Ads
Ads
加速篇8
「曬咗乜呀!?」我扮惡咁瞪住呀楊。
我知呀楊都係講下笑,咁多年老友,點會唔知呀楊係咩人?
呢條友呀,把口係賤啲,但對感情卻係一條心。佢同關晴,先啱啱開始佢哋嘅愛情長跑。
「曬咗條女呀!咁都俾你錫到,你執到啦!」呀楊上嚟攬住我條頸,然後細細力打我。
忽然間,我覺得自己幸福,身邊有重要嘅人。
「講真呀,你要對Kitty好啲呀!」打鬧過後,呀楊認真咁講。
「我睇得出Kitty係個好女仔,出面啲女仔好少好似佢咁純。不過出到嚟社會,唔知會變成點呢?」
「將來嘅事,將來再算啦。」我哋嘅事,依家諗都無用,見步行步啦。
此刻嘅我,只想活在當下,好好享受同Kitty嘅日子。
我有啲後悔,點解係中學最後嘅生涯識到佢。如果我可以早啲識佢,可能我成個人生就會唔同。
或者我會好似呀方、呀圓咁,我會發奮讀書。但現實就係一個縱橫交錯嘅世界,好多嘢唔係你想點就點。
「好好珍惜呀…」呀楊拍拍我膊頭。
我明佢呢句嘅意思。除咗要好好珍惜Kitty之外,我眼前嘅呢位兄弟,都要好好珍惜。
我同呀楊都快畢業,將來會見面嘅時間,會伴隨著青春,變得越嚟越少。
「放心啦,我會。」
呢個係我哋男人之間嘅承諾。
年輕嘅我哋,好輕易就會許下承諾,但原來要做到,係要付出120分嘅努力。
本身慣左儲文,不過見書生咁努力,就即刻上番水話你聽,我有睇呀!!!好好睇呀!
加油呀!
Ads