19世紀美國並無採用殖民地嘅方式拓展國力,一來佢並非行君主制,本來就冇「國王直轄殖民地」依個概念;二來,美國對其他地區嘅侵略行徑,都係採用一個「killing you softly」迂迴策略,往往直接軍事行動介入之後,首先佢會響當地建立一個親美政權,然後使用同化手段,最後要當地人民順從美國嘅價值觀同民主理念,從而follow佢,成為佢從屬嘅一員。二次世界大戰後嘅英帝國,喺處理殖民地殘留嘅問題上都參考咗美國嘅模式,於是有咗所謂「英聯邦體制」(Common Wealth System)。
♈當領導人當行政長官,除咗要有辦事能力同埋行政手腕,仲要一定嘅風度,所謂海量汪涵,心胸要廣闊,就算要打交,打完就算,要忘記仇恨唔可以秋後算賬。你睇吓今時今日嘅林鄭月娥,出親嚟一面晦氣,心底裡仇視香港人,吓吓對著幹,點解啫?心胸狹窄兼且記仇囉,覺得2019年下半年發生嘅事係香港人對佢唔住,令佢難受,giving her the bad name……從來唔會檢討吓自己,你做得好,就會有人讚同有人擁護;你做得唔好,就算藍絲都唔buy你。好心你落台,搵第二個試吓,無謂大家一齊磨爛蓆,攬住一齊死。
【常威近代史】(三百三十回)
大軍閥平反系列
1919年1月,由美國、英國、法國、意大利、日本五大強國發起主持喺法國巴黎梵爾賽宮舉行嘅和平會議,中國作為協約國嘅成員國,亦都被邀請派出代表出席巴黎和會。
有需要澄清一點,其實巴黎和會開咗整接近一年,由於參加人數同埋代表太多,要處理嘅事務亦都太多,到1920年1月21號先正式結束,中間經歷咗好多事,亦都牽引到中國嘅政局發展,尤其是喺巴黎和會去到中段時候,中國就爆發咗一場轟轟烈烈嘅五四愛國運動。
喺巴黎和會響朵嘅,有中國嘅著名外交家顧維鈞(1888-1985,相當長命),佢喺會上努力捍衛中國嘅利益同民族尊嚴,贏得當時同埋後世人景仰同尊重。
響第一次世界大戰中迅速增強自身國力嘅美國,積極喺戰後確立自己取代大英帝國、步上世界主導者嘅地位,當時嘅美國28任總統威爾遜(Thomas Woodrow Wilson, 1856-1924)提出一系列戰後國際關係秩序嘅構想,即係成立「國際聯盟」,亦即係後來「聯合國」嘅框架同前身,佢希望成立一個有廣泛認同性嘅國際性組織,用嚟處理以及調解國家與國家之間嘅糾紛,從而達到和平,減少戰爭發生。無疑,美國嘅構想係一番善意,亦都非常合情合理(左膠角度),做唔做到係另一回事,凡事動機出於美好,都係值得欣賞。
用咁嘅思路,列寧同托洛斯基建立嘅共產主義政權,捍衛勞工階層同無產階級利益,都係值得欣賞,係人類文明嘅進步表象。點解成日強調「毋忘初心」?因為其實好多事情一開始都係美好同高尚嘅,只係後來變了質,共產主義係其中一樣,香港嘅逆權運動都係一樣,由和平示威變成對抗警暴,我都可以接受,但「獅鳥」卻係變質行為。毋忘初心,我哋香港人反抗嘅,係極權統治白色恐怖謊言制度,某程度上亦係政治暴力,如果用「暴力」反抗「暴力」,用「謊言」對付「謊言」,只恐怕有一日,彼此只會淪落成為同一種事物:「暴君體制」,貪求一時之快,失去道德高地同行動高尚性,或者傷害自身良知同修養,係得不償失。
大家要記住,如果我哋會贏,我哋贏係贏個人道德修養,係贏信仰和平理性普世價值,係贏對美好事物具有美感嘅欣賞能力,係贏內涵意志同價值觀。切記。
早響第一次世界大戰結束之前,美國總統威爾遜就停戰協議以及戰後和平保障問題,發表咗著名嘅《十四條宣言》,當中曾經咁樣講過:
「公開之和平條約,以公開之方法決定之,此後無論何事,不得私結國際之盟約,凡外交事項,均需開誠佈公執之,不得秘密從事。」另外亦都提及:「確定約章,組織國際聯合會,其宗旨為各國交互保障其政治自由及土地管轄權,國無大小,一律享同等之權利。」