大清亡國關慈禧蛋牛治 2
上一頁
第 4 頁
下一頁
常公子
2019-10-9 14:02:07
:^(
【常威近代史】（二百七十七回）
袁世凱平反系列
醜婦終須見家翁，中國最後一個皇帝袁世凱粉墨登場，以極度樣衰姿態為整個中國帝制冚上棺材板，袁世凱其實係公子獻頭！告誡中國人民千萬別回頭恢復帝制！
1915年12月11號，上午北京參議院舉行「國體投票」總開票，全國各省1993人，以100%全票通過改變國體，恢復帝制，行君主立憲，之後全體參議員上書袁世凱，曰：
「恭戴今大總統袁世凱為中華帝國皇帝，並以國家最上完全主權奉之於皇帝，奉天見極，傳之萬世。」
哇！民意要你做皇帝喎！袁世凱第一個反應係假意推辭，參議院再三極力推戴，最後袁世凱「只好俯就民意」。上述大戲，每一次改朝換代都會做一次，新皇帝總會推三推四，擺出個姿態，係自己被逼做皇帝，自己根本唔X想，中國人就係咁X老土，DNA問題來的。
12月12號，一切準備就緒，連響北京紫禁城裡面嘅清室，都預先被收賣發聲明擁護袁世凱做皇帝，袁世凱通電全國，正式宣佈接受帝位，由1911年建立嘅「中華民國」，亦正式改名叫「中華帝國」！宣傳文件上，並宣稱袁世凱有六功，分別為「經武」、「匡國」、「開化」、「靖難」、「定亂」、「交鄰」，並將自己過去宣誓共和，解釋為「民國元首循例之詞」，同「就職儀文之一」，現在「國體已變，民國元首之地位，已不復保存，民國元首之誓詞，當然消滅」。中國人民自由民主法統之路，行咗未夠五年，宣佈暫時收皮。（其實個人感覺，係徹底收皮，收到今日。）
12月13號，袁世凱響中南海居仁堂接受文武百官朝賀，正式稱帝，換上皇帝裝束，接見文武百官。佢亦唔叫自己做「大總統」，叫做「大皇帝陛下」，所有官員，改稱為「臣」。總統府改名新華宮，並決定由1916年起，廢除民國年號，改為「洪憲元年」。並設立「帝祭大典籌備處」，籌辦1916年元旦1月1號嘅登基大典，趕製御座、龍袍、玉璽、金印，撥款2000萬元大洋，極盡奢華之能事，要做場大Show沖喜吓佢。
同日宣佈，下令從周禮天官成法，發思古之幽情，新皇宮內，廢除太監制度，改用女宮。女宮亦有嚴格詳細嘅招選章程，必須身家清白，品性純良，14歲以上，25歲以下，略具姿色，體質健全，冇暗病花柳，未婚，未訂婚，要未生個仔，唔煙唔酒唔賭，你老母，你家陣係咪tvb選香港小姐啫？
袁世凱倉猝行返帝制，其實係想復興儒家哲學，係派出一個「-ism」嚟平反全國亂局，係行「緊急法」，希望中國有一個新嘅開始。
辛亥革命之後，前後五年，中華民國大力引入西方自由民主法統思想，傳統儒家哲學被徹底揚棄，但得到嘅結果係啲乜嘢？戰亂頻生，整個國家崩分離析，要搞民主，就大家都有平等權利，有咗呢個口實，大一統冇可能，各自為政亦係理所當然，因為當時嘅人，覺得咁樣先係「民主」，覺得咁樣先係「自由」...
坊間有傳聞，話袁世凱想做皇帝，係畀個仔袁克定呃鳩佢，又話袁克定日日只會俾袁世凱睇指定嘅報紙，等佢以為全國人民都擁戴佢做皇帝，對於呢一類傳聞，我常公子一概否定，打死都唔信。以袁世凱嘅能力同智慧，佢根本將一切事情操縱喺手上面，虎父犬子，袁克定嘅層次同老竇仲差好遠。
而且重申一點，所謂「皇帝」其實只係名相，權力不在乎名相，權力只在乎實質。要行駛皇帝權力，未必一定要用「皇帝」個名。中國近代史上，就有好多人以其他名相行駛緊等同皇帝嘅權力，例如用「主席」、「總理」、「司令」、「國家領導人」或「軍委會主席」，我甚至乎相信，有從來未響歷史上面出現過嘅名字，可能先係真正嘅幕後玩家。如果你問帝制本身有乜嘢實質意義？我就會答你，唯一優勢，就係「血統承繼」論，自己做完可以傳位比個仔，內裡省卻嘅係血腥無比嘅最高權力競爭遊戲。
上世紀90年代，以平民百姓身份嘅中國總結界師鄧小平，就隔代欽點之後嘅中國領導人，先有江澤民，後有胡錦濤，一切依從鄧小平嘅劇本行開放改革，好可惜，鄧小平亦唔係上帝，隻手冇辦法伸得更遠，佢冇辦法欽點到30年後嘅第三代領導人，結果今日，果然出事。
用現代人嘅眼光去睇，袁世凱稱帝無疑係極度戇鳩嘅行為。因為當時嘅袁世凱已經將權力集中於自己手上，何必要玩帝制將自己推入絕路？「大總統」同「陛下」其實一啲分別都冇，但係睇返轉頭，佢玩洪憲帝制，其實係冇辦法之中嘅辦法，袁世凱亦好有可能，係當時少數注意到「意識形態」問題嘅政客。要實現國家統一，必須先行意識形態統一，而復興帝制，其實就係一個統一國民意識形態嘅問題。
而且當時國際大弱國中國要強大起來，必須有一個高度統一嘅政治環境，否則分裂狀態延續，只會比外敵有機可乘，例如日本俄國，佢哋無時無刻想瓜分中國，洪憲帝制失敗之後，所有嘅事情亦都變成現實，之後天地大亂，戰禍延綿三十年，生靈塗炭，其實怪得邊個？
第一個衝出嚟反對袁世凱嘅人，叫蔡鍔！下次講佢！護國戰爭！
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
Ads
常公子
2019-10-10 11:39:09
【182回：大清亡國關 #三權分立 蛋牛治】
♉今集youtube，講1905年同盟會成立初期，會內曾經想建立效法西方民主嘅「三權分立」制度，即係行政、立法、司法三者分立，各不相干，其中尤以「司法獨立」最為重要，當然同盟會係一個小型組織，「三權分立」嘅制度好快唔存在，最後都係由行政主導革命行動。
♉如果你相信香港係一個經營成功嘅城市，咁我哋成功嘅地方喺邊呢？我自己覺得，香港過去最成功嘅地方，就係司法獨立，法律體制健全，簡單啲講，係一個依法而治嘅安全城市。「三權分立」係九七回歸，中華人民共和國答應香港人嘅重要承諾，行政立法不能干預司法獨立，但過去20年，香港嘅司法獨立一路被侵蝕，逐少逐少被破壞，甚至最近有人提出，「司法系統」應該為國家主權服務，行政要浚駕於司法之上，長官意志要大過法官，要超越法律，簡單啲講，就係由「人治」取代「法治」。政治制度上，開回頭車，但任何人都見到，香港現在正全力入後波。
♐為咗平定失控嘅社會秩序，特首林鄭月娥早幾日動用港英政府留低嘅一把尚方寶劍，利用緊急法權力，繞過立法會立法程序立《反蒙面法》，即日生效，即時拉人。其實係香港法律制度上一個重要嘅里程碑，上一次動用緊急法，係六七暴動，半個世紀之前，目的亦都係想平定暴動。
⛎不過，缺口打開之後，又會發生乜嘢事？當年六七暴動，運用緊急法作武器，暴動結束後，香港邁向欣欣向榮、工業飛騰嘅70年代，今次呢？歷史學家楊繼繩講過，歷史大災難之後，必有歷史大補償發生，67年後嘅香港就係一個好例子，文化大革命之後嘅中國，同越戰後嘅美國亦都係另一個例子，香港經過今個夏天嘅洗禮，又會唔會出現歷史大補償呢？
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/DThAyxxMgrE
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-11 21:35:23
:^(
【常威近代史】（二百七十八回）
袁世凱平反系列
蔡鍔（1882-1916）係根正苗紅的革命分子，中國近代史上享有極高聲譽，有「軍神」稱號，亦係第一個享用「中華民國」國葬待遇嘅風雲人物。佢嘅經歷，差唔多係20世紀初期中國一眾軍閥嘅典型，首先佢亦係湖南人，曾到過日本接受軍事訓練，已清帝國軍人嘅身份加入過同盟會，改朝換代嘅革命，佢一直有份參與。
1911年辛亥革命時，佢響雲南昆明起事，將雲貴總督李經義（1860-1925）逮捕，成立「大中華國雲南軍都督府」，從此掌握雲南軍政大權，擁兵自重，割地稱王，佢承認中華民國北京中央政府主權，但唔代表接受中央政府管轄，國民黨發動「二次革命」，蔡鍔甚至企喺袁世凱一邊對抗孫文黃興陣型，其實蔡先生嘅所作所為，就係百分百「軍閥主義」，亦係國家分裂嘅最重要原因，袁世凱臨死前拋出洪憲帝制，其實真正要對付嘅，就係依一類當時喺中華民國國土上面嘅「分離主義者」。
蔡鍔所代表嘅係雲南軍事勢力，1912年10月，袁世凱嘗試杯酒釋兵權，將蔡鍔從雲南召入北京，畀個大官（參政院參政、全國經界局督辨）佢做，希望收復佢成為自己人，可惜蔡鍔從來不羈放縱愛自由，血統上亦並非袁世凱嫡系，到咗最後，佢成為反對袁世凱帝制最主要嘅軍事領袖。
槍桿子出政權，當時嘅世界，軍人服從嘅係軍令，而非政令，軍人服從嘅人係地區司令員，並非中央政府領導人，所以先有「軍閥」依種角色存在。如果中央政府冇辦法收歸各地軍閥嘅軍權，咁分裂狀態係唔會結束。成個中國近代史，自1860年曾國藩李鴻章為咗平定太平天國之亂，建立所謂民間軍紳地方軍隊制度之後，其實所謂中國，已經進入大分裂狀態。地方軍隊由地方勢力供養，中央冇錢到，邊個出糧，邊個就係老細，情況簡單到飛起。南北長期分裂，亦係呢個原因。
我再講多次，中國大分裂軍事割據狀態一直要去到1949年中共建國之後先結束。中國共產黨，或者指毛澤東本人，完成咗中國歷史上一次最成功嘅「杯酒釋兵權」大動作，建國之後，中共將各地解放軍軍頭全數調返北京做文官，封你哋做「十大元帥」，其實係將離散嘅軍權收歸國有，大一統成功建立。當然當時中共杯酒釋兵權，亦唔係百分百成功，東北軍頭高崗（1905-1954）初初就唔肯就範，之後當然有一個好悲慘嘅下場。
1949年共產黨杯酒釋兵權之能夠成功，全因為中共手腕夠硬淨，亦冇任何妥協空間，當然背後有蘇聯史太林嘅大力支持亦係非常重要嘅因素，不過如果要我解說，我會覺得「意識形態」響當中擔當住更重要嘅角色，中共起兵搞革命，所用嘅「-ism」口實，係共產主義馬克思主義，團結軍心上前線打仗，主要用嘅係「意識形態」驅動，並非百分百利益交換，而「意識形態」主導權嚟自中央政府，呢個就係中共49年能夠杯酒釋兵權嘅最重要理由。
去返1915年底，其實蔡鍔同二五仔梁啟超早已經不滿袁世凱行返帝制，佢哋密謀反袁，收到袁世凱秘密監視，但蔡鍔以治病為名，離開北京前赴天津醫病，再經由日本、上海、香港、河內，輾轉返番去昆明大本營，連同雲南將軍唐繼堯（1883-1927），以及雲南一衆反袁勢力，召開大會組成「護國軍」，由蔡鍔出任總司，唐繼堯任都督。
護國軍嘅出現，成為反對袁世凱稱帝一股最大嘅軍事力量，蔡鍔嘅個人魅力喺當中嘅主力所在。袁世凱1915年12月12日正式宣佈稱帝，12月23日聖誕節前夕，護國軍以唐繼堯、任可澄名義從雲南向袁世凱發出電報，要求袁世凱取消帝制，誅除帝制禍首，限定袁世凱24小時內答覆。先不論正義站在何方？你擁兵自重建立武裝力量，要脅中央政府，咁唔係軍閥主義？咁乜嘢先係軍閥主義？
袁世凱冇對蔡鍔陣型嘅要求有任何答覆，12月24號平安夜，雲南正式起事反袁，蔡鍔出兵四川，前江西都督，國民黨第二次革命主力軍事領袖李烈鈞進軍廣西同廣東，唐繼堯坐鎮雲南，護國戰爭正式爆發！睇返時間表，蔡鍔應該冇諗過袁世凱會答應取消帝制嘅要求，佢返去雲南，就預咗一定要同袁世凱轟轟烈烈打一場。
蔡鍔起事，又應驗咗中國一句民間說話，「天下未亂蜀先亂」，四川雲南一帶，山高皇帝遠，又因「蜀道難，難於上青天」，地勢險要，易守難攻，所以從來難以管治。三國時代，已經有劉備建立蜀國，挑戰曹氏中央政府：之後嘅中國歷史，四川雲南一帶從未平靜過，多次割離中原地帶政權，明朝末年，有張獻忠屠川，雞犬不留；共產黨平復四川，亦都留咗唔少血；就算去到21世紀，薄熙來（1949-）亦喺四川重慶重唱紅歌，挑戰中南海。更加不得不提，中港關係大決裂，亦都係源於一場2008年四川大地震之後嘅捐款問題。
命運嘅嘢，唔到你唔信。附加一句，中國總結界師鄧小平係四川人。
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-12 11:16:00
【💣香港關 #中英聯合聲明 腿蛋治 第十二回 七十年代】
♒我嘅香港近代史，終於寫到70年代，即係麥理浩年代。最初我係想寫中英聯合聲明，但有些事情總是失控的，最後這個系列變成咗香港現代史，而且一寫不可收拾，中間我睇咗唔少書，睇到香港60年代至70年代嘅驚人發展，70年代的確係重要嘅十年，因為所謂香港同香港人，或者所謂香港嘅價值，正正就響70年代，即麥理浩年代被創造出嚟。
♏亦係由70年代開始，「香港人」先至大規模喺個世界上面出現，70
年代之前嘅英殖香港，只係過客嘅避風港，無論係來自歐洲嘅白人，抑或係嚟自中國大陸嘅難民，喺佢哋心中，香港只係一塊踏腳石，只係一處暫時遠離災難或工作揾錢嘅地方，佢哋對香港冇任何情感，亦都唔覺得自己係屬於呢度，呢度唔係佢哋嘅家，災難過去，或者合約完咗，佢哋就會離開香港，回歸故鄉。
♊好可惜，好多人都事與願違，最後佢哋冇辦法離開香港，逼於無奈之下，只有將呢笪地方變成自己嘅家，我係一個土生土長嘅香港人，生於斯、長於斯，我喺呢度成長過嚟，我最好嘅回憶都係香港發生，香港係我嘅家，無論變成點，我都唔想離開，事實上亦無可能離開（冇錢移民）。最近，有唔少朋友想離開呢度，因為佢哋已經對「一國兩制、港人治港、高度自治」完全喪失信心，佢哋都好恐懼中共不斷深化嘅極權統治，會有朝一日將所有香港人燒成灰燼（全部關進集中營勞改思想改造）。
♓對於朋友嘅選擇，我當然絕對支持，我亦好希望佢哋能夠搵到另一個安居樂業嘅地方，但係對於我自己，我仍然會選擇留低，因為我同我嘅家人亦都冇乜地方可以去，亦都冇乜地方想去。我嘅養父患咗嚴重嘅腦退化症，目前瞓響老人院，長期臥床、神志不清。我有時會諗，如果我離開咗，每日邊個去探佢？去同佢講一兩句說話呢？或者邊個會買濕紙巾、尿片、厠紙、加營素同凝固粉上老人院呢？突然有事，又有邊個陪佢上十字車去醫院呢？甚至佢一日要離開個世界，身後事邊個同佢搞呢？
♊我想表達嘅嘢係，每個人都有自己嘅命運，每個人都有自己嘅使命，同樣香港亦都有佢嘅命運，未來香港會變成點？我唔知道，但我真心愛香港，我會留低，同香港一齊行落去，水裡去就水裡去，火裡去就火裡去，就算係最後一段路都好，我總會陪伴在左右，因為呢個就係我嘅命運、我嘅使命。
🍣
https://youtu.be/8LoDjYRxWlE
【常公子近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-14 17:19:49
:^(
【常威近代史】（二百七十九回）
袁世凱平反系列
蔡鍔英年早逝，搞掂咗袁世凱自己亦都瓜埋，實齡33歲，因此成為「軍神」，連同個填房小鳳仙，都成為中國可歌可泣嘅愛情經典，成為民國歷史一位大英雄，我自己好相信，如果佢長多30年命，佢應該只會係云云鹹濕「大軍閥」許冠文中嘅其中一人，歷史人物要死嘅時候就應該死，要退嘅時候應該退，先進民主制度優越嘅地方，就係「時限性」，執政人物有時限，政黨執政亦有輪替時限。賴死唔走通常得一個結果：遺臭萬年。
你又可能會問，點解長期執政一定會出事？其實道理亦都好簡單，因為政治本身涉及太多利益同權力，或者政治根本就係處理利益權力分佈嘅遊戲，一個執政黨或者一個領導人，如果長期戀棧高位，必然會因利益權力不住隨時間累積而成為特權階級或獨裁者，中國人叫尾大不掉，特權階級就會必然發展到極權統治（歷史必然性），就算係以公平主義掛帥嘅共產黨，大家都可以睇到，到最後，權力同利益只會因為缺乏競爭者監察或輪換機制，而不斷收窄集中到小部份人手裡。
1991年蘇聯解體，就係因為特權階級膨脹到妨礙國家經濟政治發展；1966年毛澤東發動文化大革命，目標亦都係直指黨內因建國以來不斷膨脹嘅列寧式官僚特權階級同志們；到咗現代中國，更加唔使講，改革開放之後，官僚特權階級以盜賊式資本主義（Robbery Capitalism）寡頭壟斷國內所有經濟利益，其實亦都係今日中國被西方世界視為洪水猛獸嘅理由（之一）。
但係1915年，袁世凱推出洪憲帝制改革國體，目的又係唔係單純為咗自身利益咁簡單呢？袁世凱真係想千秋萬世？我睇未必。我講過，就算唔做皇帝，當時嘅袁世凱已經係中華民國國內擁有最大權力嘅第一人，佢可以輕易解散國會，任意制定法律，亦擁有最強軍事力量北洋集團backup，清洗國民黨之後，佢已經係一個獨裁者，但係將名號由「大總統」變為「皇帝」，動機又係啲乜嘢呢？
以我嘅分析，袁世凱並唔係傻仔，洪憲帝制，本身就係想復興「儒家哲學」呢個意識形態，你睇後嚟佢登基，或之前祭孔祭天，全部都係想行返周禮格局，佢想重新恢復儒家哲學體系嘅正統意識形態位置。1911年辛亥革命後，冇人再相信儒家哲學，忠君愛國嗰套嘢，畀民主自由法統所取代，但係意識形態大轉移，卻製造出驚天亂局，國家進入大分裂狀態，分裂唔緊要，但當時嘅中華民國係世界上一個弱國中嘅弱國，多弱差，人口太多軍力太弱經濟太差，如果再加上分裂，完全被列強瓜分，係遲早嘅事。
皇帝係一個意識形態表象，目的係為咗製造威權，只有威權先可以產生民眾嘅恐懼，而恐懼本身，基本上係國家團結嘅大前題。
放喺當時袁世凱眼前，就係一個國家崩分離析嘅局面。心急推行帝制恢復大一統統一國家，另一個冇乜人留意嘅因素，可能性係第一次世界大戰。
當時一戰打到水深火熱，1915年底歐洲大陸，英國、法國、俄國與德國全程投入戰爭，雙方死傷人數接近300萬，對中華民國嚟講，呢個係一個好時機處理國內亂局，否則英國法國俄國德國將注意力回歸遠東時，弱國中國只有進一步任人魚肉，冇一個獨立主權嘅國家體制，根本亦冇可能同列強周旋談判任何事情。睇返歷史，就一清二楚，自從一戰爆發之後，西方列強的確少咗閒情逸致侵蝕中國利益，只有冇直接派兵參戰嘅日本仔，仲有性趣乘機搶奪東三省（二十一條）。
1915年聖誕節，雲南宣佈獨立脫離袁世凱中央政府，以蔡鍔、唐繼堯為首嘅護國軍向袁世凱宣戰。蔡鍔嘅動機無比高尚，係要反抗袁世凱行帝制獨裁舊路，護國戰爭，所保護嘅係「中華民國」法統，亦即係民主自由議會政制。口號太靚仔，所以一呼百應，除咗護國軍嘅西南軍人，仲有孫文嘅中華革命黨、國民黨嘅溫和派、甚至之前stand by大總統、梁啟超等人嘅進步黨，亦紛紛響應反袁號召，組成聯合戰線，一齊對付袁世凱。
袁世凱決定1916年1月1號舉行登基大典，12月下旬，洪憲皇朝大規模封爵，北洋軍閥集團大批文武官吏均被賜予封賞爵號，其餘每個省份嘅重要領導人物，都一下子成為洪憲皇朝貴族成員，袁世凱依一著為咗籠絡人心，希望有更多人真心支持佢做皇帝，可惜人心不古，重名節多於實利嘅「儒家君子」時代已經過去，血肉森林裡面，名譽唔再重要，身份亦唔再重要。實權，即係錢同軍力先係最重要。儒家哲學本來係一件人皮，用嚟覆蓋野獸成為人類，人皮脫去，其實每一個人都係野獸。
好有可能袁世凱千辛萬苦，就係想當時嘅人穿返番上件人皮做番人類，唔再做野獸你爭我奪。佢自己當然明白呢個道理，因為佢亦都係其中一個。
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-15 10:12:52
【183回：大清亡國關 #鬥爭 蛋牛治】
♉在網絡上看見一首詩，把它抄下，今天真的不想寫什麼……
♊『答我，如果時間真的可以逆行
死去的人是否會在升降機門打開的一刻
向你輕快地打招呼、說早晨
答我，若泥濘太濕、砂石太尖銳
你是否還會被赤足走向
那一無所有的大海，那永遠的黑夜
答我，要敲碎多少塊玻璃才得知真相
要焚燒多少座車站出入口我們才能
稍稍向理想中的世界移近半分
不，不要答我關於烏托邦的一切
我只想你答我死去的是甚麼
而活著的又是甚麼。答我，如果你還願意
讓這一切從頭開始好不好
我們首先把花還原到它們被折的枝上
把斷掉的手足黏合回去他們的軀體
答我，如果這些都永遠無法復原
我們該拿甚麼面對明天。如果死去的
不是一個人，而是一座城市裡
所有的人︰我不是要誰來答我存在的意義
我要的正正就是
那一無所有的大海，那永遠的黑夜
答我以潮浪、答我以漆黑…...
答我』——熒惑2019/10/14 — 19:50
♐沉冤待雪……
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/fcym1yXOl9s
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-16 18:06:29
:^(
【常威近代史】（二百八十回）
袁世凱平反系列
時間去到1916年1月1日，本來元旦日袁世凱正式祭天，登基稱帝，成為中華帝國開國之君。但因時局動盪，決定暫時押後登基大典（儀式嚟啫）。同日，北京環城鐵路通車，整個北京市有鐵路連接，中國歷史進入新紀元。冇人知道如果洪憲帝制行到落去，中國會變成點？大家只係知道帝制失敗，整個國家就進入大分裂時代，之後30幾年，戰禍延綿，死傷無數，就係放喺眼前嘅事實。
你本來搞國慶，人哋同你贈興。1月1號，雲南都督唐繼堯發佈討袁檄文，列出袁世凱19條大罪狀，號召全國人民「翊衛共和，誓除國賊」。唐繼堯誓言維護《中華民國約法》，主要訴求係，取消帝制，重新召開國會，選舉國家新元首，實行民主政治原則，尊重地方議會，促進國家統一，實行聯省自治。一句到尾，要搞美國聯邦制，唔要獨裁。隨後貴州都督、前黔軍領導人劉顯世（1870-1927）響應，脫離中央嘅西南省份增至三個。
袁世凱洪憲帝制，對內唔受歡迎，對外亦都未有國際承認，1月3號，袁世凱下令對外仍稱「民國」，對內則稱「洪憲」。所謂名不正言不順，一定路難行。第一次世界大戰打到如火如荼，歐洲諸國理鳩你死，老西唔表態住，冇參戰嘅強國日本，事前聲明支持袁世凱，首先將你推入火坑，但冇任何實質動作。反而美國駐華公使，積極要求美國聯邦政府承認中華帝國，支持袁世凱統一國家。
如果你細看歷史，你會發現美國人一直好正路，真心想幫中國。更加唔好講之後全力支持蔣氏政權、或二次世界大戰全因為美國嘅原子彈投落廣島長崎而結束。今時今日，中國人民將當日列強施加於中國嘅侵略行為，全數轉嫁俾美國人，其實完全唔公平，係過於簡化嘅愚昧動作。
唯恐天下不亂，想從中撈油水，美國人從未做過。反而日本人就真係仆街，1月15號，日本帝國反檯，宣佈不接待袁世凱政府賀禮贈勛特周自齊，日本內閣並發表聲明，要求袁世凱延遲緩帝，否則出手干預。袁世凱亦深深瞭解，唔平定西南局面，帝制好難上馬。於是，頒佈討伐令，對雲南護國軍正式用兵，發動戰爭平定亂局。
1月中，新華宮（袁世凱大殿）內，設置「臨時軍務署」，袁世凱親自主持佈置三路大軍進兵雲南，希望以北洋系統強大軍事力量，一舉顛壓西南顛覆活動。
三路大軍，分別是由曹錕、張敬堯、李長泰所率45000人，正面進攻四川，作為打擊雲南護國軍嘅主力。
第二路大軍由馬繼曾、范國璋、唐天喜以26000人進攻湘西。
第三路大軍由粵軍龍覲光由廣西打貴州作側擊。三路大軍，動員接近100000人。征滇大軍總司令係曹錕（1862-1938）。
至於敵人護國軍，亦分為三個部份，基本上由兵力約為20000人嘅滇軍基礎上擴充而成，由軍神蔡鍔、李烈鈞、戴戡分統。蔡鍔領軍入四川，迎戰北洋軍主力部隊；戴戡經貴州打湘西；李烈鈞經廣西打廣州。實行實牙實齒，同袁世凱北洋討伐大軍決一死戰！
戰爭未開打之前，純粹以人數同軍事力量比較，北洋軍隊秤高何止一班？但個戰果大家都知道係乜，上一次已經講過，蜀道難，四川易守難攻，北洋軍遠道而嚟進攻，護國軍以守為攻，高下立判，其實係地理問題。
戰爭具體情況，下次再講。但想補充一點，打仗需要龐大金錢，蔡鍔同唐繼堯嘅護國軍，軍費從何而來？歷史記載，當時護國軍嘅軍費，係由廣大酷愛民主自由法統嘅海外華僑同埋四川雲南當地民間商家籌集得嚟。但我個人相信，以蔡鍔嘅濃厚日本背景，又以日本咁X想搞亂局從中撈油水，打仗嘅軍費日本人一定有份資助，當然一切證據一定被抹走，要fact check都無得fact check。
另外一個point，係由網友提供，我純粹發夢。雲南一帶，同越南寮國老撾緬甸泰國柬埔寨邊境接壤，到咗今時今日，雲南嘅毒品交易市場亦係無比龐大。中華民國建立後，袁世凱中央政府已經全面禁煙，即係話本來合法嘅鴉片毒品貿易，變成完全地下化，唔可以大搖大擺由上海廣州等重要商埠合法進口。但係大家可以想像，禁煙令只係行咗兩三年，而當時整個中國四五億人口，大大話話仲有四五千萬人係道友，亦由此可以相信，雲南一帶當時亦有可能已經成為鴉片貿易重鎮，毒品交易牽涉嘅金錢數目非比尋常。雲南護國軍反袁活動，其實背後係咪有大量鴉片貿易嘅黑金支持？當然歷史已經冇辦法冇講比我哋知。
用相同思路，60年代嘅越南戰爭，其實會唔會亦都同毒品貿易有關？有一套電影推薦畀大家睇，2007年，由丹素華盛頓主演《犯罪帝國》（American Gangster），如果裡面描述嘅事情都係真相，咁就真係觸目驚心。
下次繼續護國戰爭！
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-16 18:07:13
:^(
:^(
:^(
以歷史鞭打今天
常公子
2019-10-17 11:08:42
【184回：大清亡國關 #鬥天鬥地 蛋牛治】
♉「與天鬥，其樂無窮﹔與地鬥，其樂無窮﹔與人鬥，其樂無窮。」其實並唔係原文，原文係毛澤東1917年23歲所寫一文《奮斗自勉》中一段：「與天奮鬥，其樂無窮﹔與地奮鬥，其樂無窮﹔與人奮鬥，其樂無窮。」，當時佢勉勵年青自己，唔好因為眼前嘅艱難而放棄理想，要繼續堅定不移奮鬥落去，但原文之後被曲解，變成毛主席偉大嘅鬥爭理論，亦都無可厚非，畢竟「敵我矛盾」、「階級鬥爭」、「反殖反帝」一向都係無堅不摧嘅意識形態利器，過去香港人或者唔明白講緊啲乜嘢，但係今時今日，大家應該一清二楚。
♉尋日林鄭月娥發表施政報告，非常巧妙地偷換概念，將所有民怨問題歸結到「買樓」兩個字上？講真，我係估佢唔到。我原本以為佢哋面對香港1967年以來最大嘅亂局，又假設上層建築認為一切民怨來自居住問題土地問題，佢哋應該喺新一輪施政報告中，加大興建公屋嘅數量同速度，但係佢哋冇咁做，反而集中火力，推出九成按揭屎橋，由政府補貼，資助市民買樓上車，講真，真係冇得頂。
♈冇得頂嘅地方係，第一，「政府鬆手畀你借錢買樓」仲唔係幫你解決居住問題？第二，放寬九成按揭，樓價係短期內一定會只升不跌，亦有可能再創新高，接貨空間又擴闊咗，全港業主仲唔拍爛手掌？第三，林鄭月娥真係好清楚香港人嘅本性，只要一講樓價，即刻就會變成社會焦點。
♏不過核心問題係，「買樓」就能夠解決香港嘅深層次矛盾？如果民怨真的在於居住問題，咁並唔係有冇錢借買樓嘅問題，而係樓價實在太高，高到超出咗一般人嘅負擔能力。而林鄭月娥你提出嘅解決方法，就係借多啲錢畀市民入市？依一招實在太高明，會fake到好多蠢人（香港蠢人有唔少），而且有更多人買樓，背後主宰香港嘅地產霸權一定高興；而且你哋都一定明白，畀層樓同二三十年巨債綁住，年青人就會冇咁大膽上街作反，一來可以順理成章托市，二來可以長遠抑壓減低年青一代抗爭力度，老實講，亦係相當聰明。
♉我亦都清楚明白，原來林鄭月娥同現今香港嘅統治階層，佢哋先係真真正正嘅「托派」，不過個「托」字，並非「托洛斯基」個「托」，而係「托市」個「托」。你哋所做嘅一切，無非都係為咗托市，托住樓價永恆不跌，起碼未派曬手中火棒比中產之前，千祈唔好跌。以下，引用作家楊衛隆先生一段話：
♊「一百年前，即是1919年，全球經歷第一次世界大戰和西班牙流感兩大人類浩劫，經濟開始復興。其後十年，美國經濟起飛，資產價值爆升，資產炒賣令美國債務升得快過經濟發展。十年資產和債務泡沫令到樓價股價無法再升上去。開始出現大規模倒債，銀行開始收緊信貸，股災樓災呼之欲出。可是，政府和富豪不停托市，樓股升不上去又跌不下去。1929年，美國爆發股災樓災，引發全球經濟大蕭條。十年富貴帶來十年貧困，全球經濟陷入大蕭條……2019年的經濟情況和1929年十分相似，甚至可以說一模一樣。香港十年樓泡股泡的紙上富貴只有一個結局……為甚麼人類總要犯上同一錯誤？」
♉香港嘅股市，恒生指數自兩年前開始，已經唔上唔落，徘徊於25000點到28000點之間，因為有人一直大力托住個市，托完股市，今日再托樓市，頂住個樓股泡沫唔肯爆破重新洗牌……如果命運要一個人死，就應該比佢死，所謂一路好走，無謂留戀塵世，殘留執著，況且應死不死的人，現代世界會變喪屍 Zombie，喪屍會咬人，甚至毀滅世界，大家應該都睇過唔少。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/ikX7SXa40Jg
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-18 13:21:09
:^(
【常威近代史】（二百八十一回）
袁世凱平反系列
雲南起義，護國戰爭爆發，袁世凱派遣十萬北洋大軍，兵分三路，圍剿廣西雲南一帶叛軍。本來係強弱懸殊嘅一場戰爭，出現反高潮。北洋軍隊不但無出現預期嘅輕易勝利，而且同敵人拉鋸不下，成為僵持之局。
軍神蔡鍔起朵亦因為呢場護國戰爭，兵又少，彈藥唔夠，補給又唔足，憑著士氣對付敵人進攻，真係唔講得笑。當時蔡鍔所率領嘅護國軍團共分為六個梯隊，總人數只有3130人，吓？而且攜帶嘅軍糧不足兩個月用，但係佢竟然可以同曹錕、張敬堯所率領嘅二萬幾人北洋部隊打成平手，以一敵十，守住雲南不失，咁唔係神？乜嘢係神。
同軍神一齊起朵仲有一個人，當時佢三十歲未足，畢業於「雲南陸軍講武堂」，參加過辛亥革命，佢隸屬蔡鍔護國軍第一軍第三梯團第六支隊任步兵第十團團長，佢虎背熊腰，以勇猛見稱，從2月19號到3月7號，佢率領嘅部隊係棉花坡一帶同北洋軍進行咗16日16夜嘅背水之戰，一戰成名，之後率領部下直插北洋勁旅張敬堯大本營，呢個人叫朱德（1886-1976），佢亦都係後嚟中國共產黨嘅軍事奠基者，中華人民共和國國父，同毛澤東合稱「朱毛」！
講真，其實真係打，北洋軍隊點會打唔贏？人多過你，軍備強過你，錢多過你軍紀好過你，why？西南戰局成為拉鋸局面泥氹狀態，只係北洋軍戰意唔夠，指揮官同士兵大家都唔想跟車太貼，用技術性語言去講，係意識形態灌輸不足。當時打仗打陸軍地面戰，戰意好重要，埋身肉搏，吓吓要攞條命出嚟教飛，一定要有真正嘅信念。人哋有你冇，你咪打唔贏囉。
不過打仗，係敵我雙方為了實踐政治目的嘅最後手段（當時未必係，打仗係一般手段啫），但係一打仗，其實最受苦受難嘅就係無政治立場嘅平民百姓。當時護國戰爭，有人用文字記載咗以下一幕：
「棘為鞭，鉄為鏈，破柴門，行調遣。母伏林頭避，婦驚灶下竄。縛手棄家赴兵站，老者運糧，少者肩彈。肩彈最要速，還糧不妨慢，危岩千尋，狹路如綫……鳥飛絕，人跡亂，君令嚴，誰能怨？夜無住宿，日食餐飯，老男嘔血死，瘦男骨折斷，壯男獨笑言，背地指天嘆：愿娘勿念妻勿戀，今生已矣來生見。」
上述文字，講嘅係農村拉戰伕情況，軍隊去到邊，就喺農村捉人入伍補給兵源，壯大聲勢，唔理你係乜嘢政治立場，農村子弟多數係文盲，冇知識冇文化，亦冇所謂政治立場，拉你入嚟，老嘅負責搬運做咕喱，後生嘅就上前線掘地雷，放響最前排度衝，直接用血肉迎戰對方第一輪火炮。死咗算數，用完即棄，唔使戰爭賠償，唔使負任何責任，反正中國農村就係地大物博、人多勢衆，之後亦會再拉人補充。呢個亦都係中國打仗嘅常態，幾千年傳統，直至蔣介石去到臺灣，對岸中華人民共和國建立，五六十年代解放軍軍制完全確立，軍人進入全職時代，情況先有進一步改善。
1916年1月中開打嘅護國戰爭，的確拖住袁世凱行帝制嘅後腿，所謂風乘火勢，一沉百踩。全國輿論不斷升溫，反對帝制，有陣時輿論嘅嘢，大家都係跟風，風擺邊邊向邊邊，普羅民眾正常生理反應，所以勇武好重要，文宣更重要，意識形態工作必須放喺首位，你唔認同都可以，事實總會講畀你知真相是什麼。名不正則言不順，凡事凡物必須要理念支持，理念可真可假，可虛可實，亦都因時而變，前言可以不對後語，最緊要有實用成份，能夠煽動民心就ok！
袁世凱搞唔掂個局面，西方列強開始縮沙，原本積極支持袁世凱稱帝嘅大英帝國，亦開始轉變態度。現在首先分析一下英國人嘅心理，英國人諗嘢好簡單，就係唔想中國太亂，因為如果亂，就冇生意做，如果亂，日本人就會進一步侵蝕中國，嚴重傷害英國人在華既有利益，所以當初大力支持袁世凱行帝制，就係想中國有一個政治穩定嘅狀態，實用主義者立場，風向邊邊擺邊邊，畢竟英國唔係東華三院，從來唔係開善堂嘅。
袁世凱另一個重要支持者，喺美國。美國人嘅支持態度比英國人更堅實得多，背後出錢出力。袁世凱1月時暫緩帝制，美國人係表示失望嘅，官方辭令係「深表遺憾和惋惜」。
德國人、俄國人同法國人全力打緊第一次世界大戰，所以並無任何實際表態，佢哋口講係支持，不過真正態度係靜觀其變。
袁世凱稱帝成敗，其實關鍵在於日本人。日本仔好仆街，呢一個係無法否定嘅現實，陰陽兩面，一邊做好人，另一邊壞事做盡，係日本人一向嘅做事原則。袁世凱拋出洪憲帝制，起初日本全力支持，但係當帝制上馬，佢哋就立刻改變態度。1915年12月15號，袁世凱接受帝位嘅第四日，日本人就反枱，忽然邀請英、法、德、意、俄五國公使，向袁世凱帝制發出嚴正警告，並表示一旦帝制令中國發生內亂，佢哋會響保護日本權益條件下，主動派兵干涉中國內政。
其實當時，日本對中國嘅影響力已經完全超越其他西方列強，冇日本人say yes，袁世凱稱帝計畫一定會失敗收場，所以當日本人態度轉變，袁世凱唯一可以做嘅就係討好佢哋，上一集，我講過1月中袁世凱派出農商總長周自齊為外交特使，前赴日本，祝賀新日皇123代大正嘉仁天皇加冕大典，其實佢有重要任務在身。
任務係乜？我哋下次再講。
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-18 13:22:57
:^(
:^(
:^(
認識過去 展望未來
Ads
展斌舟
2019-10-18 22:33:15
等文
常公子
2019-10-19 11:45:42
【💣香港關 #中英聯合聲明 腿蛋治 第十三回 七十年代】
♒終於講到麥理浩出場，邁向香港嘅七十年代。七十年代係一個撥亂反正嘅年代，67年暴動，左派聲名掃地，共產主義影響力正式響香港消失，中共嘅極左主義亦無以為繼，美國打越戰打到驚，打到要取消金本位，大家都在積極找尋出路，找尋新發展空間。
♉結果，又係由美國向全地球扔下一個政治大核彈，尼克遜訪問中國，同周恩來機場握手，中美建交。美元取消金本位、中美建交，意味著整個世界嘅經政格局要有翻天覆地嘅巨變，美國由越戰退場，重新起步；中國亦放棄文化大革命極左路線，一步步探討右轉修正主義可能性，美國放棄金本位，美金任印，整個世界同美國水原充足，我好相信當時嘅五角大廈已經諗到拖垮蘇聯嘅方法。
♊中美建交，亦都帶協摯咗香港呢個為處於中國最前線嘅橋頭堡同中共當時向外唯一通風口，麥理浩作為一個遠東專家同埋西方資本主義陣營中一個重要嘅外交官，一定要將七十年代嘅香港搞得好好睇睇，當然佢本身宅心仁厚同有小小傾左亦都好有關係，香港進入70年代，可以講得話係無端端發達，時來運到，要避都無得避，天時地利人和配合之下，終於大放異彩。
♍當然，70年代唔係乜都好，麥理浩嘅「高地價政策」，利用土地收益補貼教育醫療福利開銷，亦埋下咗香港被「樓市」終身捆綁嘅惡毒詛咒。而70年代之後嘅二、三十年，一群因為經濟高速發展、大陸改革開放而肚滿腸肥嘅上岸人士，或者我哋叫暴發戶，亦都徹底改變咗呢個城市嘅面貌，佢哋以為自己好叻，認為自己嗰套好得，佢哋唔慣勞動，亦唔鍾意用腦，因為炒炒賣賣啲錢就可以隨手可得，佢哋唔明白，佢哋嘅財富全因為時勢而來，其實同佢哋嘅能力無關，佢哋亦冇核心信仰，只係凡事向錢看向樓看向股看，終於行到21世紀，香港因為呢班人再無法再嚮前多行一步。
♍依群人嘅出現或者依群人所持嘅意識形態，或多或少亦都同麥理浩爵士十年嘅施政有關，凡事都無完美，凡事有up side，就有down side。
🇬🇧
https://youtu.be/PgMUhokY4Wg
【常公子近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-19 21:42:03
香港人爭取民主自由關你鬼事？人神共憤
:^(
:^(
:^(
DNA出事
:^(
常公子
2019-10-20 10:39:11
Youtuber常公子和你分享香港近代史playlist，認識過去，擁抱未來，愿榮光歸香港人。
#hongkonker
#HongKong
#hongkonghistory
#HongKongHumanRightsandDemocracyAct
https://www.youtube.com/playlist?list=PL0RVUAILQUOumZZXNyEKoZRynMtAuRyuS
常公子
2019-10-21 16:10:38
:^(
【常威近代史】（二百八十二回）
袁世凱平反系列
#大正天皇 嘉仁（1879-1926）係一條真正傻鳩，雄才大略嘅明治生個咁嘅仔，係好陰公，不過偏偏大正年代就係日本最民主嘅年代，個人認為，日本人創富於明治，但真正嘅文化奠基係大正年間，當然開放嘅民主制度，間接造就咗日本走上昭和嘅軍國主義之路，凡事都係雙面刃，有好處亦都一定有壞處，其實世界上嘅事情好多時候都係：「#兩害取其輕」。
你要民主自由？抑或要生活安穩？你要革命？抑或選擇做順民？
有得揀先至係老闆。
袁世凱當時冇得揀，一定要討好日本人先可以將帝制上馬。據説袁世凱特使 #周自齊 本來打算帶齊條件去日本傾偈，條件包括出賣更多東三省土地與鉄路權益予日本人、聘用更多日本顧問及軍事教官、購賣更多軍用物資同商業合作借貸協議等等……只要日本肯簽字，就交換繼續支持帝制。好可惜袁世凱流年不利，中方和日本大隈內閣密談消息外洩，引起俄國同英國不滿，日本為免惹起外交風波，1月15號突然拒絕周自齊到訪。
日本嘅態度亦都正式放棄對袁世凱帝制嘅支持，其實好大鑊，因為袁世凱政府親日勢力根深蒂固，冇日本帝國嘅支持，袁世凱嘅帝制計畫，更加無以為繼。1916年1月19日，日本内閭要求袁世凱暫緩帝制，1月21日袁世凱跪低，外交部通告各國駐華公使，暫緩登基。
上集已經講過，主要係日本人玩死袁世凱，忽然支持忽然唔支持，#吳啟華彈 出彈入，你吹得我脹咩？目的只係得一個，最緊要中國夠「亂」。日本《黑龍會備忘錄》記載咗以下一段説話：
「且現時亦為我日鼓勵革命黨及其它不滿於中政府之人物，在中國起事之良機，現時此等人不能肆志之原因，仍因資本之不足。若帝國政府能利用其資本之不足，假意借款，唆以起事，則中國全國，大亂立見，我日於此，乃可起而干涉並整理之……」（註一）
明白未？一清二楚未？「干涉並整理之」，即趁你亂，就可以叉隻腳入嚟攞著數，所謂外國勢力干預中國內政就係咁解。況且日本嘅中國革命代言人，一早已經存在響日本被供奉養肥緊，邊位？之唔係 #奪命書生 #孫文，日本大隈重信內閣一同袁世凱反枱，就立刻向孫文嘅「#中華革命黨」全力泵水，孫文見水就生，「資本不足」問題解決，立刻橫渡日本海反攻大陸嚕。
有水到係唔同啲，本來聲勢微弱嘅「中華革命黨」，忽然又做革命大佬搞事，革命KOL孫文的確魅力沒法擋。1月22日，《#民國日報》上海創刊，以討袁為主旨，創辦人喺中華革命黨總務部長 #陳其美，呢份報紙之後亦成為國民黨中央機關報。另外中華革命黨亦喺惠州發動農村起義討伐袁世凱，其後被廣東郡王 #龍濟光（1867-1925）部隊擊退。
踏入1916年2月，更加四面楚歌，西南戰爭拉鋸，當時四川將軍 #陳宦（1870-1939）態度瞹眜，更加秘密聯絡 #湯化龍、北洋之狗 #馮國璋 等人，密謀反袁。全國各地，亦有唔同人揸住唔同嘅旗仔話要反帝制，到處都有示威衝突，各有各做，兄弟爬山，局面進一步失控。
2月15號有一件重要事件發生，#儒家哲學 嘅代表人物孔夫子，一向響中國人心目中地位超凡，袁世凱搞帝制，就係想復興儒家禮教傳統搞大一統。一個叫易白沙嘅作者，響《青年雜誌》發表一遍「孔子平議」，為中國之人打開批孔第一步。文章指出中國自漢代罷黜百家、獨尊儒術以來，其實係摧毁緊整個中華民族學術自由，帝王尊孔，只不過為咗極權統治。易白沙稱孔子為「百世之傀儡」、又話佢「重作官，不重謀食」，「孔子尊君權、漫無限制，易演成獨夫專制之弊」。其實又講得冇錯，凡事睇你企喺乜嘢角度去睇。文章講到明「真理以辯論為名，學術由競爭而進」。一方面反袁稱帝，另一方面亦為之後好快會發生嘅「#五四運動」打開批孔大門，依一批，竟然批咗六十年。
只不過孔子係批唔死嘅，70年代大陸「#批林批孔」，戰神 #林彪 被鞭屍，但孔子生命力仍然無比強大，中共21世紀到咗最後搞 #意識形態，對內團結民族主義，對外宣揚國威，卻發現冇嘢好用，亦只能夠喺屎坑度執返孔子儒家哲學上嚟，重新除臭建構重新科水供奉。「#孔子學院」全世界開到成行成市，要宣揚國威，除咗有錢，仲要有一種代表整個民族嘅意識形態世界觀，老實講，中國人亦從來未離開過儒家哲學嘅思想約束，況且儒家哲學強調忠君愛國，君君臣臣父父子子，亦符合習主席復興帝制意識。
2月下旬，日本進一步施壓，表示袁世凱如果唔撤回帝制，就會派兵干預中華帝國內政，並承認 #蔡鍔 #護國軍 為「交戰團體」。同時，日本向孫文借款70萬日元，作為討袁經費，中華革命黨人繼續到處起事，袁世凱腹背受敵，#洪憲帝制 註定胎死腹中……
註一：白蕉，《袁世凱與中華民國》，人文月刊，1936，頁291-292。
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-22 11:22:38
【185回：大清亡國關 #革命文體 蛋牛治】
♉今集youtube，會講講咩係革命文體？無論時代點樣向前行，語言文字始終都係建構我哋意識形態嘅主要工具同媒界，用現代人嘅講法，就係冷氣軍師嘅文宣，就係鍵盤戰士。今個夏天，香港人嘅抗爭運動，文宣佔咗一個好重要嘅位置。
♐革命文體，就係要鼓動抗爭者嘅鬥心同意志。唔需要實際理據，最緊要旗幟鮮明，簡單口號式最好，「光復香港、時代革命」或「以暴制亂」就係最佳例子，至於內容係乜？其實唔係重點。
♑玩革命文體，過去玩得最好嘅係中共，中共利用馬克思主義列寧主義作藍本，重新建構一套新語言解釋中國社會，灌輸幾代中國人意識形態，我諗20世紀之前，冇人知道「無產階級」或「階級鬥爭」係乜？去到1949年之後，整個中國所有人我諗冇人會唔知係乜。文化大革命係革命文體嘅高峰期，「口號式」治國到達人類歷史之究極，但自此之後，革命文體就一落千丈，個人感覺，大概係文革傷人太甚，又由於中共第一號文膽、毛澤東機要秘書陳伯達落馬有關；第二個個人感覺，中共有三份一江山其實係由陳伯達一枝筆打返嚟，信不信由你。（如今後繼無人，情何以堪？）
♑革命文體去到20世紀末期開始式微，似乎大家都再唔相信單純用口號煽動民心依種玩法，人類聰明咗，資訊發達咗，需要有理據support嘅內容，需要FC後先相信。但進入21世紀互聯網時代，情況又好似改變咗，革命文體有死灰復燃之勢？有人話新世代嘅人蠢咗，其實真相係新世代嘅人太聰明，聰明到懂得繞過事實，撇除中間FC繁文縟節，直接了當表述意愿。不過又係，和你飛飛坐埋同你傾，一傾就係20年，其實係玩緊和稀泥，其實係用緊拖字訣，新世代喇，拖字訣？outdate呀！
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/V43IbdiK-VM
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-23 12:58:48
:^(
【常威近代史】（二百八十三回）
袁世凱平反系列
袁世凱帝制腹背受敵，點解你可以做大佬我唔可以？相信係當時好多人（軍閥）嘅想法。
政治紛爭中，社會仍然不斷嚮前行，1916年2月，有件里程碑式嘅事件發生，就係上海成立首間民族資本電器製造廠，始創人叫楊濟川，主要生產電錶，取其「中華民族更新」之意，叫「華生電器製造廠」，當時嚟講係高科技，過咗幾年「華生」甚至出產電風扇，係中國第一種行銷海外嘅電器，做風扇真係會發達，香港代表有劉鑾雄。
一個國家要強大，必須有巨大工業基礎。之前睇過一本書，話畀我知20世紀初期中國人係連生產火柴嘅能力都冇，食大煙都需要點火，1916年中國85%以上嘅火柴由日本入口（註1），單睇呢個數據你就明白當時中華民國有幾撚咁大鑊。香港今日面對嘅問題，就係冇工業，冇能力生產屬於自己品牌嘅產品，所以處處揸頸就命，冇任何談判籌碼。美國特朗普上任之後，就係要將工業回歸美國，南韓經濟嘅強大，亦都係由有自己品牌嘅工業，好似「Samsung」「LG」而開始，而家香港係乜撚嘢都冇，工業冇、高科技冇、淨係食老本炒樓炒股票，未來經濟發展嘅路，本公子一啲都唔樂觀。
日本人反轉豬肚，係洪憲帝制倒臺唯一理由（記住唔關孫文事），3月15號，廣西陸榮廷宣佈獨立，與此同時，袁世凱重臣徐世昌宣佈暫時「退休」，北洋之虎段祺瑞袖手旁觀，北洋集團內部亦都達到共識，3月20號，馮國璋、李純、張勛等五省北洋將軍聯名上書，密電袁世凱要求取消帝制。槍杠子嘩變，袁世凱大勢已去，當中日本人嘅作用有幾大，相信明眼人一睇亦都睇到。
四面楚歌，軍隊唔撐，袁世凱亦明白唔取消帝制，亦無任何出路，於是3月22號，佢召集徐世昌、段祺瑞、黎元洪等人召開緊急會議，決定撤回帝制，並致電護國軍要求停戰議和。由帝制1915年12月12號上馬到1916年3月22號撤回，歷時102日，仲快過林鄭月娥撤回逃犯修訂條例，洪憲帝制壽終正寢，亦成為咗中國歷史上其中一個歷時最短、最冇face嘅專制皇朝，其歷史意義在於，洪憲帝制係中國最後一個帝王國體，袁世凱亦係中國最後一個皇帝。雖然「皇帝」再冇出現，但係之後嘅中國歷史，仍然有人用唔同嘅身份包裝自己成為實君「皇帝」，到今時今日21世紀，個潮流仲未停止過。
袁世凱之後向全國頒佈《撤銷帝制令》，裡面講得好清楚：
「蓋在主張帝制者，本圖鞏固國基，然愛國非其道，轉足以害國；其反對帝制者，亦為發抒政見，然斷不至矯枉過正，危及國家，務各激發天良，捐除意見，同心協力，共濟時艱，使我神州華裔，免同室操戈之禍，化乖戾為祥和。總之，萬方有罪，在予一人！」
佢話行帝制係為咗鞏固根基，出自一片愛國情懷，希望利用帝制團結民心，矯枉過正、同心協力建設國家。既然大家唔贊成，我就化戾氣為祥和，結束帝制，一切責任，由袁世凱自己一個人承擔。無論你點唔鍾意袁世凱都好，佢最後都將一切責任由自己一個人承擔，唔係好似今時今日嘅特區政府，有乜嘢事就千方百計卸膊射波轉移視線借力打力，總之唔撚關我事，我從來冇錯，我只係負責出糧並唔承擔任何政治責任，畀啲咁嘅人領導香港，Hongkong唔死有鬼？
廢除「洪憲」年號，1916年乃是民國五年。但撤回帝制，並唔等於冇咗件事，民眾已經被惹怒，反袁怒潮亦一發不可收拾。3月底，袁世凱試圖希望同各方反對勢力會談，平息亂局，阻止中華民國分裂，但冇任何實制效果。唯一進展係3月31號，蔡鍔同北洋軍宣佈停火，而蔡鍔因為成為第一個出嚟反袁稱帝嘅軍閥，最後以「阻止袁世凱稱帝」勝利者行上歷史舞臺，流芳百世，奪取「軍神」稱號，最重要嘅係佢好快亦會死。
袁世凱做唔成皇帝，但係民間聲音更加要佢落台。帝制撤回，但亂局就繼續……孫文中華革命黨，亦趁你病攞你命，夾著反袁聲勢同日本資金，正式回歸中國大陸，孫文預備再一次收割革命果實。
註1：胡毓鼎，《六七十年來我國外洋火柴進口統計及日本火柴瑞典火柴進口額比較》，《火柴月刊》第25期，1934年9月
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-24 11:07:22
【186回：大清亡國關 #請客食飯 蛋牛治】
♉革命並唔係請客食飯，呢句說話係毛澤東講，意思即係話你知，如果「反抗」到達一個「革命」嘅地步，咁就絕對唔會一個斯文嘅行為，係去到你死我活，無所不用其極打到對方嘅層次，為咗打倒對手，可以不擇手段，甚至背離道德，利用謊言同陰謀、出賣同滲透，總之用盡一切方法，務求得到最後勝利。「革命」的確係要不擇手段，所以一日未有依種覺悟，一日尚未可以發動革命。
♑今時今日，好多人話反共，要反對中國共產黨嘅管治，甚至將中共冠以「赤納粹」嘅名字。但到底，大家反緊嘅係乜嘢呢？打開心窗說亮話，其實大家未必係反緊「共產主義」，因為「資本主義」也不是什麼好東西，似乎令人深痛惡絕嘅並唔係共產主義，而係「官僚主義」，咁官僚主義係啲乜嘢？以下一段王亞南講嘅說話，睇下啱唔啱聽？
♑『官僚政治是一種特權政治，在特權政治下的政治權力，不是被運用來表達人民的意志，圖謀人民的利益，反而是在「國家的」或「國民的」名義下被運用來管制人民、勞役人民，已達成權勢者自私自利的目的。』（註）
♉我諗大概冇錯，大家最憎嘅係「官僚主義」同「特權階級」，而官僚主義同特權階級，亦並非共產主義國家所獨有，大家現在所唾棄嘅係，上層建築利用其政治特權剝削人民勞動人民而自肥，賺到盆滿缽滿後，將資產外移西方自由民主世界，然後舉家移民美加，做個堂堂正正嘅美國人或加拿大人，依種人，先係最令人厭惡嘅物體。
♈當日辛亥革命所推翻嘅，就係嗰批滿清貴族統治集團特權階級；1949年中國共產黨所推翻嘅，亦係一個佢哋口中所講嘅「國民黨貪腐特權階級」。用托洛斯基嘅講法，推翻一個特權階級後，亦都意味著係另一個特權階級嘅誕生，歷史已經講咗畀我哋知，呢個惡毒嘅循環的確係存在。
註：王亞南，《中國官僚政治研究》，中國社會科學出版社，1981年，頁190。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/Gfu-2uBhVHc
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2019-10-25 20:24:12
:^(
【常威近代史】（二百八十四回）
袁世凱平反系列
敵疲我打，敵退我追。
雖然袁世凱已經表示取消帝制，全國反袁浪潮不但沒有退減跡象，而且逐步昇溫，革命KOL孫文「中華革命黨」，挾著聲勢同日本資金回歸大陸，矛頭直指袁世凱，相同一套套路，希望在亂局中再一次收割革命果實。
孫文嘅威力，在於海外華僑輿論勢力，一吹雞一呼百應，海外華僑富商紛紛發出通電聲討袁世凱，「撲殺此獠，以絕亂種」喺當時所用嘅口號，你話係咪憎到佢入骨。1916年3月尾，孫中山發表討袁宣言，號召全國人民「除惡務盡」，堅定地表示「保持民國，不徒以去袁為畢事」、「決不肯使謀危民國者復生於國內」……慷慨激昂，攞住法統大義，打擊已經宣佈徹回帝制嘅袁世凱，佢當時大約唔記得佢成立嘅「中華革命黨」其實都係一個獨裁政黨。
中華革命黨有日本資金幫手，趁住亂局，紛紛在中國各省各地成立革命武裝組織，當中不得不提，陳世美頭馬蔣介石先生，響4月16日率領革命黨人佔領江陰一帶，並發表《江陰獨立宣言》，依一次係蔣先生第一次單獨起朵，從此以後，佢以革命者同軍人嘅身份，切入中國歷史，翻雲覆雨，主宰天下近30年。
1916年4月，南方情況進一步失控，廣東龍濟光被逼宣布獨立出北京中央政府，北洋軍事系統開始全面瓦解，北京出現軍隊嘩變事件，南方馮玉祥同蔡鍔共謀，企圖推倒袁世凱，擁護北洋之犬馮國璋取代袁世凱做大總統；4月12號，富裕省份浙江省宣佈獨立。嚟到呢度，南方嘅重要省份差唔多全部宣佈獨立，其中包括廣東、廣西、雲南、四川、浙江、江西六省，袁世凱全無還手之力。4月18號，唐繼堯、劉顯世、陸榮延等省領導者，發表聯合公告，指出袁世凱已經喪失大總統資格，應該由副總統黎元洪繼任。
四面楚歌，袁世凱衰到咁嘅局面，最大嘅理由係北洋軍隊再唔全力支持佢，所以政治人物，一定會死攬警察同軍人，否則軍隊嘩變，就會一鋪清袋。響宣佈要玩帝制開始，手下第一猛將段祺瑞第一個割蓆，去到後期加埋馮國璋都割，北洋三傑兩件割蓆？玩條毛咩？而且1916年，中央政府亦陷入財政困境，之前嘅「善後大借款」統統洗曬（或者袋曬），最大開銷嚟自軍費同打仗，根據1916年嘅中央政府財政收入報告，軍隊嘅開支佔咗總開支三份一。
國家經濟亦未有好轉跡象，另一堆數據講畀大家知，1912年辛亥革命後，全國各種工業嘅職工總數係661,784人，但去到1915年，反而減退到619,729人。農戶總數1914年頭係59,402,315戶，1915年遞減至46,776,256戶，因為戰亂，冇咗成1000萬戶農民生產，農民唔耕田做乜？應該係加入軍隊做戰伕或者當兵嘞。商業凋零，荒地處處，上述的數字未必係精確，但係反映出中華民國陷入分裂狀態中，的確係冇辦法調配資源、發展經濟，改善人民生活，就係真嘅。
帝制結束後，袁世凱政府繼續向外國人借錢維持中央政府生命，其實大勢已去。個人相信，袁世凱眾叛親離仲有一個重要理由，就係佢嘅健康問題，個幾月後6月6號佢就會死，歷史上死因係「暴斃」，即係忽然間死咗，不過袁世凱健康急劇退化，應該佢身邊嘅人都知，所以大家都鋪定後路等佢歸天。我亦講過，袁世凱不合理地將洪憲帝制加速上馬，相信佢係知道自己事日無多，想用生命餘下嘅時間完成大一統事業，為國家民族盡最後一分力。
好似前滿清政府重要官員肅親王善耆，就積極組建「勤王軍」，串連北洋軍中張勛、宗社黨人，預備發動武裝叛亂，打算成立「滿蒙王國」，復興滿清。提一提大家，勤王軍軍費開銷，係善耆班滿蒙貴族以滿州蒙古嘅領地作為擔保，向日本大財閥大倉喜八郎借款100萬日元開始經營，簡單啲講，又係日本人背後出錢。
四月尾，袁世凱只得番一個月命，早行佢一步嘅，係亞洲電視盛宣懷先生（1844-1916），呢位晚清重要經濟系官員，一手帶出保路運動，斷送大清江山。由佢簽名打玉璽，向美國人銷售嘅鐵路融資債券，今時今日大家都可以見到，即所謂Donald Trump最後秘密武器。滿清倒臺後，民國成立，佢曾經成為通緝犯，之後潛逃日本洗底，1912年袁世凱當政後回國，任職中國最大華資企業「漢冶萍公司」董事長，晚年無憂，繼續響上海過住有錢人生活，直至1916年4月27號病逝，終年72歲。
4月之後就係5月，袁世凱生命最後倒數……
:^(
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2019-10-25 20:26:19
:^(
Ads
常公子
2019-10-26 11:35:34
【💣香港關 #中英聯合聲明 腿蛋治 第十四回 麥理浩的政改】
♒麥理浩爵士喺70年代喺香港開展嘅政改方案，的確係將民主選舉嘅概念帶畀香港人，喺70年代之前，香港人對政治極端冷感，血腥嘅一場六七暴動，其實進一步削弱香港人對中華人民共和國嘅認同感同信任度，當時嚟講，香港人嘅自我身份認同出現咗危機，因為一直落嚟，寄居於香港嘅人，佢哋大部分都視中國為故鄉，香港只係一個避難嘅避風港。
♊既然唔想做中國人，咁又可以做乜嘢人呢？70年代正正係一個轉捩點，亦係「香港人」呢個新生族群真正誕生嘅年代，新一代嘅香港人，並唔認同佢哋係百份百中國人嘅身份，更加唔奢求成為一個英國人（二等公民BNO就有份），比上不足，比下有餘，就做個自由香港人喇。呢個係當時好多人嘅想法，港督麥理浩捉住呢個point，大刀闊斧進行各項改革，終於成功將個真正嘅「香港」打造出嚟，其實麥理浩，係一個真正嘅政界絕世高手。
♐對於中國總有一日要收返香港嘅事實，我相信70年代嘅麥理浩亦都唔會唔知道，不過當時嘅中國正處於文革嘅後期，社會動盪，下一步係點走就連中國人自己都唔知道。我亦唔反對一個講法，如果唔係1979年政治強人鄧小平成功向華國鋒奪權，行改革開放。大英帝國可能會長期管治香港，或者用政治手段最後據為己有都唔係一件奇事。不過現實係，麥理浩離任前始終搵到答案，就係中國一定會回收香港主權。
♐最後，我本【東方維多利亞女王之死】，即係我嘅「常威近代史」第三部實體書已經出版，請大家支持我，到書局買一本睇，順手買多幾本送贈親朋戚友，當課金畀我繼續我嘅「廣東話近代史寫作計劃」，這是一場漫長嘅戰鬥同試煉，響捍衛香港人母語大戰場上，我需要更多的戰友和支援，謝謝大家。
🇬🇧
https://youtu.be/1KH3FM5ojds
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
撚樣小菜
2019-10-26 11:37:12
你也配食麵？
:^(
:^(
:^(
常公子
2019-10-28 19:00:54
:^(
【常威近代史】（二百八十五回）
袁世凱平反系列
當袁世凱於1916年3月29號於總統府內焚燒842件帝制公文，企圖毀屍滅跡，避免有人秋後算賬，到底佢個心喺度諗緊啲乜嘢呢？3日前，3月26號，英國殖民地香港尖沙咀火車站大鐘樓正式啟用，從此成為咗香港嘅地標，象徵住呢個殖民地都市邁向日後欣欣向榮發展之路，直至今日。點解紅鬚綠眼做得到？中國人又做唔到？
當時嘅袁世凱會諗，滿清王朝已經被推翻，中華民國建立咗起嚟，最初兩三年自由民主法制搞到一鑊泡，國家仍然唔團結，到處軍閥割據，經濟冇辦法發展起嚟，人民自然生活得唔開心，滿肚怨言，而且中國喺外國列強面前，依然非常軟弱，日本人予取予攜，21條只係餐前美酒，早晚會吞併中國。
作為一個對中國人民有承擔、生平算係重情重義、想法合理嘅政治家袁世凱，佢當時嘅想法，就係覺得中華民國營養不良、中華不能雄立於宇宙間，係因為少咗一樣嘢，嗰樣嘢叫「#皇帝」。
類似嘅想法，其實同今日中國領導人 #習近平 先生一樣，面對整個國家山頭主義林立，經濟軍閥割據一方，表面上黨嘅領導操縱一切，但內裡危機四伏，明爭暗鬥，貪汙舞弊，吃裡扒外，國家資源被不斷瓜分，朝國外散貨。習近平上臺嘅時候，佢採用嘅解決方法係增強中央集權嘅能力，要將下放予地方嘅權力收歸中央管轄，而在最頂端上層建築裡面，佢亦唔希望所謂 #中央政治局 嘅「#集體領導」左右佢嘅深化改革，矮化其他常委，製造一人獨大局面，目的大概都係想改革貫徹始終執行，當然能否成事，係另一個問題，亦係能力問題。
勇往直前未必一定有成果，你發現國家有弊病，希望以大改革形式修補漏洞，有時候會造成反效果。如果冇 #光緒皇帝 1898年 #百日維新，我差唔多可以肯定大清國祚可以超過1911年；冇/#戈爾巴喬夫 嘅改革與新思維，蘇聯應該唔會響1991年無聲解體；要數中國歷史風雲人物，不得不題煤山上吊嘅崇禎皇帝 #朱由檢（1611-1644），佢亦都係一個有作為嘅深度改革者。
咁問題究竟出現係邊度？任由佢腐爛落去？抑或係大刀闊斧進行改革？即西方國家所謂「震盪療法」，年紀有返咁上下都會明白，做化療，一係好返，一係就會加速玩完。不過與其都係要死，做化療可能係一個比較理智嘅選擇。
踏入五月天，袁世凱眾叛親離，中華民國崩分離析，佢嘅健康情況進一步惡化，失勢嘅洪憲大帝身邊嘅人都靜靜等緊大變局出現。5月8號，南方雲南、貴州、廣東、廣西護國軍響廣東肇慶成立軍務院，作為各省護國軍統一指揮機構，分裂勢力更加強大。四省軍務院以 #唐繼堯（1883-1927）、#岑春煊（1861-1933）為首，二五仔 #梁啟超 為政務委員長，桂系 #陸榮廷（1859-1928）、#蔡鍔（1882-1916）、#李烈均（1882-1946）、#龍濟光（1867-1925）、#劉顯世（1870-1927）、#陳炳焜（1868-1927）等軍事力量連成一線，不承認袁世凱為大總統，要求副總統 #黎元洪（1864-1928）代替袁世凱成為中華民國最高領袖。
屋漏兼逢夜雨，5月12號，北京政府國務卿 #段祺瑞（1865-1936）下令，中國銀行及交通銀行紙幣及應付款項停止兌現付現，即係銀行現金不足，經濟崩盤。
其實袁世凱執政之後，除咗向西方列強借錢維持政府開資，仲有一招套現，就係通過中國同交通銀行發行大量公債及紙幣，以維持財政同埋軍費開支（簡單啲講，即係印銀紙量化寬鬆）。去到1916年，單單係中國銀行負債已經高達1.2億，而本金僅有600萬元，做緊20倍槓杆，交通銀行墊支畀政府嘅金額亦達到3000萬以上。加上5月南方護國軍佔領省份，宣佈不承認袁世凱政府發行嘅公債同紙幣，所有民眾紛紛攜帶公債紙幣到銀行兌換現洋（即係將袁世凱發行嘅紙幣換返做大洋或其他外幣），但有撚錢兌現咩？中國銀行同交通銀行面臨倒閉危機，所以北京政府只好強行停止兌現。
事情好簡單，之後就係袁大頭紙幣債卷大貶值，民間財富急速蒸發，米價大漲，天下大亂，邊個話政治同經濟無關？行到嚟呢度，袁世凱氣數已盡，唔死都冇用。
上集結尾，有一個偉人歸天，佢叫亞洲電視 #盛宣懷。今集結尾，同樣有另一個偉人歸天，佢係 #陳其美（1817-1916），孫文手下第一猛將，孫文口中「革命首功之人」，亦係革命黨中真正嘅軍事領袖，佢嘅背景相信唔使我多講，黑底出身，但生平勇武、意志堅定，為中國革命出錢出力。護國軍戰爭開始後，佢跟隨孫文 #中華革命黨 回歸大陸，打算喺佢大本營上海江浙一帶圖謀起事，但財力不足，軍閥 #馮國璋 得悉，趁機收埋張宗昌部下許國霖等，偽稱有一煤礦公司愿贊助革命軍起事經費，5月18號下午，陳其美赴約打算簽訂合同，兩名歹徒突然闖入，用手槍向陳其美頭部射擊多槍，結束咗佢38歲嘅革命人生……
陳其美死後，佢嘅一切革命遺產由佢手下第一號頭馬承繼，佢隻頭馬叫 #蔣介石，大佬留下嘅第一桶革命黃金，亦喺佢手上發光發熱，其後成功主板上市，雄霸天下。
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-10-29 10:12:38
【187回：大清亡國關 #美好世界 蛋牛治】
♉今集youtube中，講咗個故事，就係眼前有座山，人們總係覺得山後面有更美好嘅事物同更美麗嘅世界，於是千辛萬苦跨越眼前呢個山，但去到山頭，睇唔到美好嘅新世界，只係睇到另一個山，於是人們繼續想攀越眼前另一個山……
♉今個夏天，毫無疑問香港已經攀過咗一個大山，整個社會亦都出現咗巨大嘅變化，未來亦冇可能返轉頭。最近社會上開始有人問「然後點？」，香港下一步應該點樣走？中國對香港又會採取乜嘢態度呢？最後係喜劇定係悲劇收場？我唔知道，要翻越下一個山，先有答案。
♑好多人懷念逆權運動未發生之前嘅香港，或者佢哋口裏面稱呼嘅「安定繁榮」、「平穩社會」……但係我想問，之前又有幾好呢？樓價飆升到兩萬蚊一尺，完全脫離香港一般中產階級嘅收入水平，薪金無上昇，如果冇老豆照住，做醫生律師都買唔起樓……做生意嘅環境好好？啲鋪租同成本貴到仆街，我就未見過最近幾年有人創業成功，反而仆街就大把，個個返工做到隻狗咁，後生仔又睇唔到未來。又係嗰一句，如果個社會之前真係咁美好，點解會有人咁憤怒？
♎然後點？其實從來冇「然後」，人生在世就係「活在當下」，所謂政治，亦都係傳因爲要解決眼前問題，連眼前問題都未解決到，要去講十年後二十年後要發生乜嘢事情？其實純粹鳩吹。畀個希望你，只係要你活得心安理得，正如五十年不變港人治港高度自治，亦祇不過係97年回歸時解決眼前問題嘅口號，短短20年，所有嘅說話同承諾已經淪為空談，下一個20年，根本冇人會知道發生乜嘢事？既然問題已經發生咗，就想辦法去解決。然後可以點？係以後嘅事情……
♊如果香港嘅城市真係有其存在價值，如果香港人真係有能力，根本乜嘢都唔使怕，香港人一直適應能力極強，兵來將擋，水來土掩，其實未驚過，況且整個世界已經開始沸騰，銀紙已經印得太多太多，新一輪全世界資產泡沫爆破，差唔多已經成為定局，唯有平常心面對，畢竟亦唔係小行星撞落地球，將要發生嘅事情，只係純粹永劫回歸……
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/jEBBOW-rbRg
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
上一頁
第 4 頁
下一頁
【常威近代史】（二百七十七回）
袁世凱平反系列
醜婦終須見家翁，中國最後一個皇帝袁世凱粉墨登場，以極度樣衰姿態為整個中國帝制冚上棺材板，袁世凱其實係公子獻頭！告誡中國人民千萬別回頭恢復帝制！
1915年12月11號，上午北京參議院舉行「國體投票」總開票，全國各省1993人，以100%全票通過改變國體，恢復帝制，行君主立憲，之後全體參議員上書袁世凱，曰：
「恭戴今大總統袁世凱為中華帝國皇帝，並以國家最上完全主權奉之於皇帝，奉天見極，傳之萬世。」
哇！民意要你做皇帝喎！袁世凱第一個反應係假意推辭，參議院再三極力推戴，最後袁世凱「只好俯就民意」。上述大戲，每一次改朝換代都會做一次，新皇帝總會推三推四，擺出個姿態，係自己被逼做皇帝，自己根本唔X想，中國人就係咁X老土，DNA問題來的。
12月12號，一切準備就緒，連響北京紫禁城裡面嘅清室，都預先被收賣發聲明擁護袁世凱做皇帝，袁世凱通電全國，正式宣佈接受帝位，由1911年建立嘅「中華民國」，亦正式改名叫「中華帝國」！宣傳文件上，並宣稱袁世凱有六功，分別為「經武」、「匡國」、「開化」、「靖難」、「定亂」、「交鄰」，並將自己過去宣誓共和，解釋為「民國元首循例之詞」，同「就職儀文之一」，現在「國體已變，民國元首之地位，已不復保存，民國元首之誓詞，當然消滅」。中國人民自由民主法統之路，行咗未夠五年，宣佈暫時收皮。（其實個人感覺，係徹底收皮，收到今日。）
12月13號，袁世凱響中南海居仁堂接受文武百官朝賀，正式稱帝，換上皇帝裝束，接見文武百官。佢亦唔叫自己做「大總統」，叫做「大皇帝陛下」，所有官員，改稱為「臣」。總統府改名新華宮，並決定由1916年起，廢除民國年號，改為「洪憲元年」。並設立「帝祭大典籌備處」，籌辦1916年元旦1月1號嘅登基大典，趕製御座、龍袍、玉璽、金印，撥款2000萬元大洋，極盡奢華之能事，要做場大Show沖喜吓佢。
同日宣佈，下令從周禮天官成法，發思古之幽情，新皇宮內，廢除太監制度，改用女宮。女宮亦有嚴格詳細嘅招選章程，必須身家清白，品性純良，14歲以上，25歲以下，略具姿色，體質健全，冇暗病花柳，未婚，未訂婚，要未生個仔，唔煙唔酒唔賭，你老母，你家陣係咪tvb選香港小姐啫？
袁世凱倉猝行返帝制，其實係想復興儒家哲學，係派出一個「-ism」嚟平反全國亂局，係行「緊急法」，希望中國有一個新嘅開始。
辛亥革命之後，前後五年，中華民國大力引入西方自由民主法統思想，傳統儒家哲學被徹底揚棄，但得到嘅結果係啲乜嘢？戰亂頻生，整個國家崩分離析，要搞民主，就大家都有平等權利，有咗呢個口實，大一統冇可能，各自為政亦係理所當然，因為當時嘅人，覺得咁樣先係「民主」，覺得咁樣先係「自由」...
坊間有傳聞，話袁世凱想做皇帝，係畀個仔袁克定呃鳩佢，又話袁克定日日只會俾袁世凱睇指定嘅報紙，等佢以為全國人民都擁戴佢做皇帝，對於呢一類傳聞，我常公子一概否定，打死都唔信。以袁世凱嘅能力同智慧，佢根本將一切事情操縱喺手上面，虎父犬子，袁克定嘅層次同老竇仲差好遠。
而且重申一點，所謂「皇帝」其實只係名相，權力不在乎名相，權力只在乎實質。要行駛皇帝權力，未必一定要用「皇帝」個名。中國近代史上，就有好多人以其他名相行駛緊等同皇帝嘅權力，例如用「主席」、「總理」、「司令」、「國家領導人」或「軍委會主席」，我甚至乎相信，有從來未響歷史上面出現過嘅名字，可能先係真正嘅幕後玩家。如果你問帝制本身有乜嘢實質意義？我就會答你，唯一優勢，就係「血統承繼」論，自己做完可以傳位比個仔，內裡省卻嘅係血腥無比嘅最高權力競爭遊戲。
上世紀90年代，以平民百姓身份嘅中國總結界師鄧小平，就隔代欽點之後嘅中國領導人，先有江澤民，後有胡錦濤，一切依從鄧小平嘅劇本行開放改革，好可惜，鄧小平亦唔係上帝，隻手冇辦法伸得更遠，佢冇辦法欽點到30年後嘅第三代領導人，結果今日，果然出事。
用現代人嘅眼光去睇，袁世凱稱帝無疑係極度戇鳩嘅行為。因為當時嘅袁世凱已經將權力集中於自己手上，何必要玩帝制將自己推入絕路？「大總統」同「陛下」其實一啲分別都冇，但係睇返轉頭，佢玩洪憲帝制，其實係冇辦法之中嘅辦法，袁世凱亦好有可能，係當時少數注意到「意識形態」問題嘅政客。要實現國家統一，必須先行意識形態統一，而復興帝制，其實就係一個統一國民意識形態嘅問題。
而且當時國際大弱國中國要強大起來，必須有一個高度統一嘅政治環境，否則分裂狀態延續，只會比外敵有機可乘，例如日本俄國，佢哋無時無刻想瓜分中國，洪憲帝制失敗之後，所有嘅事情亦都變成現實，之後天地大亂，戰禍延綿三十年，生靈塗炭，其實怪得邊個？
第一個衝出嚟反對袁世凱嘅人，叫蔡鍔！下次講佢！護國戰爭！
#常威 #斷送共和關袁世凱蛋牛治 #袁世凱 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151