石田佐吉三成 2017-4-3 22:40:29 武田晴信再次攻打諏訪郡前，曾經在1543年進攻東部小郡縣，與豪強大井貞隆交手，呢個大井貞隆響信虎時代已經對抗武田家，雖然一度被擊敗，但乘著晴信攻打諏訪郡既空隙，復奪城池。今次，大井貞隆死守長窪城，土豪 - 望月氏亦支援大井，但因為家臣蘆田信守、相木昌朝私通武田，大井貞隆被押往甲斐、望月氏居城被攻陷，但望月氏繼續在信濃抵抗武田。



信濃國勢力圖

1545年，收拾周邊勢力既晴信，銳意再度攻打諏訪郡，討伐叛徒 - 高遠賴繼。4月2日從甲斐出兵，路上不停散佈謠言，指武田對敵對者毫不手軟，甚至會將全城民眾送去做奴隸，高遠賴繼聽到大叫：「武田軍殺到埋黎，諏訪高遠都無得避，我要化身諏訪大明神打救世人，哈哈哈....」

結果，高遠賴繼嚇到棄城而逃，武田晴信入城後安撫民眾，高遠賴繼知道中左流言，但亦死死氣投降武田，就此諏訪一族暫投武田家。但係，武田晴信立場轉向下一個目標 - 藤澤賴親，此人係信濃諏訪郡一帶土豪，與信濃大名 - 小笠原長時為姻親關係，亦被認為係策動高遠賴繼造反既幕後黑手。

6月武田大舉進攻福與城，小笠原、藤澤兩軍抵抗，小笠原長時據守旁邊既龍崎城，武田家臣 - 坂垣信方在6月1日夜襲龍崎城，擊破小笠原軍，迫使藤澤賴親送出人質投降，武田晴信改造高遠城，作為信濃既前線基地，6月中旬回到甲府，與側室 - 湖衣姬共赴巫山雲雨。



今日既高遠城，已經係賞櫻聖地

不久，關東三國終於再次角力，話說今川義元即位後被北條奪取河東，更煽動遠江國人造反，今川壓住叛亂後，本來計劃透過武田仲介，與北條家和睦，但北條氏康拒絕和議。於是，為重奪河東地區，今川義元更心生一計：「既然北條響關東樹敵無敵，就黎個『合縱』，將北條徹底壓死。」

於是，今川義元安排太原雪齋聯絡武田晴信、山內憲政、扇谷朝定、足利晴氏等人，準備結成「北條包圍網2.0」，武田與今川聯盟、山內扇谷與北條敵對，當然爽快參與；山內、扇谷兩家不計前嫌，攜手合作；至於足利晴氏，雖然曾經與北條協力對付小弓公方，但北條氏綱死後就與北條家反目，所以上述幾家響1545年7月，全部參加「合縱」計劃。

今川義元率先出擊，7月率兵抵達善得寺，北條氏康立即急行到河東地區應戰，武田晴信亦率兵五百增援今川，但與其話增援，不如話係食花生。9月16日，今川軍攻破吉原城，並進入三島地區，將北條幻庵守衛既地方徹底包圍。

同一時間，山內憲政、扇谷朝定、足利晴氏攜手出擊，召集關東各大土豪，以超過八萬人既大軍，攻打北條家，首先進攻武藏國，意圖收復河越城。身在駿河既北條氏康收到消息後，感到非常頭痛，前有今川武田，後有關東聯軍，所面臨既困局比其父親 - 北條氏綱時代更嚴峻，北條氏康響絕境之中，決定放手一搏：「比起河東，關東更重要，就透過武田晴信幫忙，與今川義元停戰！」



「北條包圍網2.0」

10月下旬，今川義元、武田晴信、北條氏康首次相聚，由太原雪齋協助於11月順利交換誓詞，北條家答應今川家收回屬於駿河國範圍既河東地區，三家完成和議後，北條氏康立即收兵趕回關東，迎擊聯合軍。

「雪齋，你認為三家會有進一步發展嗎？」今川義元問道。
「如果北條撐得過去，或者應該三家聯合，各取所需。」太原雪齋既建議，或者將來會有所應驗。「前提，係佢地撐得過去。之後，佢地就要賣我地一個人情了。」

北條氏康快馬加鞭，返到小田原城一帶，當時關東軍依然包圍河越城，幸好有猛將 - 北條氏綱以三千兵力死守保住，但關東軍三面夾攻，遲早都會失陷，北條氏康立即率領八千人救援，前往河越城既路上，係扇谷家臣 - 太田資顯把守，但太田並冇參加包圍，北條氏康就籠絡太田，打通前往河越城既要道，確保兵糧運輸。

北條氏綱及守軍有飯食，自然唔怕關東軍，相反關東聯軍圍城後，終日吃喝玩樂，就同三國時代既十八路諸候相似，怠慢軍心，守備鬆懈，山內家臣 - 長野業正多次勸說不果，結果你有你圍，我有我守，就咁拖延左半年時間。



關東聯軍佈陣圖

呢段時間，我地暫且睇睇越後長尾景虎，即使櫪尾城勝利，但越後國人仍在四處叛亂，其中越後上杉家家臣 - 黑田秀忠在1545年10月突襲春日山城，殺死長尾景虎兄長 - 長尾景康，然後死守黑瀧城。隨後，長尾景虎臨危領兵，將黑田秀忠擊敗，秀忠投降，然而1546年2月黑田秀忠再次謀反，長尾景虎輕鬆輾壓，黑田秀忠不服道：「這是什麼軍法？點解我地咁輕易被擊敗？」

「吾的兵法，凡人根本無法理解，沒有看清自己實力，甚至連如何戰敗都不清楚，愚昧至極！」長尾景虎訓斥後，黑田秀忠不服氣的切腹自殺。呢場平亂後，長尾景虎既名聲傳遍越後，無論長尾家，還是揚北眾，甚至連守護 - 上杉定實都有推舉景虎做領導既打算。

石田佐吉三成 2017-4-3 22:40:46 回到關東，1546年4月，北條氏康、北條氏綱保持聯絡，知道關東軍戰意低下既消息，北條氏康派綱成從弟 - 福島勝廣殺入河越城，通知北條綱成：「現時關東軍戰意低下、守備鬆懈，我軍將會抵達現場，到時一齊夜襲關東軍！」

同時，北條氏康向關東聯軍派使者詐降，雖然聯軍拒絕北條投降要求，但因此變得驕傲自滿，完全忽視北條軍，繼續沉溺酒色之中。終於，在4月20日晚上，北條氏康抵達關東軍本陣一帶，兵分四隊，命令多目元忠在後方指揮，睇準時機下令撤退，自己就率領三隊潛行，臨行前鼓舞士氣道：

「一直以黎，我地北條家都被呢班自比名門既關東武士歧視，話我地係外鄉人。但事實係，我既祖父 - 伊勢盛時，以五百浪士奪取一國，成為大名。我既父親(北條氏綱)，面對關東包圍網仍面無懼色，逐一應對，豎立我家根基，全部都係白手興家建立！」

「相反，呢班所謂名門在做什麼？佢地只顧爭權奪利，經過長享、永正之亂，將近六十年了！而家佢地就只靠名氣，聚集一群烏合之眾，響我地面前縱慾聲色，呢種係武家風氣嗎？今日，我地就要好好教導佢地，即使唔係傳統名門，我地都有武家人既志氣！」

北條軍無一不受鼓舞，迅速潛入敵陣附近，到左午夜時份，北條氏康下令全軍卸甲，綁上白布辨識，輕裝突襲關東軍本陣，突襲扇谷朝定既本營，鬆懈不備既關東軍人馬大亂，整個本陣陷入火海，北條氏康下令：「唔好同我執人頭！打完有排你地執呀！殺呀！」

北條軍一直衝前，扇谷朝定走備不及被當場殺死，家臣難波田憲重聞訊後，投井自盡，而山內憲政響長野業正掩護下，倉皇撤離戰場，部份重臣殿後陣亡，北條氏康全軍殺得性起，不覺過份深入，多目元忠立即吹螺收兵。



河越夜戰，北條軍進攻路線

呢個時候，北條綱成率領著名既「黃備」部隊，大叫「勝利！勝利！」，鼓舞全軍突擊足利晴氏既部隊，北條氏康、北條綱成會合繼續衝殺，紅、黃、藍、黑、白五色會合。

「紅戰士（赤備） - 北條綱高！」
「黃戰士（黃備） - 北條綱成！」
「藍戰士（青備） - 富永直勝！」
「白戰士（白備） - 笠原康勝！」
「黑戰士（黑備） - 多目元忠！」
「我地就係，守護北條家既五色力量 - 『北條連者』(北條五色備)！」然後，關東軍本陣亦跟住一兩道火光爆發，為五色備助威。



北條五色備 示意圖



北條綱成 概念圖 (信長之野望)

最終，北條軍憑著呢場夜襲大獲全勝，扇谷上杉家因家督、重臣戰死，正式滅亡；山內上杉家、古河足利家失去大量勢力，自此一蹶不振；北條氏康威震關東，掌握主導權，積極對外擴張。

然而，有關呢場戰役，由於記載不足，所以現今仍有不少質疑河越城之戰，是否真係如通說所講，北條軍以11000人擊敗八萬關東軍？其實北條軍人數方面，由於有過去既檢地資料，北條家當時估計所領約60萬石，以平均1萬石動員300-500人既算術，可以知道北條至少有18000人動員力，依此判斷北條軍人數不成問題。

然而，關東軍缺乏檢地紀錄，實際參戰既家族亦沒有記載詳盡，最詳細都要等到豐臣秀吉太閤檢地，方有數字記錄，因此到底「八萬兵力」一說如何肯定？就不得而知，亦不見站得穩。另外，「河越夜戰」既記載，只見於《關八州古戰錄》、《北條五代記》等軍記物，詳細記載不足，所以至今仍有歷史學家爭論中。



北條氏康



河越夜戰後, 關東局勢圖

次回
小田井原之戰 - 武田盡收東信濃
猛將村上義清 - 武田晴信初嘗敗果
第二次小豆坂之戰 - 太原雪齋的軍略
眾望所歸 - 長尾景虎就任家督

延伸閱讀：
關於河越人數分析, by台灣網民
https://www.ptt.cc/bbs/WarringState/M.1182416153.A.BBA.html

指原莉乃旦那樣 2017-4-3 23:58:35 樓主打錯北條綱成做北條氏綱

:^(

石田佐吉三成 2017-4-4 00:26:09

樓主打錯北條綱成做北條氏綱

:^(

又真係啊......

:^(

堺雅人 2017-4-4 11:08:11 戰國三奇襲，得陶賢晴唔係輸輕敵咁易比人殺敗，只係輸太過急進，毛利算唔算贏得最險？

石田佐吉三成 2017-4-4 12:29:57

戰國三奇襲，得陶賢晴唔係輸輕敵咁易比人殺敗，只係輸太過急進，毛利算唔算贏得最險？

三大奇襲，桶狹間、嚴島都好靠運氣
嚴島除左靠天雨，仲要好彩村上水軍願意幫手，好多因素。你講得岩，真係得毛利贏得最險；而桶狹間之戰，遲啲會有另一個版本，你就知道今川義元有幾黑仔

石田佐吉三成 2017-4-4 12:47:11 不過老實講句，關東班名門一直內訌，聯軍就只係縱情享樂、不思進取，會被淘汰真係難免。

當然係 2017-4-4 16:15:21 此回覆已被刪除

石田佐吉三成 2017-4-4 20:47:11

:^(

石田佐吉三成 2017-4-5 12:32:47

:^(

淚推

恭喜閪女人 2017-4-5 15:28:29 樓主會唔會詳細講下島津發跡史？btw，由第一個post追到而家，加油！

遊日無料案內所 2017-4-5 15:40:52 希望日後有機會 西軍主將 逐個介紹
三成 吉繼 行長 秀家

:^(

治部 好少講自己嘅事

:^(

石田佐吉三成 2017-4-5 18:43:40

樓主會唔會詳細講下島津發跡史？btw，由第一個post追到而家，加油！

我之前寫左外傳，基本上係島津義久一族既發跡了

石田佐吉三成 2017-4-5 22:37:09 1546年「河越夜戰」，將整個關東勢力大洗牌，北條一躍成為關東最具威名既勢力，其他三位英傑都各有發展，首先係甲斐武田家，武田晴信收服諏訪郡後，繼續向外擴張，5月擊破信濃東部國人 - 大井貞清，將內山城一帶土地盡收旗下。

隨後，晴信著手國內管治，於1547年頒佈《甲州法度》，呢項法度共分上下兩卷，上卷最初只有55條法令，但隨著後來發展，逐漸增加到約57條內容，而下卷係類似「武田家家訓」，係武田家著名既分國法。

呢項《甲州法度》我只探討上卷，大致內容係明定武田家統領全國土地、保護農民權益、禁止私藏土地、禁止私鬥、限定租務法則等基本條件，而重點在以下兩點：第一係「連坐法」，例如有人逃稅，就要同村所有人代為支付，或者如果有人犯罪，藏匿、知情不報者會被連坐處罰；第二就係「告密法」，首先限制武田君臣上下關係，除左為武田擴張打仗時需要外，禁止家臣間結黨營私，將家臣統一管理。同時恩威並施，令家臣間互相監視，不敢造反。而民眾百姓間亦可以互相告密，防止反抗、逃亡企圖既人。講到呢度，大家有冇覺得好似邊個？



《甲州法度》

同年7月，武田晴信進軍信濃東部，目標係當地豪族 - 笠原氏，首先武田晴信進軍鄰近上野既志賀城，將國內既礦工調到戰場，堀坑截斷城內水源，頑抗既笠原清繁見形勢不妙，向當時退居上野國既上杉憲政（山內憲政）求救。上杉憲政雖然在河越城新敗，但在上野國仍有龐大勢力，重臣長野業正勸諫不果，上杉憲政派高田憲賴支援笠原氏。

上杉軍越過碓冰嶺， 8月兩軍在志賀城北部既小田井原交手，武田家臣甘利虎泰、板垣信方率領分隊，與上杉軍血戰連場，根據江戶時代軍紀物《關八州古戰錄》記載，武田軍斬殺十幾名將領、三千士兵。隔日，武田晴信將三千首級懸掛，一字排列在志賀城前，知道毫無救兵既笠原氏士氣盡失，四日後武田軍總攻擊，血戰一日便突入本城，笠原清繁、高田憲賴一同戰死。



小田井原之戰

戰後，武田晴信下令活捉志賀城所有百姓，男既帶去金山做礦山，女既就...被賣去做奴隸，有點姿色既都被拐去做人老婆，特別係笠原清繁既夫人，被迫嫁到武田家臣 - 小山田信有做妾。此刻，志賀城就成為甲信地區最大既人口販賣場，慘絕人寰，三百年前既成吉思汗響三途川見到一切，表示：「好小子，你有蒼狼既豪邁！」　自此，武田晴信將信濃東部 - 佐久郡地區盡收旗下。



信濃國各郡圖

奪取佐久郡後，武田家與北信濃大名 - 村上義清鄰接，響武田信虎時代，雖然偶有戰事，但後來兩家和睦，然而晴信銳意控制信濃全境，一場衝突在所難免，但今次既對手係呢位信濃猛將，村上義清係清和源氏後裔，南北朝時代起已經在信濃國紮根，擁有北信濃葛尾城、戶石城、川中島地區，以及小縣郡、水內郡等地，勢力一時無兩，然而當地豪族 - 高梨賴親響長尾家支援下，從村上家獨立，雙方經常交手，但隨著武田晴信拓展到自己門前，兩家亦暫時停戰了。

1548年2月，武田晴信率八千人北上，與板垣信方入侵小縣郡，村上義清據守戶石城一帶，與武田軍隔著千曲川對峙，兵力約為五千。雙方在2月14日正式交戰，有關呢場戰役記載不多，唯獨《甲陽軍鑑》有詳寫，只好破例沿用。武田軍由甘利虎泰、板垣信方、武田信繁、小山田信有擔任先鋒，與村上軍初戰取勝，斬殺多名敵兵，村上軍一時敗退。

上回北條氏康曾經提醒，打仗期間切勿數人頭，但板垣信方卻犯左呢個錯誤，村上義清睇見武田軍鬆懈，立即回頭突擊，突如其來既衝擊令武田軍大亂，村上義清斬殺板垣信方、甘利虎泰等人，然後衝向武田晴信，大喊：「武田小兒！叔叔教你咩叫打仗呀！」

村上軍以排山倒海既氣勢，穿透武田本陣，，武田軍陣型如崩堤一樣，被村上隨意橫衝直撞，村上義清見到武田晴信，立即衝陣與近衛交手，兩名青年武士架槍抵擋，自報名號：「馬場信房、工藤祐長在此，休想傷害主公！」

「年輕人有志氣，但面對信濃猛將，又有什麼用處？」村上義清擊退二人，武田晴信響混戰中被刺傷手臂，幸好小山田信有既部隊奮戰，掩護晴信撤退，村上義清因為孤軍深入，加上初戰亦損失三百人左右，就挾著勝利撤退，不忘嘲笑道：「想與我村上義清鬥？返去練多十年啦。」



鬥將 - 村上義清

石田佐吉三成 2017-4-5 22:37:31 痛失重臣、五百兵士，一直長勝既武田晴信難以接受敗戰既事實，一直在原地駐兵二十幾日，死不撤退，不時喃喃自語地說：「不要怕，只係技術性調整，不要怕...」家臣不忍睇住晴信如此呆滯，就請晴信母親 - 大井氏派人指摘勸退，最終武田晴信在3月撤軍，到湯村溫泉養傷。

武田失利，北信濃勢力包括村上義清、小笠原長時、藤澤賴親、仁科盛能、諏訪氏餘黨乘機聯合，企圖奪取佐久郡、諏訪郡，村上義清在4月燒毀內山城，而小笠原長時等人亦響6月攻陷諏訪下社一帶，諏訪郡東西分裂，武田及信濃眾各佔一方，武田家正面臨危機。



此圖恰好形容武田晴信既心情

呢個時候，我地暫且轉移到今川家，之前提到松平依賴今川，與尾張織田家對抗，但因為織田家攻陷安祥城，擴大在三河國勢力，身為外戚既國人 - 水野信元率先叛投織田家。1547年，松平廣忠為左得到今川家全力支持，就將年僅六歲既兒子 - 松平竹千代送往今川家做人質，但在田原城被家臣 - 戶田康光背叛，綁架到織田信秀旗下，今川義元怒派太原雪齋攻打田原城，將戶田康光誅殺。

同一時間，織田信秀因為年前對美濃攻略時，被大名 - 齋藤道三以伏兵擊破，便改變戰略，以入侵三河國為主。同時，為左鞏固後方，便與齋藤道三結成姻親關係，由兒子 - 織田信長與道三女兒 - 齋藤歸蝶結親，正式建立兩家關係。

「你就同我睇睇信長既為人，如果佢係蠢材，就用我呢把脇差刺死佢。」齋藤道三叮囑歸蝶道，但對方亦一臉腹黑地回應：「如果佢係能人，我呢把刀就會刺向父親大人啊？」呢對腹黑父女既對話，正好代表呢場美好親事背後，隱藏著一輪竊國既陰謀。同一時間，在那古野城，年僅十四歲既織田信長，與六歲既松平竹千代初次會面，然而有邊個會估到，日本既命運就決定響呢兩個細路身上。

1548年3月，織田信秀進攻三河，派織田信廣為先鋒，攻打岡崎城，松平廣忠立即向今川家求救，一直監視三河動態既太原雪齋，終於等到賣人情既機會，率領一萬人抵達小豆坂地區，以山丘為本陣，佔盡地利，織田信廣初時擊破松平軍，再與今川前軍交手，一度將其擊退，結果織田軍不覺驕傲起來，過份深入。太原雪齋睇準機會，發動伏兵，從三面包圍織田軍，將織田軍殺個陣型崩壞，織田信秀無奈撤退，在三河國局勢變得被動，松平廣忠亦銳意重拾勢力。



第二次小豆坂之戰



太原雪齋 (風林火山劇照)

返到甲斐國局勢，7月11日，隨著諏訪西部國人 - 矢島、花岡氏背叛，武田晴信終於養傷完畢，從甲府城出發，故意隱瞞出兵消息，七日後到上原城後才發表消息，小笠原長時、仁科盛能期間不歡而散，只有小笠原氏抵抗。

7月19日凌晨，武田晴信趁夜潛行，於清晨抵達小笠原軍本陣，突襲鬆懈既敵軍，小笠原家臣 - 山氏、三村氏已成武田內應，從背後偷襲，結果小笠原軍戰死千人，小笠原長時慘敗逃到林城，更丟失大片城池，藤澤賴親向武田投降，而仁科盛能亦有投靠武田既意思，呢仗勝仗後武田重奪諏訪郡，更直迫小笠原家領地，果真絕境逢生。



小笠原長時 (風林火山劇照)

輪到越後國既回合，長尾景虎鎮壓黑田秀忠後，有越後家臣、國人不時標榜景虎有大將之風，想推舉佢上任家督，包括柿崎景家、直江景綱、高梨政賴、揚北眾中條、本庄氏等人；不過，家督長尾晴景都有支持者，包括姐夫長尾政景、揚北眾黑川清實等。就響大家擔心越後國爭權時，傀儡越後守護 - 上杉定實在1548年12月出面調停，讓長尾晴景收景虎為養子，並立即隱退，呢場家督爭奪戰雙方好來好去，年僅19歲既長尾景虎，在青壯之年即位家督，為越後國開創新既一頁。



本回結束後，關東勢力圖

次回
今川統領三國、戶石城大敗、長尾政景之亂、北條公事赦免令

石田佐吉三成 2017-4-5 22:38:14 延伸閱讀

http://home.d03.itscom.net/p-l514/kousyuhato.html

《甲州法度》五十七條原文

吾是痴線佬 2017-4-6 16:36:12 留名等睇川中島

Onew 2017-4-6 16:41:19

:^(

:^(

:^(

:^(

:^(

:^(

:^(

當然係 2017-4-6 17:03:12 此回覆已被刪除

希比 2017-4-6 17:05:11 9100

石田佐吉三成 2017-4-7 12:44:42 各位真不好意思，最近生活事務實在太繁瑣，身邊有人出事，自己又忙得不可開交，屋企人咩都唔記，旨意在下處理

:^(

所以呢排更新得慢左，我自己真係講句萬分抱歉，應該下星期開始可以重回正軌，畢竟歷史事件、大綱我都寫好曬，在下絕不爛尾，務求完整奉上關東四英傑歷史，多謝各位戰國迷支持

:^(

:^(

:^(

伊夫．聖羅蘭 2017-4-7 15:48:26 唔緊要，支持巴打

:^(

呢排追翻以前日本戰國電影同紀錄片解渴

:^(

關人仁事 2017-4-7 15:56:57 石田三成

:^(

:^(

吾是痴線佬 2017-4-7 16:12:23 十卜樓主

搞掂家事先

石田佐吉三成 2017-4-7 22:11:51 1549年3月，三河國發生一件奇案，話說松平廣忠想重拾勢力，點知壯志未酬，英年早逝，關於佢既死有多種講法，一說病逝，一說在狩獵時被變民殺死，或者被私通織田既家臣殺死等等，但無論死因如何，命運都真係好捉弄人，而且合法繼承人 - 松平竹千代又被軟禁在織田家中，三河國突然變成無主地帶。

此時，今川義元認為機不可失，就立即派太原雪齋出擊，殺入尾張地區，佔領鳴海城、大高城、山崎城，再將織田信廣鎮守既安祥城孤立，松平家亦有參與行動，家臣本多忠高帶兵殺入安祥城，但因過度深入，被織田信廣擊殺，本多忠高臨死前說：「平八...要記住，永遠唔好過份深入、身犯險境，要識得吹雞呀！」於是，太原雪齋暫時退兵，繼續圍城。

同一時間，今川義元派朝比奈泰能到岡崎城，向松平家表示「深切遺憾」，並提出：「松平廣忠如同我既朋友一樣，而家廣忠新亡、三河混亂，響呢度穩定之前，由我今川義元為朋友暫時『代管』吧。」

就咁樣，今川義元將松平氏既勢力收納旗下，三河國人都相繼視今川家做靠山，有邊個會估到，今川義元幾乎兵不血刃，用外交計策就奪取一國。所以，有人亦懷疑，到底松平廣忠既死，係咪今川義元既陰謀呢？「拿，人唔係我殺架，唔好望住我呀。」今川義元如此表示，反正亦冇真實記載，所以就無謂胡思亂想了。

11月，今川、松平聯軍強攻安祥城，活捉織田信廣，織田家在三河既重要據點 - 安祥城落入今川家手中。因為去年大敗，忙於應付家務既織田信秀心力交瘁，提議以松平竹千代與信廣交換，雙方交換人質後，今川義元認為竹千代仲係細路仔，就派家臣 - 山田景隆做岡崎城代理人，又招降土豪水野氏，響呢度我地不得不服今川義元既外交手腕。



今川家進入全盛時期

好了，久違既京都快報員返黎了，我地聽下佢點講：「京都快報！大家仲記得細川晴元嗎？1531年打敗同族細川高國，再打敗家臣三好元長，獨攬京都大權既人呀。後來三好家又親近細川晴元，回復平常，但響剛才6月，三好元長之子 - 三好長慶造反，在江口擊敗同族勁敵 - 三好政長，又將細川晴元、將軍足利義輝逐出京城！三好家時代，從此開始！」

三好長慶，相信各位對佢並不陌生，呢個人堪稱初代的天下人，之後佢就會因為某些篇幅，同我地既一位主角有所交集，在此暫且不提，但肯定既係京都已經變天。



三好長慶

而家輪到武田家既回合，武田家打敗小笠原長時，將其迫到林城之後，在1549年四處招攬信濃、上野既土豪，首先一直跟隨山內家既小幡憲重投靠武田，然後輪到真田幸隆、望月昌盛等小縣郡土豪加入，傳統土豪 - 真田幸隆既加盟，令武田晴信喜出望外，就派佢處理信濃前線事務，繼續招攬當地勢力，真田幸隆響1549年9月將整個望月氏、依田氏等北信濃勢力收服，整整一年時間，武田晴信逐步蠶食北信濃勢力，之前既失利又再次回復。

到左1550年，各地都有新聞情報，首先2月越後守護 - 上杉定實逝世，定實終生無子，但越後一定要有個守護，所以足利義輝就承認長尾景虎擔任越後國主，雖然長尾家一直把握實權，但一直都未算正式領主，呢項宣判代表長尾家已成正式國主。

此時，我地睇睇久違既北條家，話說河越夜戰後，北條氏康專注發展政務，點知1549年關東發生大地震，一有災害就驚發生農民逃亡潮，所以北條氏康在1550年4月公佈「公事赦免令」，簡單黎講就係減少、簡化國內繁雜既稅務，廢除苛捐雜稅及部份債務，同時將收稅過程縮減，盡量減少由中間人抽佣，人地都話「借錢梗要還，咪俾錢中介」，北條家更指名「稅收梗要交，咪交俾中介」。

對百姓黎講，少收雜稅當然爽快，所以高呼「北條德政萬歲」！呢項公事赦免令的確有「德政令」既影子，但最大得益當然係北條家，因為呢項赦免令跳過中間地主、土豪階層，變相提高北條家既支配權，一個聰明既君主，係會識得閒時送大禮，得到名聲後再提高權力，而唔係一味壓榨，釀成地方撕裂。

6月，武田信虎既女兒、今川義元正室 - 定惠院病逝，今川、武田兩家既姻親關係暫時結束，不過雙方各有拓展，而且先前關係良好，所以未有任何爭執。

繼續講正經事，7月武田晴信攻打林城，小笠原長時見無力抵抗，一於棄城逃亡，向村上義清求救，武田家擴建當地重鎮 - 深志城，安排馬場信房把守，作為北信濃既重鎮，乘住戰勝既氣勢，武田晴信8月19日率兵七千，攻打小縣郡堅城 - 砥石城（戶石城），想一舉收拾村上義清。