♉好多時候民意調查都會補充一句,我哋係隨機抽樣,以增加民調公信力——but人講你就信,千祈唔好。香港近幾年仲有發表所謂電視收視調查報告,傳統大臺收視仍然相當高企,有成20-30點,成日話晚上仲有百幾萬人乖乖地坐響屋企睇大臺,大家應該心知肚明真相係乜?所謂收視報告係用電話隨機抽樣調查咁話,l am so sorry,本公子響香港活咗40幾年,就從來未收到一個電話訪問我睇邊個電視臺?反而銀行叫我借錢嘅電話就每日收到兩個或以上。大臺收視高企,因爲要同廣告客戶交待,否則冇人睇,邊個仲會洗錢落廣告?情況不單止發生喺大臺身上,所有傳統媒體包括電臺報紙雜誌一樣用類似方法……
【常威近代史】(四百零四回)
大軍閥都要計成本效益銷售策略
成日話人許冠文大軍閥,鹹濕猥瑣血腥殘酷不知所謂,咁究竟乜嘢係軍閥呀?其實響20世紀初期嘅中華民國,軍閥即係「分離主義者」,佢哋唔百份百認同中央政府(或其他自稱合法政權)嘅合法性,或者覺得唯一嘅合法性喺自己手裏面,佢哋唔想俾中央管實,當時北京中央亦都唔夠錢唔夠兵、或者隻手唔夠長管佢哋。結果佢哋喺自己嘅小小根據地上插支旗仔,就可以為所欲為,喺中華民國國境內建立自己話事嘅獨立國家,佢哋有好多並唔想大一統發生,甚至唔想統領全國,只係想割地稱王,獨自經營自己一個小小嘅國家。
作為一個民國大軍閥,必須擁有一支自己嘅武裝力量(否則乜都唔使講),依一支由自己話事及供養嘅私人軍隊,就係軍閥政權合法性嘅唯一依據,去到1920年,中國大部份嘅軍閥仍然未聰明到懂得利用「意識形態」取代「報酬」經營軍隊;識得咁做嘅就即係慳咗好多錢,結果識做嗰批成為咗後嚟嘅勝利者,到頭來又係經濟問題。
咪以為擁有一股武裝力量好容易?吹雞數人頭唔難(登報紙請人去農村拉壯丁啫,有水或有槍就work),但之後控制管理先係難,因為壯丁入伍後就自己有槍,你再唔可以用槍凶佢哋或唔出糧比佢哋,否則就會一鑊熟。
因此,首先你必須要有足夠嘅金錢同糧餉供養軍隊,當時軍人多數來自低下階層窮人子弟,難道你以為有錢人會當兵揾命博?會有日本少女因為興趣自愿拍AV?everybody認錢唔認人。大家當份工咁打啫,對家人工高過,即刻就會跳槽(叛變、變節、嘩變),因此民國初年,好多軍閥為咗維持自己支私人軍隊,要不斷撲水,或者要喺佔領嘅地區抽重稅、甚至巧取豪奪民脂民膏,用作供養軍隊,成日勒索平民百姓抽乾水塘,形象當然插水,理所當然。
而且民國時代隨住軍閥數目增加,經營環境越來越惡劣,想再玩落去?手上嘅武裝力量要不斷擴充同增強軍備,對士兵嘅待遇亦需要不斷提高,放是成本愈來愈大,剝削平民百姓嘅深度亦愈嚟愈深,民眾對軍閥嘅形象亦愈嚟愈惡劣,造成惡性循環,製造永劫回歸。
但,士兵上戰場打仗,唔為錢唔為開飯可以為啲乜?有!可以為「意識形態」打仗,為平等公義自由法統固然可以、為復僻大清江山重奪聖名亦可以、為聽從天皇旨意捐棄生命實踐軍人忠義亦可以……總之理由同意識形態可以林林總總,世界上有好多「-ism」任你揀,揀啱咗,班士兵又buy,咁就可以出少啲糧,甚至唔駛出糧上戰場都滯,慳出嚟嘅軍費,可以再招募多啲士兵同繼續宣傳意識形態工作,條數就係咁樣計,到頭來都係一盤生意,做生意必須計算成本,成本效益最大者,就最有機會得到最後勝利。