大清亡國關慈禧蛋牛治 2
上一頁
第 10 頁
下一頁
常公子
2020-1-25 10:54:14
【常公子歷史頻道217回：大清亡國關 #HeHe 蛋牛治】
♉今日係大年初一，恭喜發財，我祝大家身體健康，萬事勝意，天地有正氣，好人一生平安！
♑新沙士蔓延全球，「世界命運共同體」成形，原來武漢有間病毒研究所，距離病發源頭華南海鮮市場只有二十公里，彼此有冇關係？黨冇話畀我哋知，我個人相信黨，相信中國政府，一定會幫助大家逃過難關，做人要對領導有信心，領導比我們強，比我們有智慧（否則他又怎能夠當上領導呢？），當然可以將所有事情處理得非常恰當。
♍林鄭月娥剛剛返港，好快就處理香港抗疫事務，香港市民有福氣，能夠被一如林鄭般如此優秀的傑出領導人才帶領下行到今時今日，今年庚子鼠年，必定會百尺竿頭，同特首一齊攜手向上，直至行上天臺，傲視衆生，一覧無遺。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/tDmXGDGoABg
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
Ads
常公子
2020-1-27 00:47:20
:^(
【常威近代史】（三百二十四回）
大軍閥平反系列
從段祺瑞、徐樹增埪制嘅貪污腐敗嘅「安福國會」出現，到上節講過嘅「天津狩捕叫雞國會議員」事件，都可以反映出當時嘅北京政府國會，政客腐敗嘅本質，其實呢班政客，全部都係由滿清皇朝過渡到民國，內裡有前朝官員、知識分子、老闆股東、大學教授同革命英雄，全部係社會上嘅精英分子（起碼識字），或叫做社會賢達，任何一個社會都需要呢班社會賢達做樁腳，去維持政權穩定性同合理性。
香港亦都唔例外，其實所謂精英階層社會賢達，通通都係既得利益者，代表住整個社會上唔同利益版塊或佢哋幕後金主嘅利益而從政。有時候，一個社會嘅墮落同貪腐，往往就由呢班社會賢達一手造成。其實佢哋以「政客」作為職業，性格「仆街」亦都無可厚非，因為「仆街」本來就係政客嘅本質之一，世界上冇唔仆街嘅政客，亦冇唔同客人上床嘅雞，問題只係價錢問題，錢唔夠咪齋打飛機囉。
滿清王朝嘅中國，係一個以儒家哲學禮教系統運行嘅古老帝國，雖然儒家哲學係條又臭又殘嘅阿婆紮腳布，但係儒家哲學傳統嘅道德枷鎖，或者讀書人仕大夫嘅懶高尚情操，唔多唔少仲能夠做成小小「狗鍊效果」，即係話隻衰狗仲有條狗鏈鎖住，唔會周圍痾屎同咬人。但係隨住滿清王朝崩潰，傳統儒家哲學意識形態大廈倒塌，條狗鏈終於唔存在，全部人撕去人皮外表，周街痾屎同咬人，實屬正常。
有人講政治唔講意識形態，其實全部錯曬。
政治本身就係意識形態嘅實質伸延，任何政權存在都要一套意識形態響背後配合。民國初年，大家信仰嘅係民主自由法統，但其實個個一知半解，當時大部份人見到嘅、羡慕嘅只係對岸日本如何強大起來，脫亞入歐，躋身西方列強之列，至於真正自由民主法治為何物，其實冇人知道亦冇人想知。況且日本強大，正正就係佢唔係行真正嘅民主制度，心中冇「天皇」呢個概念存在嘅中國人將日本當成藍本嚟模仿參照，唔死有鬼？
儒家哲學唔work，民主自由法統又得半桶水？點算？所以一場新嘅文化意識形態運動，亦響咁嘅背景下全面興起，四億中國人民（或者只係小部分精英階層知識分子），要重新找尋信仰同價值觀，結果有一部份人睇見列寧托洛斯基得咗，從西方意識形態超級市場貨架中搵到「馬克思主義」同「共產主義」信奉，堅定不移奉為圭臬去建造新世界。
但由始至終，我常公子都唔覺得中國人真係信奉過馬克思主義，大家要記住一點，「信」還「信」，「用」還「用」，兩回事嚟嘅，洋務運動期間，就有人提出「中體西用」，體、用未必要合一。正如信耶穌有飯派，就個個去信耶穌，唔係因為真心相信耶穌係救世主，而係因爲要食碗飯。
常公子
2020-1-27 00:47:41
中國人嘅問題始終就係實用主義者嘅問題，有人話英美係實用主義信徒，我話你知，其實中國人先係最堅定不移嘅實用主義者，「凡事講求利益出發」係西化對實用主義者嘅形容語句，用我哋中國人自己嘅講法，應該係「有奶便是娘」。
由於心中冇真正嘅信仰同信念，有冇信仰嘅事物，一切只由本能出發，由於有奶便是娘，所以擦鞋文化深入中國人骨髓，威權主義亦都喺中國人嘅社會好容易實行起來。
唔好虛無縹緲論述嘞，睇實際例子，97年後香港發生嘅所有事情，班太平紳士社會賢達所做嘅一切一切，大家就會一清二楚，明明一言九鼎鋼鐵公司鄧小平答應咗「一國兩制、港人治港、高度自治」，除咗國防同外交，所有嘢應該由香港人自己話曬事，但係偏偏香港人就將「高度自治」自行了斷。
末代港督彭定康臨走之前，已經批死香港人一定會將自治權自行斷送，佢仲準過麥玲玲。點解彭定康呢條死鬼佬會講中？因為佢落區食得蛋撻多？並唔係，而係佢太清楚中國人嘅DNA構造，太清楚主人放狗嘅道理，養過狗未？主人一定明白條狗鍾意喺邊條燈柱側邊屙尿，有pattern可以follow架。
去返1918年10月，徐世昌上臺後，積極尋求南北和平，10月13號，民國關公吳佩孚致電徐世昌，請求速法停戰令，同一時間，徐世昌亦下令赦免張勳同其他參與之前復辟活動嘅人，張勳先生事敗後，入咗荷蘭領事館尋求政治庇護避咗成年，終於得到自由，從此以後隱居北京做居士。
10月30號，第一次世界大戰協約國各國駐華公使向北京政府提交抗議書，指責中國政府忙於內戰參戰不力。佢哋話，西方列強允許中華民國暫緩償還庚子賠款，目的係希望中國發展國內實業復興經濟，但係中國政府就淨係掛住打仗玩權力鬥爭。而且向德國宣戰，加入協約國行列後，中國亦將借錢訓練嘅一戰參戰軍用於內戰，從來冇派過去歐洲戰場上幫手（打個白鴿轉就有）。
仲未夠，中國向同盟國宣戰後，條約規定本來禁止與同盟國（主要係德國）通商同沒收敵國資產，但中國亦冇全力封查國內同盟國僑民財產、仲偷偷地保障佢哋嘅商業利益，同佢哋私通交易，完全冇履行作為一個參戰國嘅神聖義務。
當時班鬼佬未睇清楚中國人嘅基因構造，凡事做三成已經俾多你，向德國宣戰只係表面外交功夫，並非真心。所以之後第一次世界大戰結束，巴黎梵爾賽和會上，中國終於得到教訓，不過之後再講。
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-1-28 11:15:14
【常公子歷史頻道218回：大清亡國關 #北洋常備軍 蛋牛治】
♉大年初四，恭喜發財，祝大家身體健康，平平安安！
♑疫情繼續擴散，完全冇緩和落嚟嘅跡象，新型肺炎病毒傳播力驚人，最新消息，就算冇明確接觸史，都會染病。但大家不要太慌張，亦冇得慌張，日子總要過下去，做好個人衛生，保護自己同屋企人最重要，戴口罩，勤洗手，用酒精潔手，保持家居環境衛生清潔，避免去多人嘅地方，「宅」多啲響屋企打機同睇netflix……靜觀其變，保持鎮定，現在鎮定最重要，保護自己同家人最重要，保護自己嘅小朋友同老人家最最重要。
♐有人埋怨特區政府同林奠反應慢，到現在仲未封關。我本人則無太大感覺，呢個政府嘅底蘊大家早已經睇得一清二楚，如果佢做到啲好嘢出嚟，我反而覺得奇怪。正如面對世紀疫情，中國一定會講大話，你信佢啲數字係你有問題，大家亦唔覺得需要奇怪，讀歷史嘅好處就係要你明白，過去嘅事點發生？今日嘅事又可以點樣發生？性格好難改變。
♉反而最慘嘅係全港醫護人員，企喺最前線，面對失控嘅疫情，同排山倒海而嚟嘅危機，我對佢哋送上最崇高嘅敬意，我亦支持醫護人員罷工向政府施壓，反正大家早已經知道，「理性討論」同「正常思維」係依個垃圾政府並唔存在。現在嘅特區政府係一個木偶，基本上係死物，中央推一下佢喐十下，市民推一下佢喐半下，你冇反應佢就唔做嘢，不動如山。因為敵不動我不動，做少一樣錯少一樣，最驚咩飛，反正月尾一樣有糧出，家人同物業財產亦都響歐美，佢哋最關心嘅未必係香港嘅疫情，技術官僚嘅思維同「卸膊文化」大家要清楚明白。
♊太平盛世，安居樂業大家都想，但混亂先係常態，平靜反而係偶然，歷史一早已經講咗畀我哋知道，勇猛精進，堅守信念，發揮阿羅漢精神，面對更大困境，兵來將擋水來土掩，人生本該如此。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/V2zZZhOyvno
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-1-29 18:10:24
:^(
【常威近代史】（三百二十五回）
大軍閥平反系列
現代世界，「反共」、「反赤化」係大潮流，係好多人心目中，「共產黨」係打機萬惡嘅大佬，十惡不赦，做盡人間壞事，完全違背普世價值同基本道德標準，今日香港，「反修例」、「反林鄭月娥」或「反警暴」掩體背後，其實就係「反共產黨」、「反中共」。
但響1918年二十世紀初嘅世界，「共產主義」（Communism）無疑係世界上最美麗嘅事物同哲學思想，象徵著低下階層無產階級從資本主義帝國主義工業社會被壓迫被剝削中態中得到解放，其實二十世紀初期，共產主義已經講咗六七十年，1848年2月21號，馬克思恩格斯發表《共產黨宣言》，響歐洲大陸投下思想核彈，同年歐洲工人大醒覺，大革命遍地開花，可惜最後無法成事，畀資產階級武力鎮壓落嚟，終於去到70年後，1917年由列寧托洛斯基領導嘅「布爾什維克」十月革命成功，響俄國成功建立世界上第一個共產主義國家政權。
喺歷史同政治意義上，無疑係開天闢地。
當時嘅人以為，共產主義社會裡面，從此以後統治階層再唔係高高在上，而係同自己都係窮人工人，大家稱呼大家做「同志」（Comrade），大家咁高咁大，只可惜人總係一種喜歡美麗幻想嘅動物，同埋凡事凡物，要時間消逝就會變質。
1918年仲有一件大事發生，就係11月11號第一次世界大戰結束，協約國戰勝同盟國，簡單啲講，係威廉二世領導嘅德意志帝國戰敗。但係德國戰敗得相當奇怪，佢哋唔係被對手徹底打垮，東線方面更加取得全面勝利，西線之上只係同英法兩國咬得旗鼓相當，但問題在於交戰雙方都已經用盡資源同一切人力物力，而德國係首先頂唔順要投降。
我曾經睇過一本書，講當時德國人一瞓醒，就聽到國家宣佈投降，其實根本冇人可以相信，好多德國人根本覺得自己仲佔緊上風，所以德國戰敗後，德國人內心其實從沒有被戰敗過，不明不白打輸第一次世界大戰，之後仲畀對方多番強姦輪姦割地賠款摧毁經濟，日耳曼人當然心有不甘，一定要捲土重來報仇，所以基本上就一定有第二次世界大戰發生。
當時其實唔係叫做「第一次世界大戰」，因為大家都估唔到有第二次，當時嘅人稱呼叫「歐洲戰爭」，或者叫「終結一切戰爭的戰爭」，全世界人真係以為係最後一次戰爭，其實所有殺戮同混亂先啱啱開始。
未講中國，不如睇吓第一次世界大戰造成咗啲乜嘢後果：
常公子
2020-1-29 18:11:00
首先比利時、羅馬尼亞、波蘭、烏克蘭同波羅的海各國國境內嘅德軍被清空；德意志、俄羅斯、土耳其帝國（或叫奧斯曼帝國、顎圖曼帝國）勢力被嚴重削弱；奧匈王朝被完全摧毁，匈牙利、保加利亞版圖縮小，大英帝國亦失去咗愛爾蘭嘅大部分；有新嘅國家被建立，奧地利同匈牙利分裂成兩個國家；塞爾維亞人達成咗佢哋嘅目標，建立咗一個南斯拉夫族嘅國家；克羅地亞人、斯洛文尼亞人、波斯尼亞嘅穆斯林都建立咗自己嘅國家；捷克、波蘭、立陶宛、拉脫維亞、愛沙尼亞同芬蘭成為獨立國家；意大利嘅版圖擴張咗；法國收復咗自1871年失去嘅土地。英國同德國亦都擴大咗殖民地嘅範圍，佢哋託管嘅名義接收咗敵國先前擁有嘅殖民地，敘利亞同黎巴嫩歸法國；伊拉克同巴勒斯坦歸英國，英國仲係當時致力係巴勒斯坦上建立一個猶太民族地區，亦即係後來以色列的前身。整個歐洲，勢力重新被分配，總括而言，最大得益者係英國同法國，而輸得最慘嘅就係奧匈帝國、顎圖曼帝國同德國。
而協約國另外兩個成員，日本同中國，響當時只係塘邊鶴角色，並唔係重心，尤其是中國，有分出席去開梵以賽會議，其實已經執到。第一次世界大戰結束，其實仲有一件事發生，就係美國已經成為英國作為世界銀行中心、貨幣中心嘅對手，美國亦已經企喺全球超級經濟強權嘅門檻之上，當時美國嘅威爾遜總統構想以「國際聯盟」同「國際法」為基礎嘅「世界新秩序」亦已經得到實現。
總括一句，1918年11月，整個世界秩序已經改變，德國被抑壓，英國同法國亦響一戰中損失慘重，國力開始走下坡，俄國變成咗共產主義國家。而美國同埋日本亦因為其他國家勢力削弱而高速崛起。所有人亦以為，混亂已經結束，但係冇人知道之後嘅世界，流血將會更多更多……
常公子
2020-1-29 18:11:20
1866年，可能係世界上最偉大嘅小說家杜斯妥也夫斯基（Fyodor Mikhailovich Dostoyevsky，1821－1881）發表嘅小説【罪與罰】（Crime and Punishment）上，有以下一段文字：
『那些被傳染的人馬上就發病，而且陷入瘋狂。而且從來沒有人能像這些染病者一樣認為自己如此聰明，如此毫不猶豫地相信自己的正確。也從來沒有人能像他們那樣，認為自己的裁決，科學推論、道德確信以及信仰具有更堅實的基礎。各個居住區、各大城市，各個國家民族都全面被感染，也全都瘋了。
每個人都掉進緊急狀態，沒有人能了解任何別人，每個人都相信真理只在自己一人身上；一看到其他人就極度痛苦；人們敲打自己的胸口，哭泣、並揉絞自己的雙手。他們不知道應該審判誰或者該如何審判他；他們無法一致認同什麼叫作邪惡？什麼又是善？他們不知道該把誰判刑又該釋放誰。
人們為了毫無理由的憤怒互相殘殺。一支一支龐大的軍隊被召集起來互相對抗，但是當部隊才踏出一步，突然間他們就自己互相砍殺。官軍官們被趕跑了！士兵們衝向彼此，鞔打對方，刺捅對方，嘶咬並且吞食對方。在城市裏，警報聲從早到晚沒有停過。所有人都被召喚，但是沒有人知道召喚者是誰以及為什麼，所有人都無比緊張。最普通的商業活動都停止了，因為每個人都提出自己的理念、自己的批判，而且互相無法同意。
農業也停擺了。在某些地區有小群人聚集起來，達成某種協議，並且發誓不會分開。但是當他們一說好，跟他們提出的完全不同的事就發生了。他們開始互相指責，彼此打架，並把對方捅死。到處燃起大火，開始出現饑荒，所有事物跟所有人都走向崩潰，走向毀滅……』
原來係半個世紀之前，早有人預視到整個歐洲會發生乜嘢事情……杜斯托也夫斯基，其實係神嚟嘅。（同今日亦都好似）
#常威 #大軍閥平反系列 #大軍閥 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-1-30 00:05:56
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me
❤請加入常公子的近代史世界！
#ChineseHistory #HongKong #China #History
常公子
2020-1-30 00:06:41
🔥香港近代史【香港關中英聯合聲明腿蛋治】系列
❤認識香港近代史，香港人重新出發！請加入常公子嘅近代史世界！
#Hongkonger #Hongkong
https://www.youtube.com/playlist?list=PL0RVUAILQUOumZZXNyEKoZRynMtAuRyuS
常公子
2020-1-30 00:06:59
【❤常公子向悲慘世界乞錢】
💰請課金支持我的 #廣東話近代史寫作計畫！
我們嘅 #廣東話，香港人嘅廣東話，需要延續其生命力，一部廣東話嘅近代史寫作，對我嚟講，意義重大，文化承傳，民族不死，薪火相傳，需要嘅靭力同耐性，我常公子嘅靭力同耐性，大家有目共睹，時勢雖然艱難，但我仍會逆難而上，當然需要大家全力支持！
兄弟嘅嘢在心中，請你拿出45蚊，支持我用支筆行落去！直至去到國家主席劉少奇骨灰回歸北京一天……
💪無言感激，沒齒難忘！
👉【常公子近代史】第三部《#東方維多利亞女王之死》download link：
https://play.google.com/store/books/details?id=GaGrDwAAQBAJ
:^(
常公子
2020-1-30 11:51:30
【常公子歷史頻道219回：大清亡國關 #軍紀 蛋牛治】
♉疫情擴散，香港真正進入停擺攬炒狀態，300萬人上街，逆權運動做唔到嘅事情，一個病毒搞掂你。諗返轉頭，不知道是禍是福，如果唔係2019年香港到處爆發大規模示威，中港兩地繼續交流頻繁，我諗今次疫情會爆到唔清唔楚，起碼比現在嚴重十倍，歷史真係好得意同好諷刺。
♑近日香港爆搶口罩潮，感覺香港漸漸變成大陸，中港融合真的出現了。睇見荃灣有人排三、四個鐘頭隊為咗買一盒口罩，感覺虛幻不真，好似真係殺到嚟，屍橫遍野咁，似乎好多人心裡面都有好重嘅危機意識，覺得個社會危機四伏，身邊嘅人同政府都會傷害自己，所以保護自己最重要，係第一優先。我諗呢個就係真正「香港人」同「內地人」嘅分別，當然搶口罩嘅，好多都係「香港人」。
♐由今日起計，香港至少會有兩星期停擺，大家會得到一個難得嘅「悠長假期」，過去喺繁忙生活裡冇時間做嘅事，可以把握機會做番，例如讀幾本從前冇時間讀嘅書，睇返幾套冇時間睇嘅美劇，或者抽多啲時間陪屋企人，去搵搵好耐冇見嘅朋友聚聚，或者去遠少少，到郊外避開人群，呼吸吓新鮮嘅空氣都係唔錯嘅選擇……
♉而我，就要好好把握時間，喺屋企還稿債。不過生活還是艱難的，因爲我成日去嘅兩個地方封咗，就係游泳池同圖書館。
♊祝願大家平安，保持鎮定，堅守崗位，攜手抗疫，共渡時艱，明天一定更好。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/rCOQ4yk71y4
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
Ads
常公子
2020-1-31 13:34:44
:^(
【常威近代史】（三百二十六回）
大軍閥平反系列
時間繼續停留喺1918年11月11號，德國無厘頭「投降」，第一次世界大戰結束，依一場響短短四年間奪去咗差唔多2000萬人性命嘅歐洲大戰（數字一般認定係3500萬人傷亡，死亡人數達1500萬），徹底改變咗歐洲同整個世界嘅運行秩序，「碎肉機」式戰爭概念降臨大地，人命變成數字統計，戰爭再唔係單單軍人同政權嘅事，要打整體動員戰，平民百姓死傷更加慘重。
有人話第一次世界大戰冇真正嘅勝利者，所有國家都係戰敗國，所有國家都要付出代價，只不過我哋稱呼「付出代價比較小嘅國家」為戰勝國。更值得留意嘅係，第一次世界大戰令到俄羅斯嘅羅曼諾夫王朝、奧匈帝國嘅哈布斯堡王朝以及普魯士嘅霍亨索倫王室倒臺，加埋鄂圖曼帝國瓦解。之後由共和體制取代，一戰成為咗君主制同共和制長久衝突歷史嘅勝負決勝點......
自十八世紀末期歐洲「雙元革命」（工業革命同法國大革命）發生後，民主共和制度開始出現響歐洲大陸，但係君主制依然非常強靭，去到1914年第一次世界大戰爆發前夕，歐洲亦只有瑞士、法國同葡萄牙係行緊真正共和民主制，其餘諸國都係行緊君主制或君主立憲體制，整個歐洲大陸，由維多利亞女王嘅後裔同佢嘅親戚佔據不同帝國嘅王位，形成咗一個「王族精英階層」系統，至少有某種意義下嘅集體利益存在（當然佢哋亦都會鬼打鬼）。
甚至有保守派相信，一戰會令共和制響歐洲完全消失，不過事實啱啱相反，一戰令到大部份君主體制徹底垮臺，取而代之係歐洲大部分國家進入共和體制時代，由人民選票話事，情況同當時嘅中國亦都一樣，民主自由共體制和終於占取上風。一戰結束後，隨著各大王朝紛紛倒臺，王族精英階層瓦解，有好多人相信共和體制會為歐洲大陸帶嚟長久嘅和平同安定，但係事實又啱啱相反，共和體制嘅出現反而帶嚟咗更加殘酷、滅絕性更強、死人更多嘅第二次世界大戰。
由此可見，建立共和引發大混亂，並非中國人嘅問題，而係全世界人嘅問題。君主體制冇民主，由君王同王族單邊獨大，減少唔同派系之間嘅權力鬥爭，或者至少保留一個高高在上嘅神聖君主角色，最後為唔同衝突嘅意見擔當仲裁同埋權威嘅角色（君主立憲），某程度上，可能係一個更好嘅管治手法。
今日世界，當然冇人敢再講君主制比共和制更優勝，但係我講畀大家知，其實好多人心裡面仲相信（支持）君主制度，你睇今日中國，國家領導人習近平搞一人獨大，權力高度集中，背後有14億人支持，你就一清二楚。
但我想補充一點，任何事情都有正反兩面，君主制有好處亦有壞處，同樣民主制度亦如是，世界上冇完美嘅事物存在。我哋要選擇嘅並唔係邊個比較好，而係「兩害取其輕」，去選擇一個會帶來比較少壞處嘅制度。如果用咁嘅思考方法去考量，民主共和制度絕對比君主制度優勝。
常公子
2020-1-31 13:35:20
1918年係大變局嘅一年，除咗一戰結束，當年仲發生咗一件大事，就係西班牙流感（Spanish Flu）肆虐全世界，當年世界上並冇世界衛生組織WTO統籌監控疫情，而且處於戰爭混亂狀態嘅全球，好多都進行新聞封鎖，於是乎只有歐戰中立國西班牙報導疫情比較開放，加上西班牙國王阿方素十三世（Alfonso XIII）都瀨咗嘢（冇死），所以全世界人以為西班牙最大鑊，所以就叫咗個病做西班牙流感。
病毒迅速喺全世界蔓延，冇人可以控制，單單英國就有25萬人被奪去生命，而且唔少仲係20-40歲嘅壯年人。亦有人話，西班牙流感嘅傳播，導致大量一戰戰場上嘅士兵死亡，亦都間接結束咗第一次世界大戰！
歐美等先進國家疫情仍遠不如世界其他地區嚴重，印度有1850萬人患病死亡，平均病例死亡率高達6%，埃及死咗14萬人，病例死亡率10%，更加有無數偏遠地區同落後地區，根本冇正式嘅統計數字提供；當時嘅中國亦受到西班牙流感肆虐，但係死咗幾多人？亦都係冇人知。總之由1918年年中爆發西班牙流感開始，全球就大約有一億人被奪去寶貴生命。
同2003年沙士一樣，呢一場肆虐全球嘅Spanish Flu，去到1920年中突然間銷聲匿跡，科學界確認病原體為一種H1N1流感病毒，但係冇人知道源頭喺邊度（唔響印度）？亦冇人可以確認其傳播途徑為何？不過由於病毒喺短時間內蔓延全球，而當年全球化嘅程度遠不如今日，喺人流物流不及現在空前頻繁情況下，究竟病毒係經過乜媒介短期內傳播到全球呢？甚至去到唔少與世隔絕嘅地區呢？
Common sense可以解釋，病毒應該係一種禽流感，經由可以飛行全世界嘅候鳥直接傳畀人類。亦有可能病毒一直喺度傳播，但係突然間發生變種，當年呢一種H1N1流感病毒毒性極強，其產生嘅病毒微粒遠遠超過現代流感病毒39000倍，所以能夠響短時間內殺死成億人！有人夜晚發高燒咳嗽，呼吸系統被感染，瞓咗一晚第二朝就拜拜，你都咪話唔得人驚。
100年過去，流感病毒喺度不斷變種，同不同動物交溝傳播，至今仍然深深威脅全人類安危，最近武漢又爆一鑊，進入21世紀，其實已經三番四次爆大鑊，香港爆發沙士奪去300條人命嘅慘痛記憶，我仍然瀝瀝在目，但人類仍然死不悔改，最令我擔憂嘅係，人類由20世紀中葉開始濫用抗生素，其實某程度上係削弱咗人體嘅免疫系統本能，對於新變種病毒嘅抵抗力，只會變得越嚟越低……
仲有一樣嘢，壯陽其實有好多方法，游水跑步行山都係唔錯嘅方法，未必一定要食野味進補。仲有一句，中國人食野味壯陽，好多都唔係為咗生仔同服務老婆小三，只係純粹為咗叫雞，咁又何必呢？
#常威 #大軍閥平反系列 #大軍閥 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
5
常公子
2020-2-1 01:01:47
:^(
常公子
2020-2-1 11:16:24
【💣香港關 #中英聯合聲明 腿蛋治 第二十二回 #三腳凳】
♒中英聯合聲明系列相隔咗好一段時間先同大家見面，首先同大家say sorry，人手實在有限，實在對唔住，希望之後能夠keep住進度，做到兩個星期一回，大家加油！自己加油！香港人都要加油！武漢肺炎嘅疫情，似乎一發不可收拾，但大家毋庸驚慌，埋怨亦都冇用，生活總要過，勇敢面對未來，要習慣吓喺亂局中生存，太平盛世從來並非永恆。
♑今集中英聯合聲明有一個詞彙出現，叫「三腳凳」，意指當日中英談判香港前途問題之前，英方要求要有三方面參與，即係英國中國同香港，缺一不可，是為「三腳凳」。但係真實情況，香港前途問題係中國同英國兩國講咗就算，香港人從來冇資格參予其中，香港人嘅意願亦都從來冇被中英重視過。如果依照當時民調嘅結果，香港人絕對唔願意回歸，我哋係想英國繼續統治落去，基本上維持現狀不變。
♉香港係一個殖民地，97年前嘅宗主國係大英帝國，97年後係中華人民共和國，殖民地上嘅「殖民」從來都係處於「被統治」嘅狀態，自主權從來亦非常有限，97年前如是，97年後亦如是。現在有好多人誇大97年前香港人嘅自由民主，所謂自由民主只不過係1992年香港末任港督彭定康上任先發生嘅事，中間嘅好日子，其實只係得五六年時間。
♑一個地區缺乏自主權其實好大鑊，大家睇今日嘅香港，疫情殺到埋身島，但係特區政府所做嘅嘢非常有限兼緩慢，真相應該係凡事要得到上頭approval，大家最驚咩飛，只想安安逸逸平平安安個個月出糧等退休。仲有一樣嘢，點解一定要「上面話OK」？其實好簡單，上頭做決定，就係上頭嘅事，有責任係上頭負責，同自己無關。你以為卸膊文化專係卸畀下屬？其實你錯咗，倒番轉頭即返畀上司亦都可以，於是一層卸一層，總之唔關自己事就平安大吉，呢個先係真正「卸膊文化」嘅終極表現。
🇬🇧
https://youtu.be/10l7bsAypMk
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-2-2 13:06:11
:^(
【水師提督長子常公子星期日聖旨】
水師提督府大把口罩，有事領導行先，大家唔使替我常公子擔心！
錯就要認！打就要企定！我首先同大家講聲對唔住，因為武漢肺炎擴散程度超出我原本嘅想像，再一次證明我真係不學無術冇樣嘢叻，原本以為武漢肺炎基因結構同2003年沙士非常相似，依照歷史判斷，應該好快可以平復落嚟。但係新病毒嘅傳染力似乎比沙士高得多，而且最攞命嘅係，新病毒可以係冇病徵之下高速傳播，真係令人防不勝防！事情發展到現在，可以講，局面進入全面失控狀態。
首先2003年，外國冇響中國同香港撤僑，但而家各國撤僑行動相繼進行，你就知道事情有幾大鑊。就算世衛總幹事低級紅譚德塞見習主席大派定心丸都好，但事實擺在眼前，隻鑊已經冇得撳！武漢肺炎無可否認已經上昇到一場全球災難級事件。
面對大災難來臨，中國政府同香港相繼露底，熟讀歷史嘅人都知道，共產主義或所謂極權統治，喺戰時狀態係戰無不勝，因為極權統治下，我哋有理由相信政權響物資調配同埋動員能力方面都係非常強大，但武漢大爆發，中共俾我哋睇到嘅係進退失據，而且連最基本嘅醫療物資供應亦都非常不足，輿論消息公佈更加唔好講，簡直係一場場關公大災難。單就控制疫情情況，中共亦都比全世界人睇到佢哋嘅辦事效率同應對手腕，基本上係唔合格。
正如當年李鴻章嘅北洋艦隊，號稱世界上第五大海軍力量，表面好睇，但係同日本人打一場甲午戰爭，唔使三個鐘頭就完全露底。
香港特區政府更加唔使講，面對災難來臨，唔單止進退失據，直情可以用古靈精怪去形容，連我哋香港一直睇唔起嘅細佬澳門都一早封關同處理口罩嘅供應情況，而香港一班世界上薪酬最高嘅技術官僚，竟然可以閉門做車搞到一鑊泡，上不能討好領導，下不能安撫民眾，我真係完全唔能夠理解。就我身邊嘅人而言，好多淺藍都係今次嘅事件變成淺黃，民建聯真係要多謝林鄭月娥。（我個人亦好相信林鄭月娥同李慧瓊有仇）
香港貴為世界上最先進文明同富裕的大城市，坐擁三萬億儲備，亞洲貿易運輸樞紐兼金融中心，最後竟然要長者喺嚴寒天氣下響街度排三四個鐘頭隊黃牛口罩，簡直係國際大笑話，以為呢度係東方埃塞俄比亞。面對醫護人員嘅諸多不滿，政府毫無對策，日日淨係識開記者招待會空口講白話玩語言偽術玩卸膊，認真去講，呢班人唔死係冇用。
2019年下半年，香港特區政府已經將香港玩謝，2020年加多場武漢肺炎你嘆，何止露底？簡直係將政府威信徹底摧毁。有人話林鄭月娥陰毒？我覺得佢係純粹蠢，真正陰毒嘅人要有基本智慧，而佢畀我嘅感覺係連基本智慧都欠奉，有機會要同佢同成班人check IQ，睇吓係咪低過80？
有人話唔好成日講負面野，需要發放正能量，本公子就從善如流。面對險峻疫情，大家千祈唔好驚，亦都冇得驚，既然政府靠唔住，就要靠自己，首先大家要保持家居衛生，手部清潔最重要，冇酒精用可以用番梘，洗多幾次手，空氣流通更加重要，身體健康自然百毒不侵，要把握機會做運動，千祈唔好唔喐，亦都唔好哄搶物資，有能力嘅人就去幫助其他人，冇能力嘅人就要保持鎮定好好保護自己，香港唔係大陸，總會有人向你伸出援手。
成日話香港人嘅質素高人一等，唔該趁住今次疫情話俾全世界人知，我哋嘅質數真係夠高，高到唔使接受極權統治，高到可以享受民主自由。
共勉之！
常公子
2020-2-3 13:32:11
:^(
【常威近代史】（三百二十七回）
大軍閥平反系列
1918年11月11號一次結束，世界進入矛盾新紀元，中國方面情況又如何呢？
段祺瑞馮國璋下野，徐世昌接任中華民國大總統後，國家大分裂基本格局不變，南北戰爭停停打打，中央政府仍然同日本大量借錢維持經濟發展，隨著一戰結束，日本形勢更加大好，國內民粹主義昇溫及社會主義者出現，並冇妨礙日本帝國軍事同經濟勢力日益坐大，更加冇削弱到佢哋大和民族嘅對外擴張侵略意識。
上次已經講過，一戰動搖咗整個世界君主制嘅基礎，取而代之就係民主共和體制嘅大興盛，雖然共產主義（或稱呼為社會主義）其實同民主共和體制係兩樣嘢，但係當時嘅人就將呢兩樣事物好似瀨尿牛丸咁撈埋一齊嚟講，好多人都分唔清楚民主共和同共産主義嘅分別，簡單去演繹，當時嘅人都會認為世界出現嘅大變局，係原本「皇族貴族精英階級」退場，轉為「平民」「庶民」上場主導世界。
1918年11月15號北京大學喺天安門舉行演講大會，中國共產主義之父李大釗嘅演講，就指出第一次世界大戰協約國戰勝同盟國係「公理戰勝強權」，李大釗認為取得今次戰爭勝利，並唔係協約國嘅武力，而係人類世界新精神嘅勝利，真正嘅勝利者唔係邊一個國家或政府，而係全世界嘅「庶民」，勝利係「庶民嘅勝利」。其後係1919年1月號嘅《新青年》上，李大釗發表文章《布爾什維主義的勝利》，熱烈讚揚列寧俄國十月革命成功，並且預言：
「人道的警鐘響了！自由的曙光現了！試看將來的環球，必是赤旗的世界！」
11月16號，偉人北大校長蔡元培亦都喺慶祝協約國勝利大會上發表演說，佢認為「此後的世界，全是勞工的世界，凡用自己的勞力作成有益他人的事業，不管他用的是體力、是腦力、都是勞工……農是種植的工、商是轉運的工、學校職員、著述家、發明家是教育的工……要認識勞工的價值，勞工神聖！」
「共產主義」思潮喺中國最高知識分子階層高速傳播、並且得到廣泛認同，同今日完全係兩回事，「共產主義」響當時舊世界，係一個完全時髦創新大膽、並且具有高度前瞻性嘅哲學思潮，當時唔曉talk兩咀列寧馬克思唯物辯証法，我諗會溝唔到女。
而共産主義論述本身，更加將「庶民」地位提昇到最高境界，認為社會及國家應該由「勞工階層」及「無產階級」專政統治，徹底揚棄「精英階層」及「血統主義」。當時嚟講，正正就係一無所有、生活喺水深火熱中普羅貧苦大眾杯茶，所以人人buy共產主義，一啲都唔需要奇怪。
其實共產主義（或社會主義）本身無錯，而且非常好，百分百的好！但係衰就衰在，實在係太理想化，實際操作上根本冇可能做得到。其實邊個唔想資源平均分配？人人有啖飽飯食，世間再無階級高低長短優劣之分，每個人盡展所長，唔再被資本及金錢所「異化」，每個人可以實踐自己嘅本質同天然本性，平安快樂地活著，走向世界大同，共建烏托邦。
常公子
2020-2-3 13:32:30
但係放於實際操作上，就係冇可能做到。你要所有人認同、同埋實踐共產主義生活方式，唯一嘅方法就係用武力強逼，即係話，「你唔咁樣做，我就拉你去坐監或去後巷打靶」，結果建立烏托邦前，就要用極權統治手法，民族追求到永恆快樂之前，就要在當下付出更加慘痛嘅代價，而且問題係，付出慘痛代價之後，烏托邦係咪一定會出現呢？亦都冇人可以擔保，共產主義嘅問題喺呢度，唔係印度。
我永遠都會記得大哲人牟宗三（1909-1995）曾經講過，佢話作為一個讀書人，年輕時候信仰以及擁抱共產主義係理所當然，但係40歲以後，如果你仲相信共產主義可行，你就係一個大傻瓜。佢真係冇得頂，就我自己經驗而已，我真係過咗40歲，睇清楚整個世界運行嘅秩序及認清人性為何物時，我先至認為共產主義係唔work，100%唔work！
1918年嘅世界住民，冇上述嘅覺悟，亦都係必然。
11月15號，中華民國大總統徐世昌決定推行南北停戰攻策，積極尋求和平之路，本日佢召集咗八省督軍喺北京舉行會議，全體閣員同南方四川、湖南省代表共30人參加，大軍閥段祺瑞亦應邀出席，喺會上，大家願意服從大總統命令，贊成南北和平統一方針。大家開始埋檯傾裁軍嘅問題，同日北京政府發表退兵令，企圖結束戰亂局面。
不過民間普遍相信徐世昌嘅努力都係徒然，南北之爭根本冇辦法平復落嚟，而且當時中國山頭實在太多，要所有山頭同地區軍閥服從中央政府和平統一政策，根本冇可能，中央政府做嘅嘢，純屬擺姿態動作。
11月22號，已經冇孫文份嘅中華民國廣東軍政府亦順應大潮流答應休戰，開始同北京進行和談及協商。
11月23號，北京中央政府教育部公佈注音字母表，共24個聲母、三個介母及12個韵母，中國開始步向統一語言之路，而北京話，即「國語」或後嚟稱呼為「普通話」，則開始成為中國法定嘅正統官方語言。
1918年11月28號，北京市舉行慶祝第一次世界大戰協約國戰勝大會，歌舞昇平，一戰完結，南北之爭出現曙光，中國人同當時全世界人一樣，正當每一個人都以為和平盛世會重新降臨人類世界之時，冇人會知道，真正嘅大混亂大血腥只係啱啱拉開序幕……
#常威 #大軍閥平反系列 #大軍閥 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-2-4 12:25:35
【常公子歷史頻道220回：大清亡國關 #軍演 蛋牛治】
♐疫情擴散，平素一切生活秩序全盤改寫，就我個人而言，游泳池關閉對我影響甚大，冇得做運動，腰痠背痛。加上圖書館亦關閉，生活好似用另一種方式運行，好難適應。我遇到嘅問題應該大家都遇到，平常心處理，生活總要繼續……
♉想同大家分享一啲生活瑣事，尋日同出版人茶聚，香港出版業喺過去八九個月，跌入無底深淵，睇書嘅人已經日漸減少，原本生意已經難做，再加上逆權運動+武漢肺炎，香港出版社好多生意額大跌七八成以上，部分甚至跌足八九成，相信大規模結業潮將會發生，陶強汰弱嘅時代已經過去，接下來係純粹生存戰爭，無論出版社或者作家，都要想辦法生存落去。出版係一種文化傳承嘅事業，亦係一種使命，亦係一種罪孽，普通人唔好搞亦都唔好嘗試搞。
♉另外一單事情同香港疫情有關，話說我個朋友想撲啲口罩返香港賣（唔係炒，只想獲得20%左右毛利），出貨地點係印尼，原本落咗單20000盒，total 1000000個口罩已經入咗櫃要運嚟香港，但係最後關頭畀內地商人攔途截劫，佢哋以抬高一倍嘅價錢將所有貨掃曬（一盒不漏），直接運上深圳，我諗呢件事就可以反映出最近香港口罩嚴重缺貨嘅原因。因為有人見奇貨可居，於是囤積居奇，將整個亞洲所有口罩存貨收歸旗下，呢個時勢，相信炒埋口罩畀炒樓炒股票更有把握獲利，喺呢度祝佢哋好運，唔好做大閘蟹。
♏響呢度可以提供一個秘訣畀大家買口罩，如果大家有英國美國日本嘅朋友或親戚，可以叫佢哋喺當地上網買口罩，然後寄番當地嘅地址，收貨後再轉寄嚟香港。當然咁樣做，運輸成本將會大大高於口罩本身嘅價值，不過響一罩難求、連林鄭月娥都叫官員少啲戴口罩慳住駛嘅時代，可能係應急措施。
♈「串咀紙板人」香港特首林鄭月娥，領導全香港人抗疫，展示咗佢嘅超凡魅力同實力，醫護人員罷工，好打得嘅佢以硬碰硬，市民叫佢封關，佢吱牙膏慢慢嚟封，總要留條生路俾內地領導同有錢人先走，轉機去歐美，如此忠誠赤膽又能力卓越嘅技術官僚能夠當上香港特首，真係香港700萬人嘅福氣，唔好怨天尤人，要相信特區政府，特區政府唔會害你，由一班叻人組成嘅特區政府永遠最理性，你唔妥政府，係你自己有神經病，需要睇精神科醫生。
♊祝願大家平安，保持鎮定，堅守崗位，攜手抗疫，共渡時艱，明天一定更好。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/uteONZ1DmMw
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-2-5 16:16:00
:^(
【常威近代史】（三百二十八回）
大軍閥平反系列
嚟到1918年最後一個月，一戰結束，世界出現和平曙光，巴黎和會好快會召開，藉此重建整個世界秩序。中國幸運地成為協約國一員，多謝段祺瑞同日本人，令中國排啱隊，否則會好大鑊。12月1號北京政府任命當時嘅外交總長陸徵祥為專使出席巴黎和會。
大總統徐世昌亦都積極尋求南北和談，南北議和，亦都同一戰結束有關，因為第一次世界大戰結束之後，西方列強重新注視中國，但佢哋發現戰爭期間，日本喺中國嘅勢力已經不斷坐大，而且有獨吞中國所有利益趨勢，你老母舊肥豬肉咁樣俾人擔走咗？梗係唔得！所以英國、美國、法國、意大利四國立刻插手返中國事務，四國力主南北和平，其實真正目的係抑壓日本支持嘅段祺瑞皖系勢力。
而且解決中國問題上，日本梗係唔會讓西方各國專美，於是加入四國行列，四國調停變咗五國調停，12月2號，五國公使去到徐世昌總統府，提出和平勸告正式文件。文件裡面講，中國長期內戰，唔單止係中國人受損，協約國在華利益亦損失甚大，五國政府希望中國政府早日自謀解決內戰問題，況且歐洲戰爭結束，全世界迫切希望和平，希望中國參與世界和平事業。文件裡面講呢個只係勸告，只係一個願望，並唔係有意干涉中國內政；同日，五國駐廣州領事館同樣向中華民國廣州軍政府提出相同勸告。
各國力促南北和解，民眾亦唔希望繼續打仗。世界和平邊個唔想？止暴制亂我亦buy，不過要好好處理善後問題啫，只追究平民暴力唔追究警察暴力或唔追究統治階層就1000萬個唔得！其時全國各地有大量民間組織成立，呼籲結束南北戰爭。響外國勢力干預同民眾輿論壓力底下，南北雙方同意議和，北京政府決定同南方廣州軍政府舉行和談會議，委派貴州人朱啟矜做代表。
廣州軍政府自從將小軍閥好戰分子孫文排走之後，由桂系陸榮廷控制，佢亦同意和談，1月9號派遣唐紹儀慧和談總代表。對於廣州軍政府答應參加南北議和，沒有葡萄吃的孫文就喺側邊講「佢哋只想割據而無心護法」，總之乜嘢都係孫文啱哂，佢先係中華民國唯一嘅意識形態道德標準。
南北和談定於1919年2月於上海進行，仲有個零月時間大家prepare。
12月22號，由李大釗，陳獨秀主編嘅《每週評論》雜誌響北京出版。後來成為中共第一代領導人嘅陳獨秀喺「發刋詞」中咁講：「我們發行這《每週評論》的宗旨，也就是『主張公理反對強權』八個字，只希望以後強權不戰勝公理，便是人類萬歲！本報萬歲！」至於公理係啲乜嘢？我諗喺佢心入面，應該係「共產主義」同「馬克思主義」。
《每週評論》主要宣傳反帝國主義、反封建主義、反軍閥主義等思想，介紹十月革命同社會主義學說，雜誌主要撰稿人除咗陳獨秀同李大釗，仲有周作人（魯迅阿哥）同胡適，星光熠熠，《每週評論》亦好快成為北京新文化運動重鎮！
常公子
2020-2-5 16:16:22
我亦差不多可以肯定，如果冇《新青年》同《每週評論》兩份刊物，1919年5月4號中國亦都唔會爆發一場轟轟烈烈的「五四運動」！同樣道理如果冇《蘋果日報》，2019年下半年香港亦都唔會爆發一場轟轟烈烈嘅逆權運動。
響互聯網嘅新世代，傳媒嘅力量好似日益收窄，但其實未必，人類接收資訊同意識形態必須透過文字同閱讀得嚟（睇圖睇片都得，但係都要「睇」），互聯網同智能手機只係改變人類嘅閱讀方式，過去睇報紙睇電視，今日睇FB連登IG睇youtube，其實並無分別。其中有分別嘅係，今日做傳媒燒錢嘅速度會更加快，因為互聯網同智能電話出現，更加冇可能向受衆收錢（訂閱？掟你老母啦！）。
傳媒嘅力量依然係大得驚人，唔係大家睇見做傳媒成日蝕到仆街，搞電視臺搞報紙搞網上平臺個個蝕入肉，但點解仲有人搞？其實做傳媒並唔係用嚟賺錢，只係要用嚟帶動社會方向同埋控制民群意識形態，其政治價值比商業價值大得多，而且控制傳媒基本上即係控制意識形態，大家睇吓意識形態大國中華人民共和國點樣做，就一清二楚。
1918年嘅中國，仲未有人知道操控意識形態係啲乜嘢？當時仍然係一個言論自由出版自由嘅世界，你宣傳共產主義警察唔可以拉你，你有權喺北京大街上大叫打倒北京政府同徐世昌！你估今日咩？唔好講中國就講香港，叫兩句口號就會畀防暴警察推埋牆拘捕，中國人搞民主自由百九幾年就係鳩做，就係咁解。
今集仲有少少時間，總結一下1918年嘅中國，雖然處於一片混亂軍閥割據局面，但成個國家嘅發展同整體國民嘅生活水平係不斷上昇中，全國嘅鐵路運輸網絡漸趨成型，其中山西發現大量煤炭儲藏，到咗今時今日仲未開採完畢。隨住普及教育，民衆識字率不斷提昇，中國人嘅知識水平開始同世界接軌，真正擺脱野蠻落後嘅面貌。日本以外交經濟侵略手段入主中國，響每一個層面上控制住中國嘅發展，其他西方列強嘅影響力因為第一次世界大戰日漸式微，中國擺脱咗俾西方列強瓜分嘅局面，但變成畀日本人單方面侵略嘅局面，最後終於演變成中日全面戰爭。
革命KOL共產主義者孫文暫時失勢，但好快會捲土重來，1918年孫文身邊嘅蔣介石仍然未有人注視，冇人能夠想像到八年之後，佢會係中國一個最重要嘅政治人物，一個真正開天闢地嘅大軍閥！
共產主義思潮喺中國不斷蔓延，1918年係民間主動傳播，去到1919年中就會有第三國際喺背後支持，未來嘅中國霸主「中國共產黨」亦都快將成立。改朝換代並唔係一朝一夕嘅事，需要長時間嘅醞釀先會出現。
#常威 #大軍閥平反系列 #大軍閥 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第三部《東方維多利亞女王之死》實體購買
https://www.382now.com/product?id=165
Ads
常公子
2020-2-6 11:37:54
【常公子歷史頻道221回：大清亡國關 #明昇暗降 蛋牛治】
♐疫情嚴峻，相信唔少朋友同我一樣被迫「宅」響屋企，請大家保持身心舒暢，事情總會過去，就當係自我隔離兩星期，好好思考一下事物同未來。
♊尋日開始有人搶厠紙搶米搶衛生巾，香港人嘅質素，大家有眼睇！好多時候「天災」嘅出現，伴隨而來嘅「人禍」先係大災難，現今謠言滿天飛，請大家保持鎮定，雖然政府無能，但係香港始終係一個富裕嘅社會，我哋嘅商人同資本家手腕係世界第一，物資短缺冇可能係香港發生。當然全港一罩難求，就真係好奇怪，不能夠怪任何人，要怪就怪我哋同中國太接近；正如當年嘅墨西哥，就係因為同美國太接近……
♑以下分享朋友一個帖子，希望對大家有用：
♐加拿大BC 省疾病控制中心提供有關新型肺炎資料，糾正許多網上誤傳資料，希望澄清部分誤解。（清楚解釋病毒傳播的特性）
1) 病毒只入侵病者肺部深處，病人需吸入一定份量病毒才能粘著肺部產生病變。
2) 病毒粘著較大的飛沫傳播，較大的飛沫會很快下墜，故此空氣傳播是一個誤區。
3) 要吸入因沒阻擋咳嗽或打噴嚏的帶菌飛涎，應是兩米內範圍，或接觸了遺留在物件表面的病毒，然後接觸面部引至入侵。
4) 祇要勤洗手，就算是接觸了，都不會透過皮膚傳染，傳染通常是帶菌的手接觸口眼鼻誘發。
5) 面罩的功效是阻擋患者飛沫亂飛。
6) 對非患者，口罩保護功能不高，反之給了非患者錯誤的安全感，忘記了用未經洗滌的手去接觸臉部而受到感染。
7) 避免感染最好方法是勤洗手，洗去接觸到的飛涎及不要用手接觸面部。
患者必定的責任是當咳嗽及打噴嚏時，一定要把口鼻掩蓋。如有病徵要立即尋求醫護，並事前通報以能作出避免病毒傳播。
Fact Check 可查看此網址👇
https://dailyhive.com/vancouver/bc-centre-disease-control-coronavirus-misconceptions
♊祝願大家平安，保持鎮定，堅守崗位，攜手抗疫，共渡時艱，明天一定更好。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/Q5RmqAv24T4
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-2-7 13:37:22
:^(
【常威近代史】（三百二十九回）
大軍閥平反系列
時間正式踏進1919年1月，所有嘅事情都發生係整整100年前，即一個世紀之前。呢100年人類嘅生活模式出現咗翻天覆地嘅變化，正用電腦或電話睇緊呢段文字嘅你，永遠冇辦法能夠想像100年前人類嘅生活係點？當時佢哋諗緊乜嘢？如何去思考世界？其實同我哋完全唔同，而100年前嘅1月，正正就係巴黎和會舉行嘅時間，第一次世界大戰打完，跟住落嚟嘅就係善後問題，或者簡單啲講，係如何處置戰敗國德國嘅問題？如何重新部署歐洲格局嘅問題？的而且確係一個大問題。
之後証明呢個問題冇被處理好，於是乎產生咗第二次世界大戰，死更多人，帶來更大嘅災難。2019年下半年，香港都發生連串問題，目前局面平定咗少少，就要進入處理問題時間，即係善後工作。
而我哋特區政府嘅所有高薪厚職肚滿腸肥能幹官員，似乎一律採取「秋後算賬」嘅態度去處理問題，所謂善後 就係拉人封艇，追究責任。我想佢哋讀讀歷史，第一次世界大戰之後，英國法國同美國其實都係對德國採用秋後算賬式處理方案，結果帶來更加嚴重嘅後果。後來第二次世界大戰結束，大家都學乖咗，對德國日本採取寬宏大量嘅處理手法，終於達成世界大和解，為人類帶嚟20世紀下半葉嘅黃金時代。
其實對於喺政治運動中成長嘅當今中國人，佢哋擁有鬥爭思維，凡事上綱上線秋後算賬一啲都唔需要奇怪，因為呢個係佢哋嘅固有思考模式，我非常體諒，所謂「存在決定性格」，並非「性格決定存在」。對於一直活響極權統治下嘅民眾，佢哋用極權統治嘅思考方式來思考事物，其實無可厚非，或者係適得其所。
但係我基本上唔明白，現今香港統治階層同上層建築其實都係跨越97而嚟到今日，英國殖民地時代嘅自由氣氛，佢哋似乎已經統統忘記曬，取而代之，係同內地官員使用同一種思考方法同做事模式，香港人的確係一級世界仔，風向邊邊擺邊邊，隨時隨地能夠改變自己遷就時勢，特別係遷就老細。結果哲學上所講「存在決定性格」嘅盲點，都俾香港人突破埋，從而到達「性格決定存在」嘅全新領域。咁，到底決定香港人「存在」份「性格」係乜嘢？
如果我冇睇錯，應該係「奴性」，或者叫「性奴」。（身穿緊身黑膠衫蒙面O咀嗰種）
未講中華民國喺1919年巴黎和會上發生乜嘢事之前，我想再補充少少一戰嘅事情。
事實上除咗美國同日本之外，第一次世界大戰嘅勝利國法國同英國所付出嘅代價，遠遠超過佢哋所獲得嘅所有利益。依一場長達四年嘅血腥屠宰，總共奪去雙方900萬個士兵嘅生命，已參加戰爭嘅6580萬名軍人計算，每八個就一個人死亡，死亡率之高，超過古往今來任何一場戰爭，人肉拚鋼鐵，機械式嘅大量血腥屠宰，成為咗戰爭嘅全新方式，除開計算，一戰期間每日就有6046個人被殺死，英國法國及德國，損失大量壯年男性及年青人，雖然佢哋嘅出生率可以好快補充返人口損失，但係所帶嚟嘅創傷仍然係超乎恐怖嘅巨大，至於經濟損失，更加無法計算。
常公子
2020-2-7 13:37:44
大英帝國嘅沒落，亦都係由一次世界大戰開始，取而代之，喺美國呢個新興工業國家踏上世界霸主之途，以及共產主義狂風暴雨席捲大地，整個世界嘅格局發生翻天覆地變化。
更加要提嘅係，死去嘅人可以得到安息，活著嘅人先至受苦受難。除咗900萬士兵失去生命，亦有1500萬士兵變成殘廢，佢哋變成戰爭嘅 Condom，被用完即棄。唔少喺前線嘅英雄，下半生淪落喺貧困中乞討度日，你為國家會照顧佢哋？其實係冇，當時嘅社會福利並唔係好似今日咁完善，同國家或政權上戰場打仗，基本上係傻仔行為。
除咗肉體上嘅殘障，仲有無數人心靈上受到巨大創傷，我好有理由相信，30年後發生更血腥更殘酷嘅第二次世界大戰，其實係民衆因為一戰後遺嘅心理病。我認為，係人類習慣咗殺戮，戰場上嘅經歷，令所有人明白所謂道德、社會制度、法律、甚至信仰其實統統價值全無。當美好事物喺心靈掏空之後，有乜嘢填補呢？就只有仇恨同憤怒，或者虛無主義。
經歷過2019年嘅香港人，大概明白我喺度講緊乜？
有時候肉體可以修復，精神則會永遠沉淪。因此善後工作相當重要，挽救信仰比挽救經濟更加重要。
身為一個左膠，對戰爭難免會流露悲天憫人嘅情感抒發，否則我就唔會係一個40歲前都相信馬克思主義嘅左膠。2020年，戰爭似乎又近在咫尺，身處歷史時空嘅我，又好似發現有啲事，真係只有用戰爭先可以解決。
的而且確，如果大家和平理性可以和你飛飛坐埋一齊傾就可解決問題，咁你話幾好呢？可惜當問題發生，大家希望和平解決，有時候並無可能，最後惟有訴諸暴力，邊個有槍邊個惡，邊個打贏邊個話事。人類普遍存在嘅性格缺陷，其實100年來從來未改變過。
今日變咗寫抒情文，唔好意思，下次返番去歷史科。
#常威 #大軍閥平反系列 #大軍閥 #民國歷史
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
常公子
2020-2-8 09:59:50
【常公子歷史頻道222回：大清亡國關 #罷絀袁世凱 蛋牛治】
♐我最近思考一個問題，究竟一個極權國家是如何形成？自己身處極權國度，我有以下嘅睇法，首先每個國家都係由人民所構成，當權者要施行極權，必須有一班人民去協助做事，當中包括軍人、紀律部隊以及公務員，而依批人，要絕對忠於政權，上頭叫佢哋做乜，佢哋就做乜，缺乏獨立思考能力，亦不懂辨判是非黑白，至於所謂道德，更加唔需要存在。
♏上述這班人，佢哋另一個面相，亦都只係一班普通市民，係你同我嘅親戚朋友鄰居或者舊同學，佢哋選擇協助極權，純粹因為職業嘅需要。正如一個香港警察，上頭叫你搦起支棍去毆打市民，你就衹能夠照做，因為如果你唔做，就係違反上頭命令，份工會冇咗，冇咗份工就無收入，亦都冇宿舍住，生活就冇辦法過，基本邏輯就係咁簡單。
♉所以到頭來，就係一個選擇職業嘅問題，投身極權，無非都係想得到一份穩定嘅收入，追求安逸嘅生活，做公務員鐵飯碗，唔受社會經濟環境波幅影響，就算疫情蔓延，全市商業活動停擺，公務員依舊有糧出，生活不成問題，亦係基本邏輯。
♐因此一個政權要施行極權統治，政權必須養住一大群忠於自己嘅公務員同紀律部隊，最起碼要令呢班人得到安逸安穩嘅生活，極權統治先能夠繼續運行落去。上世紀90年代蘇聯解體，有分析發現，其中一個原因就係所謂「特權階級」人數膨脹，蘇聯時代嘅特權階級，就係極權之下產生嘅一群數量龐大嘅公務員隊伍，佢哋同佢哋嘅家屬響有特權階級嘅所有福利，有專用嘅度假區；有專用醫療；有專用福利；有專用嘅物資補給，用今日嘅講法，叫「特事特辦」。到最後，蘇聯因為供養依一群特權階級而不得不每年花費大量公帑，經濟好嘅時候仲頂得住，當經濟進入下調週期，就會百病叢生。
⛎想當年，我自己都曾經考過督察同ICAC，非常幸運地佢哋冇聘請我，當年同我一齊投考嘅另一個同學，幾個月前我響電視上見到佢，原來佢已經成為紀律部隊某部門嘅總督察，桑海滄田，原來我自己亦都有機會可以成為佢嘅角色上電視。細說從頭，原來並不是自己選擇命運，而是命運選擇了我。
♊祝願大家平安，保持鎮定，堅守崗位，攜手抗疫，共渡時艱，明天一定更好。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳
https://youtu.be/PkVH7atKoYA
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165
上一頁
第 10 頁
下一頁
♉今日係大年初一，恭喜發財，我祝大家身體健康，萬事勝意，天地有正氣，好人一生平安！
♑新沙士蔓延全球，「世界命運共同體」成形，原來武漢有間病毒研究所，距離病發源頭華南海鮮市場只有二十公里，彼此有冇關係？黨冇話畀我哋知，我個人相信黨，相信中國政府，一定會幫助大家逃過難關，做人要對領導有信心，領導比我們強，比我們有智慧（否則他又怎能夠當上領導呢？），當然可以將所有事情處理得非常恰當。
♍林鄭月娥剛剛返港，好快就處理香港抗疫事務，香港市民有福氣，能夠被一如林鄭般如此優秀的傑出領導人才帶領下行到今時今日，今年庚子鼠年，必定會百尺竿頭，同特首一齊攜手向上，直至行上天臺，傲視衆生，一覧無遺。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！
🍳https://youtu.be/tDmXGDGoABg
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165