石田佐吉三成 2017-4-26 18:30:37

八幡原之戰又係可以有好多野值得討論既一場史詩大戰，不同史料互相抵觸，場戰爭又有幾多疑點下，但又成為膾炙人口，令人津津樂道的合戰

有激戰係一定，因為文書都記載上杉政虎親自拔刀作戰。最大爭議都係上杉軍本陣、啄木鳥戰術、車懸陣

:^(

石田佐吉三成 2017-4-26 22:36:32 1561年7月，趁住上杉政虎返去越後，北條氏康開始收復失地，首先將武藏國勝沼城收復，並安排兒子北條氏照駐守，然後協助繼承國人藤田氏既兒子 – 北條氏邦復辟領地，關東土豪見勢色不對，又開始思考方向了。

同一時間，武田信玄聯絡越中光頭黨，以圖夾攻越後國，但係椎名康胤暫時擋住攻勢，武田軍在8月進軍北信濃，在海津城駐留，呢座前線基地直指越後國咽喉，對上杉家非常不利，於是上杉政虎率領13000人出兵川中島，意圖攻破海津城、阻截武田軍，今次上杉軍一反常態，直接穿過八幡原，到海津城附近布陣，而武田信玄就繞行到八幡原一帶佈陣。

兩軍第四次在川中島相會，武田、上杉認為對方應該與前三次一樣，盡量避而不戰，對峙半個月後，武田軍終於有所行動，亦為呢場川中島血戰打開序幕。響講述呢場經典大戰前，我地先講少少事，關於川中島之戰只有《甲陽軍鑑》詳細記載經過，其他文書如《上杉年譜》、《勝山記》，以及上杉給近衛前久既文書中，都詳述，但肯定既係上杉政虎曾經拔刀作戰，並且發生過激戰。因此，響既有文書限制下，我地就以《甲陽軍鑑》為藍本，加入其他分析講述呢場戰爭。



川中島之戰 《甲陽軍鑑》通說流程

8月15日，上杉政虎安排後勤在善光寺待命，再率領大軍越過犀川、千曲川，經八幡原抵達海津城西部既妻女山，設置本陣，家臣柿崎景家、直江景綱進諫作戰冒險，希望政虎重新考慮，但妻女山北部有幾座武田軍支城，點解上杉會無視支城，直入妻女山呢？所以有一個新講法指，上杉軍並非進入妻女山，而係從善光寺向西南進軍，在「西條山」佈陣。

而武田信玄就向西北進軍，越過八幡原，在千曲川西岸 - 鹽崎城佈陣，監察上杉軍動向，希望可以迴避激戰。到現時為止，武田、上杉依然像前三次一樣避戰。然而，到左9月9日出現變數，整個川中島地區都被濃霧覆蓋，彼此看不見對方，而《甲陽軍鑑》記載武田家臣 – 山本勘助提出建議：

「我軍分隊從海津城出發，乘夜及濃霧掩護，從背後襲擊上杉軍本陣。主公就響八幡原守株待兔，到時我地前後夾攻，上杉政虎必定命喪川中島！呢個係我既『啄木鳥戰法』！」

9月10日凌晨，由高坂昌信、馬場信房、真田幸隆率領既分隊從海津城出發，為數一萬二千人，而武田信玄率領八千人，帶領武田信繁、諸角虎定、武田義信等人在八幡原戒備，順便向善光寺一帶進攻，意圖截斷對方後路。武田分隊順利潛行到西條山一帶，但令人嗟異既係上杉本陣空無一人。

天色漸明，戰場濃霧密佈，八幡原既武田軍不知對方動向，突然西邊戰線傳出一陣騷動，士兵大喊：「上杉軍突襲！報告，上杉軍在八幡原出現，我軍西翼部隊陷入崩潰！！！」戰報一出，武田信玄大吃一驚，估唔到上杉政虎反而乘住濃霧向自己反撲，呢個係《甲陽軍鑑》既記載，其實上杉政虎洞悉到武田軍會趁濃霧出擊，於是先下手為強，但係無法睇見對方既情況下，兩軍竟然不期而遇。

於是，上杉政虎下令騎兵隊拋棄步兵，先向武田軍強攻，步弓兵隊從後趕上，盡快佔據有利位置，響武田軍既角度，就以為上杉軍層層進迫，以排山倒海既氣勢殺過黎，嚇到陣腳大亂，因為上杉軍既「層層疊」攻勢，令武田軍以為對方正佈署如車輪一樣，猛力輾壓敵軍既「車懸之陣」，真係天大既誤會，上杉軍只係用長蛇陣進軍，突然變陣攻擊，所謂車懸陣既說法，筆者認為站不住腳。

武田義信因為魯莽反擊，反被圍在陣中，武田信繁為左拯救姪子，冒死向上杉軍突擊，但卻遭遇對方猛將 – 柿崎景家既騎兵隊，武田信繁在混戰中陣亡，其他重臣如諸角虎定、山本勘助相繼戰死，上杉軍乘勝殺向武田本陣，通說此時上杉政虎、武田信玄發生知名既單挑事件，但呢個只係後世創作，實際上武田信玄響本陣前佈置多重防線，上杉軍無法突破。



聞名既單挑，純屬後世炒作

石田佐吉三成 2017-4-26 22:36:44 不知不覺殺到早上約9時左右，武田分隊終於抵達戰場，與殿後既甘粕景持、村上義清激戰，即使「鬥將」村上義清幾咁勇猛都好，人數上完全不及武田，結果後軍潰散，武田分隊乘勢背刺上杉，上杉政虎收到消息後，立即向善光寺方向轉進，再撤退返去越後國，武田信玄並冇追擊。呢場血戰起因係受濃霧影響，完全出乎意料之外，《甲陽軍鑑》記載上杉死三千、武田死四千，死亡率大概係25%左右，與戰國時代各大戰役相比，堪稱為最高死亡率既戰事之一。



武田信繁

最終呢場川中島之戰，兩軍損耗不少，武田信玄損失多名重臣，最傷痛係損失被稱為「文武兼備」既弟弟 – 武田信繁，幸好上杉政虎一時無力出兵北信濃，變相加強武田對當地既控制力，所以通說武田信玄輸左戰術，贏左戰略。

接下來探討有關「山本勘助」既問題，響1969年由居民 - 市河家遺留既書信物中，發現一個署名「山本菅助」既書信，並且得到武田信玄花押，推斷呢位人兄係武田家臣，亦可能係傳說中既「山本勘助」，後來郡馬縣收藏呢批書信研究，並在2007年發現「山本菅助」有出家，法號如勘助一樣，被稱為「道鬼」，所以得出山本勘助此人確實存在，但其事蹟依然不明朗。



有關「山本菅助」既書信

9月，北條氏康進攻松山城，太田資正向上杉家求救，迫使上杉政虎在11月再度出兵關東，並號召關東土豪支援，但係成田長泰不滿上杉政虎，帶頭支持北條家，令一班土豪包括佐野氏、小田氏等跟風，令上杉動員人數劇減至兩萬人。

同時，西上野大名 – 長野業正在6月病逝，武田信玄見猛將身亡，開始染指西上野地區，在11月正式開始西上野侵略作戰，響戰略上既可支援北條，又可以牽制上杉，擴大控制範圍，係一石二鳥既進軍。武田軍先收復國人 – 高田氏，然後殺向國峰城，幫小幡憲重復辟，同時真田幸隆接觸當地豪族鐮原氏、海野氏，試圖爭取更多支持。

12月，上杉政虎獲足利義輝賜名，自此改名「上杉輝虎」，越後之龍取左新名字，是否會為自己帶來新氣象呢？我地下回拭目以待。



西上野地區　據點圖

次回
西三河起義 – 松平元康獨立
腹背受敵 – 難走的上杉家

伊夫．聖羅蘭 2017-4-27 01:50:25 我都係第一次聽條西條山佈陣呢觀點，同埋座山大既係川中島咩位

:^(

石田佐吉三成 2017-4-27 08:45:31

我都係第一次聽條西條山佈陣呢觀點，同埋座山大既係川中島咩位

:^(

呢個未算定論，所以有以下觀點
1 西條山其實係妻女山同音異字
2 位於淺川西岸，即係善光寺西南，茶臼山一帶
3 位於若槻山城既「西條山」

然而，第一點已經被日本人分析過，指西條、妻女二字既日語音不同，好難成為理據。第二點淺川既「西條」亦同理，片假字不同，令呢兩個講法成疑

第三點，若槻山城響邊度？
都係位於淺川西岸一帶，只係上杉政虎要進入，必須穿過八幡原南部既支城地帶，就算入到，補給線都會因此截斷。所以點解上杉入到？有可能係支城未發揮作用，畢竟海津城響1560年先完成；另一個講法係有人做內應。

不過最大疑點，都係若槻山城離川中島戰場太遠（東、西岸相隔），理據亦未夠嚴謹，所以依然有好多未解既原因

因此我先響正文用返「妻女山」

熊本熊熊熊熊 2017-4-27 12:57:26 我岩岩查左google..

西條山其實即係妻女山...

熊本熊熊熊熊 2017-4-27 13:17:30












其實當時有兩條路可以去到八幡原...

一條係經飯山城 , 另一條就係經若槻山城下...

若果謙信其實係經飯山城到八幡原既...

咁就可以解釋到點解若槻山城果幾個支城發揮唔到作用..

石田佐吉三成 2017-4-27 13:58:27

:^(

:^(

:^(

其實當時有兩條路可以去到八幡原...

一條係經飯山城 , 另一條就係經若槻山城下...

若果謙信其實係經飯山城到八幡原既...

咁就可以解釋到點解若槻山城果幾個支城發揮唔到作用..

確實有呢個觀點，但我好奇上杉點會深入腹地，終究西邊鹽崎城、八幡原南部都係武田控制範圍，後援留守善光寺，好難去接應，除非佢心急想攻陷海津城，但到左妻女山佢只係對峙監視，由得武田佈好陣型，真係好莫名其妙

熊本熊熊熊熊 2017-4-27 14:25:08

:^(

:^(

:^(

其實當時有兩條路可以去到八幡原...

一條係經飯山城 , 另一條就係經若槻山城下...

若果謙信其實係經飯山城到八幡原既...

咁就可以解釋到點解若槻山城果幾個支城發揮唔到作用..

確實有呢個觀點，但我好奇上杉點會深入腹地，終究西邊鹽崎城、八幡原南部都係武田控制範圍，後援留守善光寺，好難去接應，除非佢心急想攻陷海津城，但到左妻女山佢只係對峙監視，由得武田佈好陣型，真係好莫名其妙

其實呢個問題唔難解釋...


地方土豪望族就係牆頭草 , 風吹去邊就擺去邊...

今日我插住武田家既旗 , 聽日我就可以換插上杉家...

八幡原北部果幾個支城看風駛裡同謙信互通有無既機會好大...

所以謙信直插八幡原其實唔奇怪...


而至於八幡原合戰既問題...

武田家唔洗諗 , 一定係想打野戰架啦...

至於上杉方面應該係硬掘同武田家打野戰...

所以先會係妻女山附近擺陣...

香港職人 2017-4-27 20:13:46 留名

伊夫．聖羅蘭 2017-4-27 21:15:26 但係有講法話妻女山冇可能佈到陣。妻女山在山下有海津
城與附屬支城大堀館、広田砦、横田城所構成的防禦地
帶，妻女山後面又有鞍骨城 、天城城。先唔講點解謙信可
以無視呢D城，去上山佈陣。日本學家近年考察發現妻女地形係容許唔到佈陣，山的後方崎嶇不平，山脊是只容1人通過非常窄的山道，而且兩側都是陡峭的懸崖。大佬，就算軍神都冇可能佈到陣，仲有一點係，後方條路咁窄，武田別働隊又點從後突撃謙信公。網上的圖片

熊本熊熊熊熊 2017-4-27 21:22:53

但係有講法話妻女山冇可能佈到陣。妻女山在山下有海津
城與附屬支城大堀館、広田砦、横田城所構成的防禦地
帶，妻女山後面又有鞍骨城 、天城城。先唔講點解謙信可
以無視呢D城，去上山佈陣。日本學家近年考察發現妻女地形係容許唔到佈陣，山的後方崎嶇不平，山脊是只容1人通過非常窄的山道，而且兩側都是陡峭的懸崖。大佬，就算軍神都冇可能佈到陣，仲有一點係，後方條路咁窄，武田別働隊又點從後突撃謙信公。

:^(

網上的圖片

個陣可能係佈係山腳.. ha..

石田佐吉三成 2017-4-27 21:33:37 我地暫時睇返今川家局勢，本來呢段應該係「三英傑歷史」，但因為德川家康早期與今川家有較多交集，所以亦會加入介紹，等大家認識德川家在桶狹間至武田西上作戰期間既事蹟。

且說1560年今川義元死後，今川家內部開始不穩，但好彩有義元老母 - 「女大名」壽桂尼力壓群臣，令駿府國維持穩定，但係三河、遠江開始有叛亂之心，首先松平元康將岡崎城代官驅逐，開始重整勢力，調略東、西三河國一眾勢力，並整合松平分家、本多、大久保等在地勢力，盤踞西三河西北部，與南部既豪族 - 吉良義昭、今川家臣 - 鵜殿長持對立。



三河國勢力圖 (雖為1530年，但整體相去不遠)

東三河豪族如牧野氏、戶田氏等在桶狹間之戰後，亦心懷鬼胎以求獨立，於是今川氏真命令呢班國人交出親屬，在家臣 - 小野鎮實既吉田城做人質，但係家臣菅沼定盈宣佈脫離今川，以野田城為根據地，與兄弟 - 西鄉氏一齊投靠松平家，國人 - 牧野貞成亦受到松平家臣 - 本多信俊調略，投靠松平元康。

今川氏真憤怒了，就響1561年7月命令小野鎮實攻打野田城，菅沼定盈開城投降，逃亡到西鄉氏，以圖東山再起。同時，又命令將三河人質共十幾人押到龍拈寺，除左東三河豪族 - 戶田重貞成功拯救老母外，其餘人質被悉數處決，本以為殺一儆百，卻產生反效果，基本上除左牧野氏外，大部份東三河勢力都背叛今川家。

尾張快報：「織田信長正式進攻美濃國，響十四條地區初戰得勝，將墨俁城一帶收為己有。」

9月，松平元康派本多廣孝、松井忠次進攻西三河南部，以圖攻破吉良氏據地 - 東條城，但呢座城冇咁易攻陷，松平軍幾個月前亦響善明寺一帶失利，所以今次松平軍非勝不可，兩軍在藤波畷交戰，吉良氏重臣 - 富永忠元與本多廣孝正面衝突，松井忠次見到吉良軍過度突出，從後偷襲得手，富永忠元力戰身亡，松平軍繼續向東條城推進，吉良義昭喪失戰意投降。

1562年1月，發生左一件轟動日本歷史既會面，松平元康、織田信長兩名時代新秀在清洲城會面，兩家約定織田往西、松平往東發展，兩家一齊平分天下，呢場會面被稱為「清洲同盟」，今川氏真收到消息，怒殺元康岳父 - 家臣關口親永。

3月，松平元康攻陷上鄉城，擊殺鵜殿長持、鵜殿長照父子，並提出將鵜殿家遺子 - 氏長、氏次交換身在今川家既人質 - 瀨名姬、子女 - 松平信康與龜姬，由於鵜殿家為今川家忠義殉國，而且鵜殿、今川兩家為姻親，所以今川氏真答應要求，人質交換順利結束，但係瀨名姬因為父親被松平元康累死，自此夫妻稍有隔閡，埋下將來家庭慘劇既種子。

輪到關東既回合，上杉輝虎響關東過冬後，3月攻打下野國重鎮 - 唐澤山城，城主佐野昌綱去年有參與小田原城之戰，但上杉撤離後被北條家反打，孤立無援下向北條投降，後來即使上杉回歸，佐野昌綱都冇投降既打算。唐澤山城被稱為「關東七大名城」，係出名易守難攻既堅固山城，上杉輝虎打左一段時間毫無斬獲，又聽到越中國告急，敗興而回。



唐澤山城　概念圖

到左4月，北條家兵分兩路，一邊圍攻松山城，一邊收復房總半島失地，首先將去年失陷既重鎮 - 下總國葛山城收復，國人高城胤吉歸順，足利義氏回歸當地，當地大名以小田氏治為首，帶領那須資胤、結城晴朝轉投北條家，小田氏治為向常陸國擴張，與佐竹家為敵，關東邊緣既紛爭亦揭開序幕。

「京都快報！三好長慶從弟 - 十河一存去年急病逝世後，前紀伊守護 - 畠山高政、近江大名六角義賢聯手，在5月於和泉國 - 久米田一帶擊敗三好軍，長慶另一個弟弟 - 三好實休戰死！然而，響三好義興、松永久秀奮戰下，聯軍無法進入京都，畠山高政在教興寺戰敗被放逐，六角、三好兩家在6月議和，京都紛爭暫時結束。」

回到三河方面，6月時，自去年潛伏既菅沼定盈夜襲野田城，擊殺守將 - 稻垣氏俊並開始修復城池，西三河國暫時無更進一步既發展了。

石田佐吉三成 2017-4-27 21:33:48 7月，由於國人相繼背叛，今川氏真失去耐性，近臣小野道好既家族一向與井伊家不和，又計劃奪取井伊谷，便誣衊井伊直親意圖謀反，井伊直親前往解釋，但今川氏真當時怒上心頭，直接派朝比奈泰朝到掛川城伏殺直親，小野道好本想斬草除根，誅殺直親遺子 - 虎松，好彩另一位家臣 - 新野親矩保住井伊家，虎松就由在桶狹間戰死既井伊直盛之女、曾經與井伊直親有婚約既女中豪傑 - 井伊次郎法師收養，佢係邊個？

「既然我嫁唔到畀你，咁我就收養你個仔，就當係我同你既兒子啦。」仲未知？人地做過主角架，冇錯了...佢就係後來聞名既女城主 - 井伊直虎。(不過，去年有史料發掘，懷疑井伊直虎其實係男人，但尚待考證)



傳說的女城主 - 井伊直虎

1562年7月神保長職、光頭黨再度響越中搗亂，將椎名康胤壓制，上杉輝虎唯有再次出擊，擊退神保家後返國。點知，9月神保家強勢回歸，仲聯合光頭黨出擊，在神通川擊敗椎名軍，更大舉包圍松倉城，上杉輝虎真係頂唔順呢個豬隊友，又率兵救援，面對毘沙門天大軍，神保長職贏既機會等於零啊！仲將對方反壓至本據地。10月，神保長職認輸，能登守護 - 畠山義綱出門調停，保住神保家一命，但椎名康胤感到不滿，上杉輝虎唯有讓親戚 - 長尾景直拜椎名家做養父，加強兩家關係。

點知，北條氏康趁上杉輝虎遠去，向武田信玄借兵，12月包圍武藏國松山城，上杉輝虎剛從越中回來，又要繼續東奔西走，連休息既時間都冇！上杉抵達沼田城後亦進入嚴冬，關東地區一時休戰。到左1563年2月初，上杉輝虎立即前往武藏國，但一切為時已晚，松山城被聯軍攻破。

於是，上杉輝虎唯有轉移陣線，偽裝進攻北條家，令對方進入守勢，再趁機收拾其他叛投北條既關東土豪，首先在2月中旬擊破小田朝興，然後進攻忍城，迫降成田長泰。4月上杉軍轉戰下野國，佐野昌綱因為關東土豪相繼降伏，亦跟隨眾人腳步投降，上杉軍繼續向南出發，下總國小山秀綱亦望風歸降。

雖然上杉輝虎救唔到松山城，但成功將關東土豪再度收服，算係有少少收穫，安排北條高廣在厩橋城留守後，上杉輝虎滿意歸國。雖然如此，但關東土豪一向係牆頭草，上杉輝虎黎左關東四次，卻不見增加控制範圍，相反武田、北條聯手響越中、西上野、北信濃及關東四面夾擊，反而令上杉家應接不暇，陷入腹背受敵既困境。



1563年 上杉輝虎進軍路線 構想圖

次回
第二次國府台之戰
三河一揆 - 三河一向宗禁絕
西上野、飛驒攻擊

熊本熊熊熊熊 2017-4-27 23:32:38 所以我成日都話...

今川義元橫死係同德川家康有關係...

Dom祖舜落街 2017-4-28 00:03:43 如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

熊本熊熊熊熊 2017-4-28 00:36:33

如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

野史裡面有段野係咁既...


川中島大戰之後 , 織田信長就係笑淫淫咁同家臣講..


" 上杉 , 武田 , 佢地註定只係鄉下大名 , 而我將會席捲天下... "


呢句說話有兩個含意

1. 佢兩個既實力差唔多 , 命中註定互相牽制..

2. 甲信同越後距離京都太遠...

九奇 2017-4-28 01:20:12 lm

石田佐吉三成 2017-4-28 08:51:19

如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

野史裡面有段野係咁既...


川中島大戰之後 , 織田信長就係笑淫淫咁同家臣講..


" 上杉 , 武田 , 佢地註定只係鄉下大名 , 而我將會席捲天下... "


呢句說話有兩個含意

1. 佢兩個既實力差唔多 , 命中註定互相牽制..

2. 甲信同越後距離京都太遠...

真係地緣注定北條、武田、上杉力戰到底，信長有濃尾平原已贏地利

:^(

石田佐吉三成 2017-4-28 08:52:06

如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

你打一邊，另外兩邊立即搞事，都好難收拾妥當

:^(

吾是痴線佬 2017-4-28 13:16:39

如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

你打一邊，另外兩邊立即搞事，都好難收拾妥當

:^(

所以我話上衫係戰略，外交失敗造成關東三家攬炒

係呀你戰場上戰無不勝，所以有乜事第一時間就拳頭解決，又中意威人地叫就去插下手，周圍撩事鬥非。 仇家多朋友少。 打人又唔夠狠斬草除根
自己個領地本身狹長，唔適合兩邊兼顧。
結果就係面面都唔討好，一邊做到野，另一邊就俾第二個搞，又抽身去另一邊，個人一走班仆街又反，變左最初成果冇晒。 大半生東奔西跑俾人撚狗咁撚

:^(

吾是痴線佬 2017-4-28 13:18:45

如果上杉打得贏小田原，就一統天下，可惜。。。
上杉每次出兵都唔可以斬草除根，神保光頭平唔到，武田主力滅唔到，北條滅唔到
其實都係差個有力隊友

:^(

你打一邊，另外兩邊立即搞事，都好難收拾妥當

:^(

所以我話上衫係戰略，外交失敗造成關東三家攬炒

係呀你戰場上戰無不勝，所以有乜事第一時間就拳頭解決，又中意威人地叫就去插下手，周圍撩事鬥非。 仇家多朋友少。 打人又唔夠狠斬草除根
自己個領地本身狹長，唔適合兩邊兼顧。
結果就係面面都唔討好，一邊做到野，另一邊就俾第二個搞，又抽身去另一邊，個人一走班仆街又反，變左最初成果冇晒。 大半生東奔西跑俾人撚狗咁撚

:^(

打漏左重點

:^(

相比三國同盟，清洲同盟果份高瞻遠矚，上衫就係一個名副其實淨係識打爛仔交嘅鄉下佬，抵佢冇做天下人嘅命

:^(

熊本熊熊熊熊 2017-4-28 13:34:40 以北條 , 上杉 , 武田呢三家黎講..

最有機會做霸主既就係北條..

北條家隔離就係千業 , 佐竹 , 里見呢三家規模比較大..

但講真其實佢地都係渣渣...

可惜北條氏康晚年只係安於現狀, 維持自己果一畝三分地 , 錯過左發展既機會...



上杉家雖然係越後霸主 , 上杉謙信亦都有做霸王既潛質 , 但可惜係越中 , 關東 , 甲信耽誤得太耐 , 就算比佢死磨爛磨磨到連北條氏康同武田信玄都相繼瓜柴 , 自己亦都唔擺得幾耐...


若果上杉謙信一早向越中 , 能登又或者東北發展既話 , 相信又會係另一番光景...



武田家就係呢三家裡面最苦逼果個...

甲信本身係山區 , 窮就已經係緊局 , 好在仲有個馬場頂住頂住...

東有北條 , 北有上杉 , 南有今川 , 西有腹蛇 , 西北最大獲 , 係比甲信更加山區既飛驒......................

今川死後想向南發展 ? 北面既上杉同東面既北條又昅住你...

想向北面發展咩 ? 上杉又死死咁頂住你...

想向東面發展咩 ? 北條頂住你 , 上杉又昅住你...

想向西發展咩 ? 腹蛇瓜左之後又有信長頂住你...


好啦 , 望川秋水都等到甲相越同盟 , 信玄食左今川之後終於可以安安定定咁由東海道進軍既時候 , 德川同織田夾埋一齊頂住你 , 最後就連上天都頂埋一份....



後世講到呢三位幾咁雄才大略 , 上杉謙信仲被稱之為軍神...

講真 , 呢壇水真係吹得太大.....

金庸財盡 2017-4-28 13:42:13 德川面對既仲難攪
今川氣數已盡 過左今川m
要面對武田
過左武田仲有北條

熊本熊熊熊熊 2017-4-28 13:54:39

德川面對既仲難攪
今川氣數已盡 過左今川m
要面對武田
過左武田仲有北條

講地理環境同大圍戰略黎講..

老烏龜的確係最差..

但係老烏龜好命 , 條命夠長 , 又夠忍得...

忍到北條氏康瓜左 , 上杉謙信瓜左 , 武田信玄瓜左 , 織田信長瓜左 , 就連老猴子都香埋既時候就得返佢一家獨大............



所以話 , 條命生得唔夠好唔緊要 , 最緊要係條命夠硬同夠長.......