［日本戰國史］關東英傑傳

石田佐吉三成 2017-4-7 22:12:02 砥石城係一座依山興建既險要之城，連接枡形城、米山城兩座外城，本來係真田家既重鎮，但1541年村上義清接手之後大幅改建，提昇為錯綜複雜既堅城。當時砥石城只有五百守軍，武田晴信想先招降村上旗下既國人做內應，但一個月後杳無音訊。因此，武田軍在9月9日發動總攻擊，由重臣橫田高松攀崖登城，但村上義清早有準備，向山下投擲巨石，又倒熱鍋水煮沸武田軍，武田軍登城失敗。

:^(

砥石城之戰武田軍佈陣圖

:^(

砥石城構想圖，與各城相連，易守難攻

9月13日，一直與村上義清對抗既高梨政賴，竟然協助村上軍，毫無後顧之憂既村上義清士氣高漲，，武田軍打到10月1日都未有結果，開始撤退，村上義清再次睇準時機，調派兩千士兵從葛尾城出擊，準備前後夾擊，再鼓舞士氣大叫：「武田撤退了，而家係反擊既狼煙了！」

砥石城大開城門，村上義清再以鬼神般既氣勢突擊，圍城多時既武田軍早已失去戰意，再面對前後夾擊，頃刻陣腳大亂，村上義清既表現與上次一樣，奮身追殺武田晴信，武田重臣橫田高松在混戰中戰死，另一個重臣 - 小山田信有身負重傷，幸好被家臣救出脫險。

村上義清就好似癲狗一樣追擊，呢個時候武田軍已戰死過千人，至少損失七分之一既戰力，武田晴信想起上原城敗仗，道：「唔通我就此玩完？」近臣小尾豐信向晴信提議：「主公，唔好喪失希望，將你既頭盔交俾我！」

於是，武田晴信與部下交換頭盔，村上義清終於追上，大喊：「哈哈哈！！！我黎收人頭了！」手起刀落，將「武田晴信」既首級斬落，揚長而去，村上義清細心觀察，怒斥一聲：「屌！這是替身攻擊！」

武田晴信呢場復仇戰，損失重臣，小山田信有更因為呢次重創，在兩年後傷重逝世，本來乘住氣勢進攻，但因為錯失時機，被村上軍有機可乘，反而招來大敗，村上義清更不忘嘲笑道：「武田妙計平信濃，賠了家臣又折兵。」

:^(

武田重臣 - 橫田高松

輪到越後國既回合，長尾景虎得到足利義輝承認，支持景虎既古志長尾家 - 長尾景信地位日增，而昔日隸屬晴景派既上田長尾家不滿發言權大減，所以家督長尾政景於1550年12月發動叛亂，死守坂戶城，意圖聯絡會津蘆名家夾擊景虎。

不過，長尾景虎反應迅速，1月就發動攻擊，攻破長尾政景既附屬城池，再計劃響8月對坂戶城總攻擊，長尾政景自知不敵，響老婆仙桃院既求情之下，長尾景虎放過政景一馬，最終長尾政景投降，長尾景虎以22歲之齡統一越後國。

返到1551年初，尾張大名織田信秀在3月病逝，由被稱為「尾張大傻瓜」既織田信長繼任家督，然而家老柴田勝家、林秀貞、林通具，以及信長從弟 - 織田信行不滿，自成一派，尾張各地勢力亦因為信秀既死，而開始分裂，尾張國正陷入暗雲之中。

:^(

尾張的大傻瓜

武田晴信心煩意亂之際，真田幸隆自動請纓道：「主公，奪取砥石城，唔駛用劍既，用離間計就得喇。」武田晴信想問詳情時，真田幸隆留低一句：「下回分解。」

次回
全面擴張 - 北條進軍上野國
里見義堯奪取上總國
北信濃失陷 - 村上義清敗走越後國
龍虎初遇 - 第一次川中島之戰

石田佐吉三成 2017-4-7 22:13:12 本回結束後，我地既京都快報員在尾張開設分行，以後除左京都快報，仲會間中帶來「尾張快報」

:^(

石田佐吉三成 2017-4-7 22:17:32

:^(

，有咩事去公立醫院真係小心，我有親入入EU拖足幾日冇人理，而家轉左私院爽手排到期解決，以後寧願俾貴少少都唔想拖住診

:^(

石田佐吉三成 2017-4-8 15:14:43

你指邊方面？

石田佐吉三成 2017-4-8 15:15:12

《風林火山》應該幾適合

:^(

我老婆係加賀 2017-4-8 15:18:25 LM

廿八左大媽 2017-4-8 16:35:02 此回覆已被刪除

龍圖閣直學士 2017-4-9 05:16:23

簡單講係兩大武家嘅對決

:^(

主要因為源氏不滿地位比平家低，所以發生叛亂，當時平家成功打敗左源氏，但係無趕盡殺絕，最後皇族同公家不滿平家權勢滔天，頒發討平令，源賴朝及全國源氏勢力起兵報仇兼打贏埋，開創武家統治嘅幕府時代。

源平血統源於皇族，臣藉降下所創生，所以比較顯貴。當中清和源氏最出名，因為好多日本出名嘅武家都係清和源氏一系，例如甲斐武田氏

:^(

石田佐吉三成 2017-4-9 09:22:47

室町幕府既足利氏，都係清和源氏後裔

補充一點，點解關東武士、名門咁重視源氏、正宗北條氏，係因為佢地自鎌倉幕府起已經侍奉上述兩家，所以當伊勢氏（後北條氏）出現，關東武士就好似本土派見到蝗入侵既反應，群起圍攻。

一黎佢係外來者，二黎佢自稱北條家

龍圖閣直學士 2017-4-9 19:58:10

其實日本人對血統個種執著真係好犀利,就算自己勢力幾龐大,都要同所謂嘅公家,甚至皇族攀關係

:^(

哈爾希洛 2017-4-9 20:03:26 留名

:^(

伊勢新九郎盛時 2017-4-9 20:27:31

清和源氏係大支黎啫
出名既其實係其中既分支河內源氏
八幡太郎源義家（佢兄弟甲斐武田氏之祖新羅三郎義光）
源賴朝義經兄弟
呢一脈就係河內源氏滴流但源賴朝之後無耐就斷左
點解足利氏地位咁高首先係因為最接近河內源氏滴流既就係數到佢同新田氏
呢一流之後受幕府北條氏厚待唔多唔少都關血統事
（另一支新田氏地位就冇咁高所以新田義貞倒幕同入官軍其實都可以話係私怨）
另外一提既係德川家康同源氏扯上關係就係靠自稱係新田氏一流世良田氏既後代

:^(

張開西望 2017-4-10 11:19:40

倒左個北條, 又黎翻個足利

:^(

楠木BB死得好悲壯呀

:^(

石田佐吉三成 2017-4-10 17:46:05

要怪就怪新田義貞呢個豬隊友，手下有楠木正成、北畠顯家都運用不當

石田佐吉三成 2017-4-10 23:09:33 1551年5月，真田幸隆向武田晴信獻計：「我既弟弟 - 矢澤總重(矢澤賴綱)雖然投身村上家，把守砥石城，但與同城將領 - 山田國政及吾妻清綱因封賞不均而有隔閡。只要我稍作離間，令村上義清對我弟弟起疑心，我就有辦法說服弟弟做內應了。」

武田晴信同意方案，就將進攻重任交俾真田幸隆，真田幸隆先派人與矢澤總重聯絡，令村上義清起疑心，有除去對方打算，但因為矢澤總重係佐久、小縣郡土豪，砥石城又係當地重鎮，得罪當地人並無好處，所以派山田國政、吾妻清綱監視矢澤。矢澤總重當然不會坐以待斃，於是在5月26日聯絡真田幸隆：「我今晚將會率領三百人出擊，收拾村上軍！」

真田幸隆把握機會，當晚潛行到砥石城一帶，憑弟弟、佐久郡及小縣郡國人內應協助下殺入砥石城，村上軍本以為係城內騷亂，但見到武田軍大舉入侵，自知今次完蛋了，村上家臣山田國政、吾妻清綱相繼戰死，真田幸隆略施小計，僅用一日時間就攻陷令武田慘敗既砥石城。當呢座堅城失陷之後，武田晴信開始反攻，準備平定小縣郡，繼續向北信濃推進，真田幸隆因為呢次大功，獲恢復在小縣郡既舊地。

:^(

真田幸隆

終於輪到關東既回合了！北條氏康休養生息至少五年，期間重新整合稅制，安定內部，又將扇谷家臣 - 太田資正收服，關東土豪包括成田氏、三田氏，以及武藏、上野國不少國人都望風投靠。既然一切安定，北條氏康決定打倒山內上杉家，以控制關東平原。1551年11月，北條氏康攻打山內家居城 - 平井城，但因為山內憲政頑抗，便同時進攻附城 - 御嶽城，1552年3月北條氏康攻陷御嶽城，部份上野國人，甚至連山內憲政的近臣都意圖反叛。大勢已去，山內憲政放棄平井城，輾轉逃亡，此時佢只想起一個人：「越後大名 - 長尾景虎。」

山內憲政逃亡到越後國，獲得長尾景虎優待，呢個落難既關東管領重新感受尊重，痛哭流涕向景虎請求：「拜託你，幫手復辟關東地區，景虎，我而家就只有你了。」

不理山內憲政有幾肉麻，對長尾景虎黎講，越後國每逢冬季就暴雪紛飛，幾乎無事可做，相對而言關東平原資源富饒，氣候較為溫暖，而且係傳統武家發源地，如果控制關東，就擁有在東部廣大既號召力，所以長尾景虎立即首肯，7月就即刻號召家臣、揚北眾殺向上野國，攻打沼田城，又收復平井城、金山城等地。

長尾景虎反應迅速，可以話係預料之外，呢班北國武士剛毅勇猛，唔駛一個月就從越後殺入武藏國，北條家亦將防線退後至此。形勢大變，見風使舵既關東土豪又立即投靠長尾景虎，之後長尾軍一直逗留上野國，北條氏康亦小心防範，雙方並無太大衝突。呢個時候，房總半島傳來另一單消息。

:^(

但在此之前，京都快報來了，我地睇左先：「在外流亡既足利義輝與三好長慶議和，回歸京都，但係權力依然響三好長慶身上，將軍如同光棍司令，到底足利義輝又會否甘願就此屈服？我地再慢慢觀察。」

哎呀，尾張快報亦有消息了：「尾張既清洲織田家 - 織田信友及家臣坂井大膳攻打織田信長，旗下既松葉城、深田城望風而降！織田信長於8月正兵反擊，響猛將柴田勝家既奮戰下，在萱津一帶擊敗清洲織田家，至少戰死五十人，織田信長收復上述兩城！」好，終於可以睇房總半島了。

石田佐吉三成 2017-4-10 23:10:44 大家仲記得里見義堯嗎？1538年國府台之戰後，佢成功保留實力回到舊領，並計劃進攻上總、下總兩國，但當地勢力 - 真里谷氏因為有北條撐腰，所以進展並不順利，直到1544年真里谷家臣 - 後藤兵庫助奪取笹子城，真里谷氏討伐不果，於4月請里見義堯幫忙，對里見家黎講，真里谷內耗簡直係千載良機，家臣正木時茂、時忠參與討伐，後藤兵庫助變裝逃亡被識破，當場被斬，里見家見證真里谷氏根基動蕩，搵到入侵既缺口。

到左1552年11月，里見義堯趁家督 - 真里谷信隆病逝，就率領一萬三千人幫真里谷氏「治喪」，攻打首府椎津城，真里谷有八千守軍，並響附近既小櫃川佈防，意圖截殺渡河既里見軍。里見義堯於深夜故意點火，偽裝從兩側渡河，將真里谷軍分散，再趁敵中央空虛強行渡河，輕鬆突破防線，並圍攻椎津城旁既久保田城，守將真里谷信常堅守三日，因苦無援軍意圖趁亂逃走，卻被里見軍截殺身亡。

真里谷氏家督 - 真里谷信政遂向北條求救，北條氏康因為長尾景虎入侵，分身無暇，只能派少數兵力支援。但未等到北條軍黎到，真里谷信政響12月23日就出城，與里見軍在椎津城外血戰連場，結果真里谷軍慘敗，真里谷信政自殺身亡，椎津城落入里見家手中，將上總國完全控制，真里谷氏從此沒落。本來里見義堯想乘勢進入下總國，但北條氏康煽動真里谷遺臣 - 吉原玄蕃助叛亂，所以里見家既擴張一時終止。

里見義堯以漁人之利，將上總國收編旗下，對北條氏康黎講，就如後欄起火一樣，計劃先平定後方，才處理呢個來自越後既強敵。而長尾景虎亦開始唔得閒了，因為入主關東期間，北信濃接連傳來壞消息，就等我地睇睇發生咩事。

:^(

除了下總國、小弓城等，都已經是里見家勢力範圍

就響關東對峙期間，武田晴信打敗信濃守護 - 小笠原長時，對方遁走越後國向長尾景虎求救，背後既北信濃被偷襲，長尾景虎亦無心管理關東，立即撤退幫忙。到左1553年4月9日，武田晴信策反村上家多名家臣，就算村上義清如何勇猛，都無法挽回人心，村上義清撤走葛尾城，向長尾景虎求救，得到五千援軍襄助，村上義清再度鬥將上身，在八幡一帶擊敗武田軍，僅僅十三日就收復葛尾城，只係蠻將之勇真能力挽狂攔？

8月，武田軍捲土重來，今次一舉將村上義清打個體無完膚，村上義清再次亡命越後，對長尾景虎黎講，北信濃失陷，就會失去越後國既屏障，影響將來進出關東，所以今次要認真出擊了！同時，武田晴信收到長尾景虎親自出擊既消息，亦響北信濃監田城設置本陣，佇候越後軍到來，而決戰既地點，就在「川中島」。

:^(

川中島戰場一帶

9月1日，雙方在鹽崎城附近既「布施」對峙，長尾景虎先拔頭籌，以強蠻既北國力量擊破武田軍前鋒，更將荒砥城攻破，兩日後繼續挺進。雖然初戰失利，但好快就有對策，兩日後夜襲荒砥城，截斷長尾軍退路。

既然後路失據，長尾景虎就退到廣闊既八幡原，雙方偶爾有小戰鬥，但一直避重就輕，結果雙方對峙左二十日左右，就各自撤退，第一次川中島之戰，雙方各自試探實力，並無太大衝突，但呢場示威卻係龍虎十年爭戰既開端。戰後，武田晴信尚未控制整個北信濃，既然長尾景虎影響戰略，就必須與之一戰，但前提要鞏固好周邊關係，於是武田重新思考與今川家建立，並挑選另一對象 - 關東北條家，一場觸動關東既外交同盟，即將誕生。

:^(

十年既宿命決戰，已經揭開序幕

次回

拜見天皇將軍 - 長尾景虎上洛
加強國政 - 《今川假名目錄》追加項目
關東最大外交 - 甲相駿三國同盟
攻打木曾氏 - 武田平定南信濃

龍圖閣直學士 2017-4-10 23:25:08

終於都打

:^(

不過川中島我覺得係得不償失,由其係損失信繁

:^(

當然係 2017-4-11 00:41:41 此回覆已被刪除

伊勢新九郎盛時 2017-4-11 01:06:27

咁呢隻鑊係都後醍醐孭
呢兩件最多係佢同事點算佢手下

張開西望 2017-4-11 01:13:01

上杉武田如果唔係無啦啦瓜柴既話
我諗佢地絕對有能力阻礙到信長
例如三方原都打到德川嚇到賴屎, 唔敢再阻武田
由三河尾張咁入信長後欄, 一定會相當精彩

:^(

張開西望 2017-4-11 01:14:11

後醍醐搵左個唔掂既做帶隊, 害到大家陷包散

龍圖閣直學士 2017-4-11 01:16:52

武田信玄唔係病死左,唔敢講滅左織田,但係一定阻到佢天下布武

:^(

話我吹棒佢都係咁話

:^(

伊勢新九郎盛時 2017-4-11 01:39:14

咁唯一可以同足利尊氏血統平等既只有新田氏
而且新田義貞先係真正係破北條首功
身份戰績都應該係佢（呢樣係日本重要過能力）
北畠顯家同楠木正成一個公家一個惡黨出身
兩件其他武士唔方會睇得起

石田佐吉三成 2017-4-12 22:04:01 第一次川中島之戰後，1553年9月長尾景虎獲朝廷賞賜，就動身前往京都，準備拜見後奈良天皇、將軍足利義輝，隨行人士包括山內憲政及一眾家臣共五十幾人，但係陸路要地 - 越中、加賀兩國有光頭黨作亂，所以長尾景虎聯絡昔日戰友 - 朝倉氏，由海路繞過能登半島，在越前敦賀郡著陸，經過朝倉、淺井、六角氏既領地進入京都，由於路上勢力並非長尾家敵人，所以一路上都好順利。

長尾景虎入京後，獲天皇賜任「從五位下彈正少弼」，相當於我地既五、六品官位中間，所謂「彈正」就同中國歷史既御史台相近，昔日負責監督京都治安、彈劾左大臣以下既官位，少弼既官位係「彈正」當中級別較小既官位。得到天皇賞賜後，長尾景虎在京都、堺港四處遊覽。參訪京都後，長尾景虎就到朽木谷探訪足利義輝，話說景虎上京前一個月，足利義輝、細川晴元意圖再對抗三好長慶，卻兵敗逃亡，所以一直滯留在此。

足利義輝見到景虎參訪，當然喜出望外，呢個時候既義輝只係十七歲，有打倒三好長慶既雄心壯志，二十三歲既長尾景虎想起初出茅廬既自己，加上自己獲幕府恩賜成為一國領主，不論在公在私，室町幕府都對其有恩，所以二話不說表示：「如果將軍大人需要，我長尾景虎定必出手相助，為將軍家效犬馬之勞。」呢次會面，長尾景虎在朝廷、將軍之間建立良好形象。回國期間，又與朝倉家打通海路貿易，令越後國特產 - 青薴[1]在越前、京都一帶流通。

:^(

長尾景虎上洛及海貿路線

輪到駿府既回合，響第一次川中島之戰、長尾景虎上京期間，今川義元為加強對領內家臣、國人、百姓既統治權，提高動員能力，以便將來擴張勢力，就參考父親 - 今川氏親訂立既《今川假名目錄》，並與母親壽桂尼、師父太原雪齋共同商議後，追加二十一項條例。

追加條例大致以強化「寄親、寄子制」關係為主，「寄親寄子制」由平安時代已經興起，武士、地主與外地武士、遷徙者建立虛擬父子關係，寄親保障權益，但相對寄子要絕對遵從，動員時要積極參與，比起透過婚姻，呢類虛擬關係比較似一種契約。「寄親寄子制」響室町時代、戰國大名包括武田、今川、北條都有流行，演變為大名保護臣民，家臣、土豪為大名效忠，地主亦可以與農民建立呢種關係。

:^(

今川家的寄親寄子制，與其他勢力不同，從一而終

今川既追加條款，要求寄子不可隨意更換寄親，亦不可在寄親以外地方立功，相對寄親不可強迫他人建立契約，亦不可隨意延長。第二點，加強「本土化」，規定只準任用本國人士做官，外地人士即時解僱，另外對國外既回信需要經今川家審批，最重要是廢除室町幕府設置既特權，強調只有今川家設置既，先係真正秩序；除此之外，經濟上禁止非法買賣土地、禁止私下轉讓寺廟，法律上則改善訴訟、明定家屬撫養權爭議條件、禁止訴訟偏袒地主等等。

總結今川義元既追加條款，主要強化對國內、家臣統治，仲強調本土化、東海道獨立，所以你話今川義元將來是否想上洛，支持將軍家？我不認同，反而我認為佢想以坂東人身份，建立自己既東海道獨立王國，脫離將軍家規律、昔日既守護文化，可以話係最先有「戰國大名」條件既勢力之一。更重要一點，《今川假名目錄》內容嚴謹多樣，成為後來分國法參考對象，追加條款與現代社會保障制度相似。由此可見，今川義元既治國手腕其實值得參詳。

呢個時候，尾張快報又來了：「1554年1月，織田信長新上任，仍然未得人心，今川家派人進攻尾張國，響緒川城附近修建村木砦，有人叛投今川家，截斷居城 - 那古野城與緒川城既聯繫，緒川城既水野信元求救。但係，織田軍出發不久家臣林秀貞、林通具不服信長，陣前脫離，信長急行到緒川城，又派船隻逆流而上，1月24日慘勝今川軍，佔領村木砦，隨後信長就響附近放火，收兵撤退。」

:^(

村木砦之戰流程(Gif檔)

1554年3月，河東地區 - 善得寺發生重大事件，在太原雪齋既主持下，「東海第一弓」今川義元、「甲斐之虎」武田晴信、「相模之獅」北條氏康三位霸者敘首一堂，善得寺雖然位於今川家領地內，但呢座寺廟一直保持中立，正係三家願意出席既原因，太原雪齋率先主持，開始呢場會盟。

:^(

三雄敘首善得寺 (信長之野望)

「今川、武田、北條都係在關東割據一方既強勢大名，多年黎我地都互有攻守，亦曾經建交，今次老衲召集三位大人，就係為將來關東局勢謀劃方向。我主 - 今川義元計劃向西方拓展、武田家向北信濃及西上野擴張、而北條家就致力關東地區，三家各有方向，只係擔心後方失據，既然大家毫無利益衝突，我地何不聯合起來呢，各自發展呢？」

石田佐吉三成 2017-4-12 22:04:32 北條氏康率先回應：「雪齋師父所言甚是，最近我方有意向房總半島、關東平原拓展，雖然我家昔日與今川、武田兩家交手，但八年前河東約定後，我地一直維持和平。比起兩位，最近北方來了一個麻煩既勢力。」

「越後長尾家嗎？」武田晴信回應道：「在吾人積極進取北信濃時，此人因村上家求援，妨礙我家大計，實在係一大麻煩。確實聯合起來應付更好，如此吾等都有好處。」

「既然大家意向相投，我想聯合起來應該冇問題，我今川義元樂意與大家合作。去年在下已經與武田家重建婚姻關係（由武田義信迎娶義元之女 - 嶺松院），我等不如建立婚姻同盟，強化三國友好關係。」

呢場善得寺會盟，三位霸主都有共識，以婚姻強化關係，繼武田義信迎娶今川義元女兒後，北條氏康安排兒子 - 北條氏政迎娶武田晴信女兒 - 黃梅院，同時將女兒 - 早川殿嫁給義元長子 - 今川氏真，聞名既關東外交　- 「甲相駿三國同盟」就此誕生，三家在毫無後顧之憂下，專心沿自己方向發展。

:^(

三國同盟後，關東局勢圖

輪到武田家既回合，武田晴信在盟約後，7月南信濃伊那郡國人 - 知久氏拒絕歸順武田家，晴信長子 - 武田義信初次帶兵出戰，攻打佐久郡、伊那郡地區，在8月收拾知久氏，又積極平定東部叛亂既國人，義信年僅十六歲就有如此表現，所以一班家臣讚賞：「虎父無犬子呀，主公，武田家既幼虎出柙了！」

同時，武田晴信在去年與長尾家衝突後，主張避戰，專注以計略對付，首先策反長尾家臣 - 北條高廣，越後國內起火，長尾景虎出兵包圍高廣居城 - 北條城（位於越後國中部），到左1555年先重新收服對方，事後北條高廣被恩准回歸。

內亂方平，新亂又起，武田晴信策反北信濃善光寺國人，將川中島一帶奪取，長尾景虎只能再次出動，4月抵達善光寺，先包圍犀川北部既旭山城，並在附近修築葛山城，武田、長尾兩軍隔著犀川眉來眼去，深情對望二百幾日，並無發生任何衝突，一直對峙到10月。今川義元唔想武田、上杉增進感情，就出面調停，最終雙方同意廢除旭山城，以犀川為界，北部屬長尾家、南部屬武田家，第二次川中島之戰就係一場為期二百幾日既「約會」。

:^(

川中島戰場圖

既然都出兵了，無理由空手而回，武田晴信轉向南信濃最後勢力 - 木曾家，呢個木曾家自稱係河內源氏- 木曾義仲既後裔，但實際係藤原北家後裔，因長居木曾谷而改姓「木曾」。木曾氏曾經與小笠原長時聯手，在南信濃對抗武田家，但隨著小笠原家敗退、北信濃變天，武田晴信亦轉向木曾谷。

武田晴信殺到，木曾氏當主 - 木曾義康自知難敵，就向武田家投降，如此南信濃一帶盡收武田旗下，木曾義康亦向晴信簡介西邊鄰國 - 東美濃地區既動向，武田立即殺入東美濃，當地豪強 - 遠山景任奉行現實主義，立即投降，以便在齋藤家、武田家維生。齋藤道三、織田信長雖有派兵進攻，但武田晴信主動與兩家和睦，東美濃就變成既是齋藤，又是武田屬下既微妙局面。

次回
古河足利家沒落
關東強敵 - 房總里見義堯
第三次川中島之戰

註１：青薴係日本服裝布料常用既纖維物質，屬於越後國特產，但基於當時陸路阻塞，無法有效運送到京都。