 赤田城、與板城地處越後中部，被景虎派徹底包圍，直江信綱在景勝身旁留守，居城由家臣看管，齋藤朝信單天保至尊，與附近黑瀧城既友軍聯手，死守與板、赤田、黑瀧戰線，多次力壓景虎派既進攻，「越後鍾旭」果然名不虛傳。

但係另一邊就冇咁好彩，景勝派上條政繁居城 –上條城被鄰接既北條景廣攻破，只能留守景勝身邊。



齋藤朝信

石田佐吉三成 2017-5-25 18:08:31 西部方面，不動山城既山本上杉家亦因為立場決裂，大哥山本寺定長支持景虎，但弟弟孝長支持景勝，兩家爆發內戰，最終弟弟獲勝，鞏固在越後國西部勢力，而山本寺定長自此下落不明。

武田勝賴並不想兩派繼續交戰，6月底進入越後國，與景勝派進行詳細和談，並且調停兩派議和，上杉景虎自然抗議，但而家並唔係爭戰既時候。就響呢段時間，我地可以睇睇東面戰線：

會津蘆名盛氏想漁人得利，派家臣金上盛備、小田切盛昭，攻打揚北眾既城池，先攻破安田城，但再推進時被新發田重家阻截。另外，景虎派黑川清實攻打鳥坂城，與中條氏交手，東部戰線大致如此。

整個7月，武田勝賴一直駐留越後，此時北條氏政結束小川台對陣，聽到景虎控訴後，責問武田唔進取，並計劃自己出手，兩家開始互不信任。

「叫你救人，做咩企響度掛機啊？」北條氏政怒屌

「我做野駛你教？你自己走去北關東玩，我就留響度上演爭產劇，吃力不討好，吔屎啦你！」武田勝賴反擊。

於是，武田勝賴索性改變策略，8月主動與上杉景勝結盟，並將妹妹 – 菊姬許配俾景勝，呢個破天荒既「甲越同盟」就此成立，對景勝黎講簡直係絕頂啊！



就此，甲越同盟誕生

本來武田勝賴想一直留到兩家和解，但出現變數：南邊既德川家康趁勝賴北上，9月向駿河西部進軍，武田勝賴立即返去應戰。勝賴估唔到自己一走，兩派就好似學生冇左老師監管一樣，繼續肆意開片。

睇見武田唔幫手，仲要同對家結盟，北條家索性自己出手，由北條氏邦、北條氏照親自進攻，好快就攻破重鎮樺澤城，威脅坂戶城，景勝派樋口兼豐自動請纓，堅守坂戶城，北條軍強攻到10月依然未克，此時越後進入寒冬，擔心降雪封鎖三國嶺，北條就留低北條氏邦、北條高廣在樺澤城留守，北條景廣響周邊游擊，主力撤退。

武田結盟、北條撤退、蘆名被拒，所有外部勢力都威脅唔到越後了，上杉景勝在12月迎娶菊姬之後，決心盡快收拾內亂。2月1日，景勝派家臣 – 年僅十七歲既荻田長繁趁北條景廣參拜府中八幡宮時，突襲對方將其刺殺。隨著景虎派重臣死亡，上杉景勝積極進攻，先將樺澤城收復，趕走殘留既北條軍，並響3月襲擊御館。

眼見外援遠去，國內失勢，上杉景虎自知敗象已呈，就響3月17日將山內憲政，以及兒子道滿丸帶離御館。

「景勝，念在兄弟一場，我求你放過道滿丸一命，以前義父大人好鍾意佢既，仲任命我地將來照顧佢。」

「斬草必須除根，越後上杉清流，豈容北條既血脈混雜！」景勝派將山內憲政、道滿丸截殺，前任「關東管領」山內憲政竟然如此收場，實在可惜。隨後景勝火燒御館，上杉景虎向鮫尾城逃亡，點知城主堀江宗親叛投景勝。

「我不是以上杉景虎既身份，係以北條三郎既身份死去，北條家萬歲！」前無去路，後有追兵，上杉景虎響絕望之際，切腹自殺。聞名既戰國美男子就此殞命，終年26歲。

「御館之亂」落幕，上杉景勝正式成為繼任人，景虎派遺臣 – 本庄秀綱、神余親綱據守三條城、櫪尾城，繼續負隅頑抗。其他景虎派家臣，如據守東上野既北條高廣、河田重親轉投武田家，變相令上杉失去進出關東既通道。揚北眾方面，黑川、鮎川、加地三氏回投景勝，景勝亦延續謙信方針，無嚴懲呢班政敵，然後開始掃蕩殘餘勢力。



御館之亂流程

但係，呢場內亂，卻動搖關東三英傑既關係。同時因為三家互耗，來自西邊既霸王亦逐步迫近，準備將英傑們吞噬

次回
織田、德川、北條三國聯盟
上野國變節 – 武田反噬北條
新發田重家之亂　開幕
 

石田佐吉三成 2017-5-25 18:13:59 搞乜鬼，明明隔左行，又會顯示冇隔行呢？真係唔好意思

:^(

飛膠鑊 2017-5-25 18:22:08

會唔會講下甲斐姬同妙印尼？

:^(

:^(

兩個好強既女人

:^(

btw本書就睇到石田三成個part

:^(

由良、成田家？成田甲斐我主線忍城之戰有提過
妙印尼我只知道守金山城，但唔知實際人物特色

:^(

原來提過？睇返先

:^(

好多人都話妙印尼係戰國最強老太婆

:^(

:^(

:^(

差唔多八十歲重跟前田利家同上杉景勝打後北条氏

:^(