Ads
野菊傲，寒窗苦，物我合
讀李商隱野菊詩ep.15
有時候睇得文學多，都難免會問：
到底係咪悲慘嘅命運，先會迫出好嘅文學呢？
李商隱正正係傳統中國士人嘅典型悲劇
我地之前已經講左好多首愛情悲劇嘅詩作
而家就開始進入李商隱仕途嘅悲哀
曾經講過士人思想，以儒家為主
係主張知識分子以出仕救濟萬民為人生理想
李商隱做為一個知識分子，當然都唔例外
但好可惜嘅係，佢係考左三次科舉
經過左好多年先算做到進士
個情況好似考左三次dse先入到大學咁
野菊
苦竹園南椒塢邊，微香冉冉淚涓涓。
冉冉：飄散
淚涓涓：菊花沾上露水
必須留意題目「野」之一字
生在荒野之菊，天性特別能夠忍受苦寒
而且既是野外，無安身立命嘅家
以物為題，係一首詠物詩
詩人強調「苦竹」、「南椒」
竹係苦，椒係辣，正所謂五味人生
都係野菊生長的環境入面
呢種環境，亦都係詩人寒窗苦讀嘅情況
但野菊依然係不屈咁生長，散發香氣
但係詩人眼中，野菊沾上嘅露水
竟然好似「淚」咁樣
呢種淚未嘗係詩人嘅自悲
已悲節物同寒雁，忍委芳心與暮蟬。
節物：秋季嘅景物
第三句嘅理解係語意可以讀：
秋季萬物凋零之景
雁係天空飛過，詩人心諗秋季咁凍嘅天氣
漂泊在外嘅雁，應該都會覺得寒冷
詩人身處其中又點會唔凍呢
「芳心」乃野菊孤傲之心
菊殘猶有傲霜枝
詩人正係到問上天點解忍心
將菊花呢樣咁美好嘅嘢
委託比「暮蟬」委託比呢個殘酷嘅外在環境
細路獨來當此夕，清尊相伴省他年。
如果話上面側筆描繪詩人心境
呢邊就正式轉入寫自己
詩人詠物最高境界，係物我合一
每一句既寫物，亦係寫自己
詩人沿著細小曲折嘅道路
「獨來」賞菊
野菊本來就不比名花
自然係只有李商隱黎睇啦
李商隱並唔係空手而黎
而係當野菊係一位好朋友一樣
帶埋酒與野菊相伴
回想科舉挫敗嘅心情
以酒消愁
紫雲新苑移花處，不取霜栽近御筵。
紫雲新苑：中書省別稱
睇詩要辨虛實之意
實：皇宮入面要移植新花啦
但又點會要呢種受過風霜嘅野菊呢
虛：皇宮又要一班新血啦
科舉嘅考官，「不取霜栽」
點會睇得上我呢
呢一首詩，好充分表達左李商隱早年失意之情
我地再自己讀一次：
野菊
苦竹園南椒塢邊，微香冉冉淚涓涓。
已悲節物同寒雁，忍委芳心與暮蟬。
細路獨來當此夕，清尊相伴省他年。
紫雲新苑移花處，不取霜栽近御筵。
陶淵明愛菊.
李商隱又愛菊,
係咪古代個個人都鍾意菊架?
屈原《離騷》：
朝飲木蘭之墜露兮，夕餐秋菊之落英。
最早嘅文學象徵，菊花代表高尚
梅蘭竹菊，君子四友
除非唔想做君子啦
如果唔係實會話自己鍾意呢四樣嘢
不過係咪真心就唔知啦
咁者係象徵大過實物.
皮已正
爬左好耐終於爬完
當年中學個陣有同學推薦我睇李商隱 (本身讀理科)
第一次睇錦瑟個陣真係驚為天人
之後睇埋佢一堆無題 真係覺得呢個人係傻架(讚賞)
期待壓軸既錦瑟
皮已正
爬左好耐終於爬完
當年中學個陣有同學推薦我睇李商隱 (本身讀理科)
第一次睇錦瑟個陣真係驚為天人
之後睇埋佢一堆無題 真係覺得呢個人係傻架(讚賞)
期待壓軸既錦瑟
多謝巴打睇哂呀 :^(
李商隱絕對係傑出嘅詩人
巴打中學就睇好勁，佢嘅詩唔係咁易入口
錦瑟係神作
我都好期待講呢首
皮已正
爬左好耐終於爬完
當年中學個陣有同學推薦我睇李商隱 (本身讀理科)
第一次睇錦瑟個陣真係驚為天人
之後睇埋佢一堆無題 真係覺得呢個人係傻架(讚賞)
期待壓軸既錦瑟
多謝巴打睇哂呀 :^(
李商隱絕對係傑出嘅詩人
巴打中學就睇好勁，佢嘅詩唔係咁易入口
錦瑟係神作
我都好期待講呢首
當然唔係直接睇李商隱詩集...
只係睇其他人既解說, 唔會識咁多典故
Ads
李商隱並唔係空手而黎
而係當野菊係一位好朋友一樣
帶埋酒與野菊相伴
回想科舉挫敗嘅心情
以酒消愁
李商隱並唔係空手而黎
而係當野菊係一位好朋友一樣
帶埋酒與野菊相伴
回想科舉挫敗嘅心情
以酒消愁
諗起豐子愷
小桌呼朋三面坐，留將一面與梅花
又係三條友不只欣賞梅，仲留個位比梅花，將佢當成朋友，齊齊談天說地
識利用菊既共通點來比喻自己身世
「沈淪下僚」的羈緒之聲
讀李商隱宿晉昌亭聞驚禽詩
之前講過，李商隱成世仔仕途不利
終其一生，都係「沈淪下僚」
即係成世仔都無做過咩高官
做人地手下居無定所，遠去異地
今次講嘅呢首詩，正正講緊呢樣嘢
李商隱因為要做東川節度使
要離別屋企，去到雲南果邊嘅鄉下地方呀
李商隱離開之前，去同令狐綯告別（即令狐楚個仔）
詩題中「晉昌亭」就係令狐綯嘅住處啦
宿晉昌亭聞驚禽
羈緒鰥鰥夜景侵，高窗不掩見驚禽。
鰥鰥：魚目，意指睜眼不閉
李商隱與令狐綯就好似兄弟咁一齊長大
係一對好好嘅朋友，令狐綯都成日幫佢
從詩題可見，李去同令狐告別
就「宿」係「晉昌亭」，發生「聞驚禽」一事
「羈緒」係咩呢？
古人成日用羈旅表達寄居他鄉的旅人
而李商隱雖然仲未動身，但已經感受呢種情緒
羈旅飄泊，無手機無電腦
古人遠走他方嘅苦況，絕對唔係現代人可以想像
有冇試過因為某種情緒
睜開雙眼，望住開左嘅窗口
夜色慢慢咁侵入房間
漸漸籠罩住張床
突然間受驚嘅雀鳥飛過鳴叫
會見到，係因為一直都無閉上過眼
飛來曲渚煙方合，過盡南塘樹更深。
呢兩句同上兩句係一個好緊密嘅勾連
我地會稱呢種手法為：點染法
點，即係宏觀大意嘅描寫
染，即係細膩局部咁描繪
前兩句講驚禽飛過
後兩句寫驚禽飛過咩地方
受驚嘅雀鳥飛過池塘
煙霧四散，將池塘籠罩往
呢隻小鳥似乎真係好驚咁樣
飛過左成個池塘都唔夠，仲要飛入樹林
肉眼已經睇唔到咁遠
呢種目視同想像，其實詩人都深有同感
一切都係迷糊不清，未來亦然
胡馬嘶和榆塞笛，楚猿吟雜橘村砧。
五六句係一大轉折
呢到可以視為：情境連類
詩人眼中嘅外景，同心中嘅內景合二為一
驚禽以至「胡馬」、「笛」、「楚猿」、「砧」
係客觀外在或者並唔相似
但係詩人嘅心目中卻能夠見到內在共通之處
「胡馬」出自詩經
「胡馬依北風，越鳥巢南枝」
北方嘅馬依戀北方嘅風
南方嘅鳥眷戀南方嘅樹
「榆塞」係以前秦朝北方嘅戰事基地
「嘶和」和「笛」嘅聲音
都係「羈緒」之音，都係飄泊在外嘅人
「楚猿」係楚山之猿
相傳佢地嘅叫聲係好悲哀
張九齡寫過「舊聞胡馬思，今聽楚猿悲」
都係將胡馬同楚猿連結埋一齊
「橘村砧」有製衣同洗衣兩種意思
而呢兩種聲音都係會令人思鄉嘅
試問有邊種情況留意呢兩種聲音呢？
往往就係遠走他方之時
失羣掛木知何限，遠隔天涯共此心。
羣：群
知何限：到底有多少？
以詩人為中心
李商隱將「驚禽」、「胡馬」、「楚猿」等等
作為情境連類，將佢地內在嘅共通連結
再化為詩句，技巧真係好高
「失羣掛木」即係話
離群嘅事物，獨自嘅事物
好似詩人棲無定所，沈淪下僚嘅情況咁
詩人發問：到底仲有多少咁樣飄泊在外嘅人事呢？
李商隱作為一個詩人
對事物嘅存在係具有獨特嘅
敏銳嘅眼光同感受
就算「遠隔天涯」
即使好耐好耐嘅以前
即使好遠好遠嘅地方
詩人都能夠「共此心」
與天下飄泊之人、事、物共鳴互通
文學嘅物我合一之境界
唯偉大嘅文學家用一生之經驗
終其一生嘅苦困先能夠達到如此有力嘅表達
我地係到再讀一次：
宿晉昌亭聞驚禽
羈緒鰥鰥夜景侵，高窗不掩見驚禽。
飛來曲渚煙方合，過盡南塘樹更深。
胡馬嘶和榆塞笛，楚猿吟雜橘村砧。
失羣掛木知何限，遠隔天涯共此心。
成首都寫得好完整!
我鍾意呢首多過上首
最緊要大家鍾意呀