MET60.00S9 2019-6-15 00:16:13

:^(

:^(

:^(

:^(

MET60.00S9 2019-6-15 00:16:40 波蘭果篇好精彩
唔係睇左果篇我根本對波蘭0認識

立鴨 2019-6-15 00:37:29 Reconquista果篇救得翻
天下三分Polandball睇下有無巴打有留

佛哥 2019-6-15 00:45:38 Llm

MET60.00S9 2019-6-25 21:20:53 膠登仔都睇得明既簡易西史入門最終回:大戰之路

歷史往往都係無厘頭既野 我地既世界一直處於量子狀態
你或者可以搵到你個代既因 但你永遠估唔到你為未來種左咩果
但上帝早已為我地擲出骰子

1836年10月2日一架叫小獵犬號既勘探船係英國普利茅斯上岸
冇掌聲 冇儀式 就如同每日係到出出入入眾多貨船一樣冇任何值得人關注既地方
船上面有個如呢架船一樣咁平凡既30歲地質學家 佢叫查理斯·達爾文
係佢呢五年航程中過多個隔世荒島見識到多種奇珍異獸啟發左佢諗出一個劃時代既理論
1859年11月24日佢終於出版左佢既名作 物種起源

小獵犬號航程


30歲時既達爾文

係物種起源起源入面佢提出所有動物都有共同祖先 今日眾多既物種係為適應環境演變互相競爭殘留既結果
...所以...人類既祖先係馬騮!!
哈哈哈睇條低B仔笑撚死人啦 或者你啊爺係馬騮 但唔係我囉哈哈哈
全世界既報紙會刊登呢篇報導時都會將佢擺係李力持隔離 而佢往往比李力持更受歡迎
但當呢樣發現落到政治家手上時就再冇人笑得出

物競天擇...適者生存...?
係喎...人類有咁多民族一定都係歷史演化既結果!!國家強大係因為佢地係優秀既民族!!優秀既民族有責任開化低劣既民族!!而低劣既民族最終將會被消滅!!
民族既生存就必須要征服其他民族!!我地係最偉大既民族!!冇人可以征服我地!!低等人種我黎開化你地啦!!

發表物種起源前既達爾文


達爾文既諷刺畫

普法戰爭後俾斯麥擔心法國復仇情緒就同俄羅斯奧地利結成三帝同盟
三國遭第三方國家攻擊時會共同防禦 三國共同抵制共和共產主義保障君主制度
簽左呢條盟約普魯士就可以放心保住佢係統一戰爭中"統一"返黎既土地
而俄羅斯亦都因為呢條盟約而變得有恃無恐

1875年鄂圖曼治下既波斯尼亞 羅馬尼亞 塞爾維亞 保加尼亞等斯拉夫民族相繼做反
鄂圖曼帝國一貫風格鐵腕鎮壓 俄羅斯以人道援助名義出兵巴爾幹
俄羅斯單方面改變巴爾幹現狀如無意外應該會引黎英國同奧地利強烈反彈就好似克里米亞戰爭咁
但上次英國可以企得咁硬因為有兩條友 一個叫巴麥尊 一個叫拿破崙三世 兩條友而家都唔係到啦
而奧地利從1848革命到奧普戰爭已經打到謝晒 再加埋條三帝同盟 奧地利連反對既聲音都叫唔出
加上俄羅斯以民族獨立作宣傳 將鄂圖曼包裝成暴虐既異教徒 而斯拉夫人就係可憐而堅強既耶教弟兄
再加多幾個美女警察 1877年4月27日俄軍嚴如正義之師開入巴爾幹半島 廢除1856年巴黎條約重建黑海艦隊
最後一直打到去伊斯坦堡門口

1878年3月3日鄂圖曼戰敗 俄土簽訂聖士提法諾條約
亞美尼亞 佐治亞 比薩拉比亞割讓俄羅斯
鄂圖曼承認羅馬尼亞 塞爾維亞 蒙特內哥羅獨立
鄂圖曼成立自治既保加利亞大公國
鄂圖曼改革波斯尼亞政治制度
鄂圖曼賠款二億一千萬盧布

MET60.00S9 2019-6-25 21:21:38
俄國佬半夜放狗(巴爾幹)咬鄂圖曼 英國警察匿係牆後面偷睇


聖士提法諾條約中保加利亞邊界

聖士提法諾條約一出街英奧即時反台
奧地利:成個巴爾幹你吞晒唔洗預我架啦!?
英國:你重建左黑海艦隊都算啦 仲係保加利亞攞左個愛琴海出海口!?
你敢簽聖士提法諾條約既我地絕對會向你宣戰!!

件事發到咁大俾斯麥就淆底啦
三帝同盟之一既奧地利同第三方國家既英國聯合向俄羅斯宣戰!?咁你地姐係夾我同俄羅斯開拖姐!?...你地後面我仲見到法國佬係到磨槍添...大家唔好嘈黎柏林坐低冷靜傾下
6月13日俾斯麥自稱德國係巴爾幹同愛琴海都冇利益絕對中立 邀請英法奧俄義土七國召開1878年柏林會議
一開頭俄國佬就話啦 場仗我打既!!所有野都係我應得既!!要搶既就同我條屍搶啦!!
你企咁硬會拖埋我落火坑 我係唔想咁先開呢個會架嘛!!...似乎用道理係講唔通呢條蒙古人咁點好呢...?
咁俾斯麥就企左去英奧個邊要求俄國嘔返保加利亞出黎令俄羅斯出唔到愛琴海
...我睇死你唔敢同全歐洲開戰...你只要隨便嘔D野出黎我都可以幫你兜...
點知俄國同法國結成第三勢力
巴爾幹同愛琴海關我咩事啊!?邊個打德國佬我就幫邊個!!唔係你以為我黎開咩會啊!?
哎扑街啦...唔只兇唔掂俄國佬仲逼左自己上戰場添...呢鋪我自己都冇得兜囉喎...
就係俾斯麥咁諗時意外就發生啦

俄羅斯皇帝亞歷山大二世訪問法國時比個俄國佬行刺不逐 俄國要求法國引渡犯人回國但被法國拒絕
盟友還盟友 我地民主國家黎 法律既野唔係你想點就點
仆你個街啦我最撚憎民主!!係我比機會你打德國佬咋!!你唔要就食自己啦!!
最後再搵唔到任何盟友既俄國佬終於向俾斯麥投降

7月13日英法德奧俄義土簽署1878年柏林條約
保加利亞大公國南部既馬其頓歸還鄂圖曼
英國向鄂圖曼租借塞浦路斯以保護鄂圖曼同愛琴海
承認羅馬尼亞 塞爾維亞 蒙特內哥羅獨立
波斯尼亞主權屬鄂圖曼 治權歸奧匈
鄂圖曼賠款二億盧布

1878年柏林會議

MET60.00S9 2019-6-25 21:22:59
紅白地方全部歸還鄂圖曼

呼 無驚無險保得住奧匈 禁得住法國佬 係俄國佬呢鋪7左D姐 我睇佢而家佢一定想搵柏林會議兩個起頭人開刀架啦...等我去搵奧匈先
1879年10月7日德國奧匈簽訂兩國同盟承諾如果其中一國被第三方國家攻擊另一國會保持中立 如攻擊者為俄羅斯既兩國就會共同參戰

1881年3月13日亞歷山大二世返到俄國又比人暗殺 今次終於死得 佢個仔亞歷山大三世繼位

亞歷山大二世遇刺

話說1705年突尼西亞有個酋長推翻左鄂圖曼派黎既總統建立左半獨立既突尼西亞酋長國
呢個係義大利對出從北非突出黎既角落頭 義大利統一左之後就一直想將佢佔為殖民地
不過就憑班意粉又真係難左D

1881年5月12日法國出兵突尼斯將佢地既酋長夾返巴黎逼佢簽左巴爾杜條約 將突尼西亞變成法國既保護國
義大利門口僅餘既擴張空間都比法國佬吞埋 結果將義大利逼向對立面
1881年5月20日意粉佬搵上左法國最大既敵人德國加入左兩國同盟結成三國同盟
就咁俾斯麥成功將德國兩大威脅孤立係歐洲兩邊 保住統一德國既成果
不過佢千算萬算就係算漏左個從來唔當自己係歐洲國家既歐洲國家

柏林會議後成立既保加利亞大公國搵左黑森大公個仔巴滕堡的亞歷山大·約瑟夫去做保加利亞大公亞歷山大一世 並且制定左套特維爾諾沃憲法
本來俄羅斯見佢係自己親戚先比佢上位既 但佢竟然係自己打返黎既斯拉夫人國家到建立立憲制度咁俄國佬就煽動保加利亞D軍官啦
佢係西方派黎既日爾曼君主 佢用西方既價值觀侵略我地斯拉夫人既信仰 西方反斯拉夫勢力亡我之心不死!!
班軍官就發動兵變推翻左保加利亞議會 將亞歷山大一世淪為傀儡
咁亞歷山大一世就親戚都冇情講反面去搵奧匈請求出兵幫佢恢復權力
結果班保加利亞軍佬直接廢左佢個位將佢趕返德國
咁俄國佬就準備搵個更信得過既人上位啦 不過奧匈同英國已經搶係俄國之前塞左個人落去
個個人就係英女王維多利亞一世個老公 薩克森-科堡-哥達家族既艾伯特親王個堂細佬個仔斐迪南一世

最後英國仲係1887年先後搵齊奧匈 義大利 西班牙三個環地中海國家簽訂地中海協定一邊防範法國係北非既擴張 一邊阻止俄羅斯南下
就咁俄國係第九次俄土戰爭中既成果終於全部比人分晒啦
同愛琴海講再見啦俄國佬 冇人可以係地中海挑我機!!

哎仆街啦...英國佬將俄國佬逼左入牆角...俄國而家周圍搵緊盟友...最有可能既一定係同英國係非洲爭緊殖民地既法國...如果比佢地兩個結盟既第一個比人開刀既一定係我...!!
俾斯麥諗到呢點1887年6月18日佢又揼低奧匈走去搵俄國簽左再保險條約
兩國與第三方交戰另一方將會保持中立 但唔包括德國攻擊法國或俄國攻擊奧匈既情況
德國將會係外交上支持俄國佔領博斯普魯斯海峽同達達尼爾海峽
條約有效期三年

點知1888年3月9日德國皇帝威廉一世駕崩 佢個仔腓特烈三世繼位
又點知佢做左九十九日皇帝6月15日又死埋
最後威廉一世個孫 腓特烈三世個仔 威廉二世登基皇位

腓特烈三世


威廉二世

威廉二世自細就係背後睇住俾斯麥縱橫歐洲南征北伐統一德國 佢對俾斯麥非常崇拜
佢成日周圍同人講 如果當年腓特烈二世下面有個俾斯麥係到 佢就冇資格比人叫做大帝啦
不過佢個英國老婆就咁回佢
係啊 所以英國人都叫佢做俾斯麥一世囉
從此就再未有人聽過威廉二世讚俾斯麥

1889年德國各地爆發工人運動 威廉二世希望寬容對待 俾斯麥就主張強硬鎮壓
最後兩個嘈到反左面1890年3月20日威廉二世就炒左俾斯麥
炒完俾斯麥之後威廉二世就幫威廉一世上大帝封號
乜撚野俾斯麥一世啊!?乜撚野俾斯麥大帝啊!?統一德國係我啊爺搞出黎既!!我啊爺先係大帝!!

領航員落船

個年既4月22日係奧地利既因河畔布勞瑙有個BB出世
佢唔係咩王室貴族既後人 佢唔係個年第一個BB 佢只係一個普通人有個普通名叫阿道夫
而佢啊爸姓希特拉

BB希特拉

MET60.00S9 2019-6-25 21:23:37 1890年6月18日再保險條約三年到期 俄羅斯想搵德國續約不過比威廉二世拒絕左
俾斯麥外交政策太飄忽啦一時一樣既 佢擺明唔撚識外交啦 等我表演比你地睇咩叫外交啦!!知唔知俄羅斯皇帝亞歷山大三世係我邊個啊!?佢係我表叔啊!!佢由細睇我大架!!FD底既野洗乜簽約姐!?心照架啦!!
個俄國外交官咁就比人趕返聖彼得堡 不過佢表叔就一D都唔心照啦
咩話!?拒絕左!?仆街啦...威廉二世炒左俾斯麥肯定係想過檔到奧匈個邊!!你!!即刻同我過巴黎!!同我夾撚死班德國佬!!

1894年法俄同盟建立 年尾11月1日俄羅斯皇帝亞歷山大三世駕崩 佢個仔尼古拉二世繼位
第二年1895年俄羅斯帝國首都彼得堡有條友叫弗拉基米爾·伊里奇·烏里揚諾夫創立左個工會叫工人階級解放鬥爭協會
呢條友有個更廣為人知既筆名 叫弗拉基米爾·列寧

列寧1895年12月

之後我地轉個話題去睇下一片從未進入過歐洲歷史既大陸既故事
就從希臘人將第一碌木頭掟落愛琴海時歐洲人就已經知道非洲大陸既存在
但佢地眼中所謂既非洲就只係撒哈拉沙漠以北既非洲
係撒哈拉沙漠以南既非洲要一直等到發現時代先被歐洲人所發現
但歐洲人發現左非洲之後並冇好似美洲咁瞬速被征服
點解呢?

非洲既地型有一大特色 就係冇山
北面一片沙漠 中部一片密林 南方一片草原
除左東部一座基力馬紮羅山之外成個非洲就係一大塊平地
咁冇山又會點呢?
冇山就姐係冇地型起伏 冇地型起伏水份就會平均分佈係地上而唔會形成河流
冇河流成個海岸線就會變得平直 海岸線平直歐洲人就搵唔到位泊船
到葡萄牙人圍非洲兜左個圈之後 歐洲人都只係建立到幾個繆繆可數既居留地作港口補給
而缺乏河流亦令歐洲人難以穿越叢林病毒深入非洲內陸
所以當沿海既黑鬼都被歐洲人拖晒去美洲種棉花時 係內陸既黑鬼仲好悠閒咁食緊猩猩

直到1877年一個英國佬一直沿剛果河東進最後終於發現左非洲最中心遠離人煙既剛果盆地
聽到呢個消息比利時國王利奧波德二世就即刻成立國際剛果協會尋求國際間既"慈善家"一齊去開化呢班最後原始部落
而其他國家得知仲有呢塊未劃分既土地都加緊步腳步行動 係西非既法國佬即刻操入剛果盆地建立左幾個殖民地
英國支持葡萄牙係莫桑比克既殖民地伸展到剛果盆地以東既海岸 阻止國際剛果協會得到印度洋出海口
所有歐洲國家都立齊架生準備分埋呢塊非洲最後既無主土地

咁1884年俾斯麥又請黎奧匈 比利時 丹麥 俄羅斯 法國 荷蘭 葡萄牙 瑞典 西班牙 意大利 英國 鄂圖曼去柏林召開柏林西非會議
最後與會各國簽訂柏林會議總議定書
國際剛果協會建立剛果自由邦 開放剛果盆地 馬拉維湖自由貿易
尼日爾河同剛果河自由開放 禁止販賣奴隸

就咁班剛果人得到歐洲先進文明既教化 終於得到自由啦

得到自由既剛果人

而係南非當年英國佬係維也納會議中得到荷蘭人既開普殖民地成為大英帝國係非洲第一個殖民地
但係開普殖民地既荷蘭人不滿英國既管治就離開左開普殖民地
1854年2月17日係開普殖民地東面成立左奧蘭治自由邦 1856年6月27日係開普殖民地北面成立左德蘭士瓦共和國
最初呢班被稱為波爾人非洲土生土長既荷蘭人同英國佬都相安無事
但後來班波爾人又頂唔順佢地D鄰居黑鬼祖魯人既侵擾又投靠返英國佬

1879年英國係祖魯戰爭中趕走左祖魯人後班波爾人又做反爭取獨立
咁英國緊係出兵鎮壓啦 但同祖魯人打左幾廿年交道既波爾人深熟遊擊既竅門
只係三個月既時間只以少量民兵就重創左大量英國正規軍
1881年8月3日雙方簽署普勒托利亞協定 英國承認波爾人國家完全自治權 英國只保留外交權利
咁大家又可以相安無事啦

但1884年德蘭士瓦共和國竟然挖到個金礦發左大達 咁佢地就未富先驕趕走晒境內既英國人
咩話你想獨吞!?德蘭士瓦係大英帝國自古以來神聖不可分割既領土一部分!!金礦既使用要交由全大英帝國人民去決定!!

就係佢兩邊係到爭緊時1898年4月10日德國通過左第一條海軍法落訂興建一支龐大艦隊
9月23日威廉二世宣佈要將德國變成世界性既海洋帝國 德國海軍要將德國帶去見到陽光既地方
不過當時仲未有人咁得閒理佢

1899年10月11日英國同波爾人又開拖 不過深知波爾人既勇武英國係全世界既殖民地調黎共五十萬大軍去屠宰八萬波爾民兵
雖然波爾人依然善戰非常 但英軍以東方帝國式既野蠻鎮壓將所有波爾人既村莊焚毀 平民掟入集中營 戰俘即時流放印度
不過英國既殘暴鎮壓激起左全歐洲人民既憤怒 大量既志願兵同物資流入南非
係戰爭中有個波爾人笠左個英國記者
個波爾人叫揚·史末資 個英國記者叫雲斯頓·丘吉爾

MET60.00S9 2019-6-25 21:24:40
波爾遊擊隊 其中一人係揚·史末資


第二次波爾戰爭時既丘吉爾

1900年1月英國海軍係南非沿海扣押左三架德國貨船懷疑載有支援波爾人既物資
但後來雖然証實左德國既清白而英國亦鄭重道歉 不過威廉二世順應民意係6月14日又通過左第二條海軍法再擴建多支更大既艦隊
呢個時候德國已經除代左法國成為世界第二大海軍國家僅次於英國

1901年1月22日維多利亞女王駕崩享年82歲
作為漢諾威家族既未代女王 佢唔似得前兩朝既未代女王咁 維多利亞一世係有仔生既
佢同佢亡夫薩克森-科堡-哥達家族既阿爾伯特親王生既仔繼位為愛德華七世
而維多利亞一世係德國個外孫威廉二世如同佢其他近親一樣 到最後一刻都一直陪係佢身邊
不過呢兩國既親密關係都到此為止

1902年5月31日波爾人投降 三年第二次波爾戰爭死左九千波爾人 十三萬平民被掟入集中營 四萬人死係入面
即使係咁英國都要保住南非究竟為咩 係為左金礦咩?

英軍屠殺波爾戰俘


波爾人集中營

係當時歐洲要去亞洲只有兩條路可以行
一條係向西出發兜過南美洲或係美國登陸搭火車去西岸進入太平洋
另一條就係兜過非洲經印度洋入太平洋
但呢兩條路其實冇咩分別 閒閒地都要行成年先去到亞洲
人既話忍下就得 但貨既話有好多野冇可能係船倉入面擺成年個喎
而且咁長既航程仲會增加左運送既風險 呢個時候麻煩既起因反而係問題既答案 非洲既平坦反而變成佢既優點

既然非洲係冇天險既 咁就可以係開普敦一條直線鋪到上尼羅河出地中海入歐洲囉!?咁我只要係非洲打直佔領一條殖民地出黎就得啦!!
呢招就係英國既非洲縱斷政策
不過係同時又有另一個人諗緊同樣既野
我岩岩佔領左突尼西亞 再加埋紅海出口既吉布提 只要鋪條鐵路將呢兩點連埋咁我咪可以好快去到亞洲囉!?
呢招就係法國既非洲橫斷政策

呢兩個國家同時係非洲上面畫出一個十字 無可避免一定會係一點上面相撞 可以實現計畫既人注定只有一個
呢點就叫法紹達

紅色為法國殖民地 黃色為英國殖民地 綠色為德國殖民地

法紹達係一座位於尼羅河上游由法國控制既要塞
克里米亞戰爭後由穆罕默德·阿里家族世襲既埃及逐漸淪為英國既保護國
而係埃及東南部仲未為任何歐洲國家所控制既埃塞俄比亞多年黎一直深受埃及所威脅
而法國係東非唯一既殖民地吉布提就係埃塞俄比亞入面 故此維持埃塞俄比亞既獨立就係對吉布提既緩衝
而要解救吉布提最根本既方法就係將英國趕出埃及

法國威脅如果英軍唔撤出埃及既話就會係尼羅河上游興建水壩截斷尼羅河
呢個威脅令英軍不得不佔領整條尼羅河 又或者撤出埃及
咁英軍就沿尼羅河而上進攻法軍係上游既法紹達要塞
收到英軍行軍既情報 1897年5月係吉布提既法軍又操向法紹達
1898年9月兩軍到齊法紹達互相對峙

時刻都準備向德國報復既法國保有當時全歐洲甚至全世界最強大既陸軍
但地中海大西洋印度洋都係英國無敵艦隊控制下 法國深明呢座沙漠中心既要塞冇可能獨力支撐
兩邊互睥左個幾月後法國首先軟化 係法軍撤兵後英軍都退返尼羅河下游
大家都當咩事都冇發生過 第二年南非就爆發左第二次波爾戰爭
第二次波爾戰爭後德國海軍堀起威脅到英國本土 加上國際形勢上被受孤立
英國明白到歐洲各國係亞非再度擴張令佢必會成為眾矢之的 佢冇可能再光榮孤立靠一國力量保護佢既全球帝國
而且佢條南北直線係仲未畫好既 係英屬南非同蘇丹之間既中非被兩個國家所阻隔
一個係比利時既剛果自由邦 一個就係德屬東非既坦桑尼亞
英國係非洲既大富翁遊戲撞上德國呢個釘子戶 而家英國係全世界再搵唔到第二個敵人啦

MET60.00S9 2019-6-25 21:24:56
法軍進軍法紹達

1904年4月8日英法簽署摯誠協定
你想打德國佬?我幫你拖 不過埃及同開普敦之間既非洲我既 你要承認我係埃及既優先權而我就會送摩洛哥個優先權比你 另外我仲會開放蘇彝士運河比你游水 咁你滿唔滿意?
哇攞到地中海出海口 直布羅陀對面既摩洛哥 呢鋪我家山發啦!!不過摩洛哥岩岩比法國接手就陷入財政危機
唔緊要 法國佬幫佢還晒條數 但佢以後六成關稅要落法國袋 比法國軍官幫佢組織軍隊 同埋由法國資本幫佢成立國家銀行
到而家摩洛哥嚴如法國既摩洛哥省 但冇計 鬼叫形勢比人強

1905年3月31日德國皇帝威廉二世到摩洛哥既丹吉爾渡假
咁你渡假咪渡假囉 但佢又走去發表公開演說支持摩洛哥保持獨立地位譴責法國經濟侵略
聽佢咁講全法國佬即刻起晒機 打佢!!打佢!!為普法戰爭報仇!!

知自己講大左威廉二世就想請法國坐低傾摩洛哥既利益分配啦
仲傾!?我搵咁多盟友就係為左塞鑊你咋!!英國佬!!一齊上!!
見法國佬咁興奮英國佬又淆底喎 我同你簽盟約姐冇諗過幫你打仗架...
屌你地班英國佬從來都係咁既...唔緊要我冇期待過你地反正我仲有一個盟友...俄國佬!!幫拖!!
...咦...俄國佬呢...?
我同班蘿蔔頭打緊啊!!點解班黃種馬騮突然咁撚好抽既!?
...唔...咁我地坐低傾囉...

1906年1月16日英美法德俄奧西葡荷比義土共十三個國家一齊係西班牙召開阿爾赫西拉斯會議
4月7日簽署阿爾赫西拉斯議定書 各國保證摩洛哥獨立同領土完整 摩洛哥經濟向各國平等開放
摩洛哥國家銀行由英法德西共同管理 摩洛哥軍警只可以聘用當地穆斯林 由法國西班牙訓練 瑞士人監督

摩洛哥代表係阿爾赫西拉斯會議簽紙

1905年9月5日日俄戰爭結束 俄國係亞洲既擴張被日本人煞停 英俄為爭奪亞洲既大博亦亦隨之結束
1906年2月10日英國第一架無畏級戰列艦下水
1907年8月31日英國搵埋俄國佬簽署英俄協約共同劃分亞洲勢力範圍
波斯北部起到阿富汗以北既亞洲內陸歸俄羅斯 波斯南部起到英屬印度以南既亞洲沿海歸英國 西藏問題一切必經中國政府解決

MET60.00S9 2019-6-25 21:25:52
無畏艦

1908年德國一年內就建成左四架無畏級戰列艦
本來英國既海軍政策係保持自己既艦船數量係第二第三大海軍家戰艦既總和
但德國不斷擴建海軍令英國冇辦法再以呢個標準去增建船隻 呢鋪英國終於將德國視為對手
英國海軍提出兩倍政策 姐係我地要維持海軍數量係德國兩倍以上 就算我地唔要全世界既殖民地我地都要做冧班德國佬!!

1908年7月3日鄂圖曼係馬其頓既軍官做反要求憲政
佢地進軍伊斯坦堡沿途得到軍民響應最後推翻左鄂圖曼蘇丹阿卜杜勒·哈米德二世
趁鄂圖曼內亂俄奧都乘機係巴爾幹擴張勢力
俄羅斯支持鄂圖曼個屬國保加利亞大公國獨立為保加利亞王國 而奧匈就將只有管治權既波斯尼亞併入境內
但俄國佬條靚塞爾維亞就不滿囉喎

我地塞爾維亞人成世踎係巴爾幹中心既深山中刀耕火種一窮二白 我地想要波斯尼亞做出海口黎做D生意啊 你唔係就咁就比奧匈吞左波斯尼亞下嘛!?我地大家都係斯拉夫人黎個喎!?
但我地俄國岩岩打輸左日俄戰爭仲未有力打第二場仗...更何況對手奧匈有咁多FD?
屌外面D國家都唔可靠既 要強大起巴爾幹國家果然就只可以靠返巴爾幹國家 泛斯拉夫主義已經玩完啦 以後巴爾幹半島只有泛塞爾維亞主義 我以後唔會黎搵你架啦

因為自己既國家日益被外國人操控1911年初摩洛哥發生反法暴動 4月法國出兵鎮壓
7月1日德國以撤僑為名派出一架無畏艦進入摩洛哥既阿加迪爾 英法兩國見到就即刻一齊彈出黎強烈譴責
即刻開走佢唔係就開拖!!
好笑啦 根據阿爾赫西拉斯議定書摩洛哥經濟應該向各國平等開放 但你地呢幾年做既野明顯係法國獨大 如果你地保障唔到我係摩洛哥既利益咁我都有權去出兵執行阿爾赫西拉斯議定書啊?
英法即時被駁到冇聲出 ...咁我係第到搵D野賠比你 摩洛哥既野你唔好搞...
11月4日德法通過剛果協定 德國將喀麥隆北部交比法國 法國將法屬剛果交比德國 德國承認摩洛哥為法國殖民地
事後威廉二世氣憤表明我讓步已經夠多啦!!我已後唔會再係殖民地問題上向英國讓步!!

雖然又一場外交危機被和平解決 但英國同德國都咬上左對方
自此歐洲分成三國同盟三國協約兩大派
佢地各有盤算 但佢地都期望住一場大戰為佢地大洗牌
而家全歐洲變成一大座火藥庫
佢地等緊既只係一點既火花

係英法德為摩洛哥嘈緊時9月29日義大利以保護自己係的黎波里既利益為名出兵鄂圖曼
義土戰爭爆發 而係鄂圖曼軍入面有個軍官仔佢叫穆斯塔法·凱末爾·阿塔蒂爾克

左方係義土戰爭時既凱末爾

見義大利咁既二流國家都可以隻抽鄂圖曼鼓起左巴爾幹諸國既勇氣去解放全巴爾幹半島既泛塞爾維亞民族
1912年3月塞爾維亞 保加利亞成立巴爾幹同盟 5月蒙特內哥羅 希臘加入
10月8日蒙特內哥羅向鄂圖曼宣戰 17日塞爾維亞 保加利亞向鄂圖曼宣戰
18日鄂圖曼向義大利投降 義土簽訂洛桑條約 義大利得到的黎波里同昔蘭尼加 同日希臘向鄂圖曼宣戰

近九十萬巴爾幹同盟大軍痛毆三十萬鄂圖曼兵
土軍節節敗退失去整個巴爾幹半島一直退到入伊斯坦堡 11月28日阿爾巴尼亞宣佈獨立
到12月2日列強介入巴爾幹同盟停火齊齊去倫敦開1913年倫敦和會

巴爾幹同盟圍毆鄂圖曼惡龍

第一次巴爾幹戰爭前巴爾幹地圖

係倫敦和會中巴爾幹同盟準備瓜分晒鄂圖曼係巴爾幹既領土
特別係保加利亞向南係愛琴海開個出海口 同塞爾維亞向西係阿德利亞海開個出海口
保加利亞同希臘就安然瓜分左馬其頓 而塞爾維亞就希望可以吞併阿爾巴尼亞
但塞爾維亞係阿德利亞海兩個鄰居奧匈同義大利就彈出黎啦
唔得!!塞爾維亞再吞埋阿爾巴尼亞就太強大啦!!比阿爾巴尼亞呢D小國維持獨立就得!!
...但阿爾巴尼亞同我地都係同文同種既塞爾維亞人黎個喎...
屌你地民族既野我理撚得你 總之唔得就唔得!!
仆街奧匈...你地侵略我地波斯尼亞同胞單野都仲未同你計啊...!!

1913年5月30日簽署1913年倫敦條約
保持阿爾巴尼亞獨立 塞爾維亞 蒙特內哥羅 阿爾巴尼亞平分科索沃 保加利亞得到色雷斯
剩低既馬其頓由巴爾幹同盟自己圍內分掂佢

波斯尼亞同阿爾巴尼亞兩個西出阿德利亞海既希望都冇左 塞爾維亞既目標改為南下係愛琴海開個出海口
塞爾維亞就希望可以係愛琴海分返個個出海口 但保加利亞就企硬唔受
你ON9 個到全部都係保加利亞人既土地 我只係攞返我係聖士提法諾條約應得既土地!!點解要分比你!!
喂你成個愛琴海北岸你一個人吞晒喎!!有冇咁撚貪啊!?我剩係想要一個港口仔姐!?
成場仗打得最落力係我!!要大份D有咩唔岩啊!?
OK你唔比我啊嘛!?希臘!!你覺唔覺保加利亞係倫敦條約入面分得太多啊!?覺啊嘛!?一齊郁佢!!
而係保加利亞後面又有奧匈係到煽風點火
岩啦我一直睇塞爾維亞唔順眼好耐架啦 條扑街成日係後面搞9我個波斯尼亞 你郁佢我撐你!!開拖啦!!

6月16日保加利亞向塞爾維亞希臘宣戰
點知一開波兩個冇參與馬其頓紏紛既國家蒙特內哥羅同羅馬尼亞又打埋一份向保加利亞宣戰
最後鄂圖曼見全巴爾幹半島一齊圍毆保加利亞佢又唔執輸揼個一蚊入黎
7月29日保加利亞投降 8月10日簽署布加勒斯特條約
多布羅加北部割讓羅馬尼亞 馬其頓分三分 一份華達馬其頓歸塞爾維亞
一份皮林馬其頓歸保加利亞 一份愛琴馬其頓歸希臘
保加利亞係第一次巴爾幹戰爭時係鄂圖曼手上打返黎既土地都嘔返比鄂圖曼

兩場巴爾幹戰爭之後塞爾維亞一躍成為巴爾幹第一大國 雖然佢地仲未得到佢地夢寐以求既出海口
不過正因為咁佢地又將目光放返去佢地係波斯尼亞既同胞身上

第二次巴爾幹戰爭後巴爾幹地圖

1889年1月奧匈皇帝弗朗茨·約瑟夫一世獨子魯道夫精神病發自殺身亡
佢死後皇位繼承人就落到弗朗茨·約瑟夫一世個甥弗朗茨·斐迪南到
但佢好衰唔衰愛上左個捷克裔既女侍官蘇菲
咁哈布斯堡家上下就群起反對
唔得!!你係奧匈帝國既皇位繼承人!!為你帝國著想你老婆一定要係歐洲王室成員!!
我同蘇菲係真心相愛架!!我地係羅密歐與朱麗葉 梁山伯與祝英台!!我地要逃離咁封建既家庭!!蘇菲我地私奔啦!!
好啊弗朗茨 為左你 我走到天腳底我都願架
唉算啦怕左你地啦...結婚還結婚...你條女婚後唔會得到貴族代遇 你地個仔亦冇權繼承皇位 咁你地受唔受?
多謝表叔!!

1900年7月1日弗朗茨·斐迪南同蘇菲成婚 從此公主同王子就過住幸福與快既生活
蘇菲啊 你係捷克人 一定明白係我地奧匈帝國小數民族既處境係幾咁悲慘
係啊弗朗茨 如果我地可以拯救到佢地就好囉
冇錯我地奧匈唔應該係奧地利匈牙利二元帝國 我地奧匈帝國唔只兩個民族 我地奧匈唔可以再做民族囚牢人類公敵 我將來登基之後要建立奧地利匈牙利斯拉夫既三元帝國!!到時你既同胞都會得到解放 你話好唔好姐?
好啊老公!!你實在太偉大啦!!
咁事不宜遲 我地去新加入奧匈帝國又有好多斯拉夫人既波斯尼亞行下囉!!
好啊!!...不過弗朗茨...我話你知啊...其實我有左三個月既身孕啊...
咩話!?太好啦!!咁我地去完波斯尼亞返黎就生個肥肥白白既BB啦!!

MET60.00S9 2019-6-25 21:27:29
弗朗茨·斐迪南


蘇菲

塞爾維亞首都貝爾格勒 係佢地首相官邸有個法國大使搵到上門
聽講奧地利個皇儲去左波斯尼亞喎
係啊咁又點?
如果你地搵人係個到對冧左佢 唔知奧匈會點反應啊啦?
哇你唔係咁害我下嘛...
放心啦...俄國佬想郁奧匈好耐啦 只要我打埋一份德國佬一定唔會睇住奧匈死既 到時...
就係為左咁無聊既理由搞咁多野...?
對我地黎講一D都唔無聊 只要德國參戰英國都會打埋一份 你估到時就憑德奧兩國點頂全世界...?...事後我會比你係波斯尼亞劏返幾刀...
唔得!!...唔係幾刀...我要全部!!
隨便你啦...

1914年波斯尼亞首都薩拉熱窩
南歐地中海氣候既夏天 如果忘記呢個名字係往後歷史留低既形象呢到亦不失為境色宜人既渡假勝地
係外面法國人嘈住要點樣生劏德國佬 英國點樣為自己既殖民帝國叫囂
德國為自己既生存空間磨槍煉炮 俄奧一口咬住鄂圖曼既身體一手鍊住對方既喉嚨
係到只要一陣地中海風就將外面既紛爭全部吹走
無論係奧地利皇帝定鄂圖曼蘇丹 邊個坐佢地頭上都冇所謂 每個人都享受住佢地習以為常既生活
至少當時仲係咁和平既地方

6月28日弗朗茨·斐迪南夫婦既車隊開入薩拉熱窩向奧地利軍營進發 沿途民眾夾道圍觀
一個19歲塞爾維亞族青年加夫里洛·普林西普離開人群潛入後巷
係秘密既老地方 一班塞爾維亞族激進青年係到聚會
見唔見到啊?
見到 好清楚 真係奧匈皇儲弗朗茨·斐迪南
仆街奧地利佬 竟然係我地塞爾維亞國慶日閱兵!?
唔緊要 隻維也納暴君既繼承人自己送上門 我要比佢見識下踐踏我地民族領土係咩代價!!
大家準備左D咩啊!?
我有幾個手榴彈
我有支手槍
夠做啦 搵幾個人睇水 幾個人搬手榴彈 查布林諾維奇負責掟 普林西普你就負責最後上去補幾槍啦
大家知點做啦嘛!?上!!


加夫里洛·普林西普

朝早10點3係人群中突然撲出一個人影向弗朗茨·斐迪南既車隊掟出幾個手榴彈
但計錯時機 弗朗茨·斐迪南既坐駕開走後先爆炸 自係炸傷左車後既護衛
查布林諾維奇見事敗就跳河逃走 但好快比警衛拖返上黎押走
其他人見查布林諾維奇比人拉左都準備返屋企訓覺
不過我肚餓喎 不如去食D野先啦?
哦咁去囉 行囉行囉

哇老公 好驚啊岩岩我地係咪差D比人行刺啊?
唉 做王室既野係咁架啦...可憐後面幾隻實Q...司機我地唔好去軍營啦 改去醫院探下佢地啦
YES SIR
弗朗茨·斐迪南支車隊去到薩拉熱窩市政廳之後就轉向醫院進發 而帶頭車隊唔知道後面改變左方向繼續向軍營方向前進

係遠離車隊預定路線既地方 普林西普悠閒咬住佢塊三文治
突然嚇見弗朗茨·斐迪南既車隊再次出現 因為呢到唔係車隊預定路線所以冇乜人圍觀
而且唔知點解護衛仲少左一半 見咁既情況普林西普即刻揼低佢舊三文治抆出佢懷中既手槍衝向弗朗茨·斐迪南


弗朗茨·斐迪南夫婦離開薩拉熱窩市政廳前往醫院

1914年6月28日弗朗茨·斐迪南 加夫里洛·普林西普
兩個人背負住五個國家既仇恨各自走上佢地人生既道路
佢射既唔係子彈 係上帝既骰子
佢殺既唔係弗朗茨·斐迪南 係哈布斯堡同佢背後一切既君主國家

10點50分薩拉熱窩拉丁大橋
所有人都返唔到轉頭

拉丁大橋

膠登仔都睇得明既簡易西史入門完

7月23日奧匈帝國向塞爾維亞王國發出最後通牒
7月28日奧匈帝國向塞爾維亞王國宣戰
8月1日德意志帝國向俄羅斯帝國宣戰
8月3日德意志帝國向法蘭西第三共和國宣戰
8月4日大不列顛及愛爾蘭聯合王國向德意志帝國宣戰
8月6日奧匈帝國向俄羅斯帝國宣戰
8月12日大不列顛及愛爾蘭聯合王國向奧匈帝國宣戰

係車上被炸開半個頭既弗朗茨·斐迪南用佢最後一口氣搖晃佢身旁早已冰冷既屍體
...蘇菲...唔好死啊...為我地個仔...唔好死啊...


https://youtube.com/watch?v=KyLSUZ1qlVM

MET60.00S9 2019-6-25 21:31:56
原作者
膠登作者：神谷奈緒老公 原名：蘿蔔絲比耳 膠登會員編號：3227
LIHKG月岡恋鐘老公 #199613

感謝原作者無私奉獻

:^(

:^(

:^(

:^(

我就post晒上黎啦 功成身退

:^(

再見各位

:^(

:^(

希望大家睇多d歐洲史

:^(

瑞士寶 2019-6-25 22:23:16 此回覆已被刪除

法比加拿斯尼 2019-6-25 23:13:16 多謝哂

:^(

:^(

:^(

:^(

:^(

:^(

機界原種 2019-6-25 23:26:47

:^(

10LV 2019-6-26 01:41:20 此回覆已被刪除

MET60.00S9 2019-6-26 05:29:01 無啊 已完

:^(

MET60.00S9 2019-6-26 05:30:31 真心感激原作者
佢篇篇都一萬字
唔係佢我都唔知法國大革命咁癲
拿破崙咁勁
同埋歐洲中世紀既一段故事

:^(

:^(

:^(

瑞士寶 2019-6-26 08:22:09 此回覆已被刪除

瑞士寶 2019-6-26 08:24:14 此回覆已被刪除

瑞士寶 2019-6-26 08:26:19 此回覆已被刪除

https 2019-6-26 08:28:04 Lm

瑞士寶 2019-6-26 08:29:27 此回覆已被刪除

瑞士寶 2019-6-26 08:31:09 此回覆已被刪除