史提夫陳 2019-4-11 22:02:40 第一次出遊記，多多指教

:^(

簡單講下呢次旅行先，四國同關東隔咁遠，點解要拉埋一齊玩呢？
因為小弟其中兩日要去河口湖睇演唱會，所以就格硬plan埋咗一齊，而家仲喺旅途途中，暫時都叫順利甚至好彩（因為大部分時間都好天）。
而經過同旅伴商量同考慮之後，四國我哋係放棄咗高知。德島原本都諗住留兩三日畀佢，但最後亦決定即日來回就算。

Day1：（香川）高松城夜櫻
Day2：小豆島
Day3：金戶比羅宮、父母之濱
Day4：烏冬學校、不動之淹、高屋神社
Day5：（愛媛）下灘車站
Day6：島波單車海道
Day7：伊予大洲、松山城、道後溫泉
Day8：（德島）鳴門海峽大橋
Day9：男木島、直島
Day10：津嶋神社、仏生山溫泉
Day11：（關東）東京－＞茨城
Day12：大洗海岸日出、日立海濱公園
Day13＆14：河口湖
Day15：本棲湖芝櫻祭
Day16：東京－＞香港

而家我正係喺Day11－＞12之間，喺民宿比較得閒，諗住趁對個旅程印象仲熱辣辣嗰陣分享下呢個旅程嘅點滴。
以下係目前為止嘅一啲精華：

卡數人生 2019-4-11 22:20:17 留名

史提夫陳 2019-4-11 22:29:43 Day1


今次之前去日本基本都係去大城市，即係東京大阪名古屋嗰啲，雖然事先都知高松機場係細機場，但落機望一望之後都係覺得有啲意外，覺得好「的色」

:^(

高松機場附近無任何鐵路，只可以搭巴士出返去高松市區，700幾yen左右。
沿途風光幾好，加上天色唔錯，好好彩影到張穌光。


由於窮撚無錢住靚酒店，首選都係平嘅酒店或者民宿，加上今次三個人有啲難訂房，最後搵咗好耐先喺Jalan搵到片原町附近嘅一間民宿，叫guest house madoka。
我無影到間民宿內籠，望落去可以話係比較陳舊，但我覺得都係一種味道嚟。一間都算大嘅和室房，大概就係三條友瞓喺小丸子爺爺嬤嬤間房咁嘅感覺。而且地方交通都算幾方便，附近咩都有，民宿主人亦非常好人。
不過最大缺點係間房無鎖匙，唔知其他房係咪都係咁，對於我呢啲去長旅行會帶電腦嘅人嚟講係唔太安心，所以之後去返高松住嗰陣都無揀返呢間。
不過貴重物品會跟身嘅人我幾推薦呢間。


橫穿高松市內直到琴平站嘅「琴電」，個人覺得幾有味道同時代感。



由於第一日落機都5點，所以當日唯一節目就係高松城夜櫻，平時要入場費嘅玉藻公園喺呢段期間會無料入場。
以前只係見過三兩棵盛開嘅櫻花，場入面都有唔少，不過到而家我都覺得影櫻花無人像（女）係有啲寡。加上燈光偏暗又黃又紅、位置、技術等等各種原因，最後都無影到幾張滿意嘅相。


夜晚去食高松嘅其中一樣特產－橄欖牛。

橄欖牛係咩呢？
喺高松港對出嘅小豆島係一個盛產橄欖嘅大島，而橄欖牛大概嚟講就係淨係餵佢哋食呢度啲橄欖嘅高級和牛，好似牛嘅血統之類仲有經過混種之類，資料可能有錯但大概係咁嘅意思，就結果嚟講就係呢種牛嘅口感同其他牛非常唔同。
呢間燒肉店叫さぬき焼肉庵 じゃぽん，就喺片原町附近。個人覺得還好，唔算太貴，份量亦都可以接受，食佢嘅特上品種係可以感受到橄欖牛嘅得點：入口即化，但牛味唔重無咁香。

Day1完

下午麼麼茶 2019-4-11 22:51:36 Lm
用咩相機同鏡影

:^(

毒撚夾band一個人 2019-4-11 23:08:58 留名G持

:^(

史提夫陳 2019-4-11 23:10:24 a73+1635GM+55 ROLLEI老鏡+70200GM

史提夫陳 2019-4-11 23:21:21 Day2


講到香川縣，最出名嘅就係烏冬。香川自己甚至用「烏冬縣」嚟做宣傳，所以第二日一出門就用tabelog搵咗附近一間分數都幾好嘅烏冬鋪頭。
間鋪頭細細間，第一啖食落去真係呆咗，以前聽人講過話香川嘅烏冬同平時喺其他地方食到嘅係完全唔同，就一直好好奇想試下。
我唔係咩食家唔識形容，但佢個口感、嚼頭同埋個湯嘅味真係顛覆咗我對烏冬嘅理解

:^(

（劇透一下，之後食咗間仲誇張）


高松車站被稱作四國嘅大門，係四國所有車站入面人流量最多，不過當然拎嚟同香港比就無意思，求其搵個地鐵站嘅人流都多佢唔知幾多倍……

由於唔記得查清楚入小豆島嘅船期，搞到浪費咗個幾鐘時間，呢度做個反面教材，千祈唔好用喺東京大阪嗰種心態喺四國玩，一定一定一定一定要查清楚巴士鐵路同埋船嘅時刻表。分分鐘一miss咗一班你就要on99坐喺度等成粒鐘。


原本有plan去丸金豉油廠玩下，但由於計劃有變，所以唯有去橄欖公園先。
我哋係買咗7日嘅四國pass，咁當中係包埋小豆島巴士嘅，但要留意小豆島啲巴士係比較疏，而且某啲線路好快就無車，所以一定要查清楚時間做足功課。
咁呢個橄欖公園好似話係宮崎駿畫《魔女宅急便》嘅參考原型，係真係假我無去深究，因為話自己係《千與千尋》油屋原型嘅靈感原型我都睇過好多次

:^(

風車附近有個中心會借原著把掃把畀你拎去影相，係唔使錢嘅，當然提提大家要有公德心一定要還返。



講到小豆島最知名嘅景點當然係天使之散步道，不過好可惜零零舍舍呢個area烏雲密佈，所以影出嚟都麻麻地，求其啪兩張交功課就算。
所以Day2可以話係最失敗嘅一日

:^(

返到去高松之後求其喺片原町車站隔離搵咗間叫「結家」嘅居酒屋食，氣氛關係無影到相，嘢食就so far so good啦，但憑住入門級數嘅日文同入面啲客人吹咗陣水。
間嘢得老闆娘一個睇檔踢曬，其他食客就算唔識或者第一次見都會即刻打招呼一齊吹水，成件事好似睇緊深夜食堂咁，成個feel幾好

:^(

Day2完

卡數人生 2019-4-12 02:13:37

但佢個口感、嚼頭同埋個湯嘅味真係顛覆咗我對烏冬嘅理解

係正面定負面

:^(

保麗龍 2019-4-12 02:55:44 Lm

史提夫陳 2019-4-12 03:46:51 哦sorry 係正面
超好食

:^(

放工放學放心放屁 2019-4-12 03:58:11
想知呢張係邊到

:^(

史提夫陳 2019-4-12 05:06:13 高屋神社 呢個之後會講
要去呢度都幾煩

史提夫陳 2019-4-12 05:07:15
尋晚太多雲乜春都曝唔到
好彩今朝個日出好成功
而家補眠先 晏啲搭車再更新

小弟. 2019-4-12 09:11:56 留名
D相好靚

一個無記性的人 2019-4-12 09:59:28

:^(

堀北真希2 2019-4-12 10:11:41 留名

史提夫陳 2019-4-12 10:32:57 Day3

第三日原本係book咗金刀比羅宮嗰頭間烏冬學校，但由於搭錯車所以時間就唔到就改咗下一日。
至於點解搭錯車，好似係架車到某個站就會分體之類，然後搭搭下一嘢去到舞雷宮咁遠，折返中轉站班車仲要等成50分鐘，一來一回又無咗接近兩個鐘。


中午求其食咗間烏冬，無乜特別就唔講了。
民宿老闆娘力薦我去食呢個烏冬味雪糕，我睇字就無話係烏冬味，但個雪糕係會落蔥花同豉油，成件事係幾得意

:^(

金刀比羅宮條街有好多手信鋪，其中有一間可以俾你自由定制木牌仔，先500yen一塊，拎嚟做手信/留念可以話係一流。

Archaeology 2019-4-12 10:37:20 小豆島其實係咪好廢? 見你都無乜點講
之前上網睇除左風車個位之外好似完全無特別

:^(

:^(

BTW D相好藍

:^(

kimorechi 2019-4-12 10:51:33 靚相，劉明

史提夫陳 2019-4-12 10:57:54 其實小豆島最大賣點應該係天使步道同秋天嘅寒霞溪

:^(

我上到島都三四點 所以都無去到咩地方
所以小豆島我好難評價

:^(

(tune色風格將就下，我色盲

:^(

)

史提夫陳 2019-4-12 11:06:06 續Day3



撞正金刀比羅宮櫻花盛開，行過條大街之後就到鳥居呢條櫻花路，影就好難影，但肉眼睇真係靚到dum一聲。
金刀比羅宮出名要行好長樓梯，由於小弟之前受過重傷。體力未回復得曬，加上仲要就時間趕去父母之濱，所以去到本宮就返咗轉頭，無上埋山頂，聽講山頂風光好靚。

講返少少背景嘢，金刀比羅宮係出海人專門拜嘅神明，類似我哋嘅龍母廟咁，而琴平呢個就係全國金刀比羅宮嘅本宮，所以山上面啲建築都起得幾宏偉精緻。
（不過上年去完日光東照宮，對比之下呢個係爭啲

:^(

）

然後就拿拿臨落山趕JR過父母之濱影日落，因為miss咗呢一班又要等大半個鐘。

珍妮斯 2019-4-12 11:34:36 留名 啲相嘅style好唯美

:^(

辛坦拿杜尼 2019-4-12 12:16:03 橄欖公園並唔係魔女宅急便嘅參考原型，佢係魔女宅急便真人版既拍攝場地

一生何求 2019-4-12 12:41:29

:^(

四國世界級

哈密瓜味雪糕 2019-4-12 12:47:21

:^(