MET60.00S9 2019-6-14 21:22:28
淺藍色為普魯士盟友 粉紅色為奧地利盟友

義大利如約對奧地利宣戰 佢地既正規軍從倫巴底進攻威尼托 而加里波底就帶住佢支阿爾卑斯獵兵進入蒂羅爾
係德意志北部普魯士及其盟軍好快就搞掂左荷爾斯泰因 漢諾威同薩克森
兩路作戰既奧地利 佢地既主力為報瑪麗亞·特蕾西亞兩戰之仇從波希米亞進入西里西亞
而有更完善鐵道網路既普魯士好快從北方調黎三支軍團共廿萬人分三路從薩克森進入波希米亞從後截擊奧軍
一支係四萬人既易北軍團 另一支係八萬人既第一軍團 同一支十萬人既第二軍團

7月2日第一軍團係波希米亞既克尼格雷茨村中發現奧地利正在北上既廿萬主力軍就即刻發電報通知係周圍搵緊奧地利軍既易北軍團同第二軍團
當晚只有易北軍團及時趕到係克尼格雷茨村以北同第一軍團會合 而家兩軍團加埋總共有十二萬人但係南面既克尼格雷茨村中卻廿萬奧軍向佢操緊埋黎

第朝7月3日廿萬奧軍趁自己仲有人數優勢主動發起進攻
奧軍坐南向北展開陣形 奧軍既炮兵擺係後方一座高地上 奧軍同普軍之間又隔左一片森林
對面普軍右翼係易北軍團 左翼係第一軍團 因為人數只有對方一半兩翼都暴露係敵軍面前隨時有被包圍殲滅既可能
但第二軍團有十萬人係東面正日夜兼程開往戰場 只要崖到佢地黎既話或者可能...

8點係山上奧軍既炮兵居高臨下掃射係平地上既普軍 但普軍既炮兵卻被眼前既森林阻擋只能默默承受奧軍單方面既轟炸
係炮火掩護下奧軍左翼兜過森林包圍向易北軍團將普軍釘死係呢片難守難攻既平原
同時奧軍既中路就進入中間既森林以牽制普軍既行動範圍
為突破奧軍既包圍 第一軍團派出第七師驅趕森林中既奧軍

係森林中奧軍發現普軍向自己前進就舉槍準備作戰啦 但奇怪既係普軍既佈陣
佢地唔係整齊既戰列橫陣 而係零零碎碎三三兩兩散住步咁行埋黎
乜撚話!?呢支就係地上最強既普魯士陸軍!?連戰列都排唔成既!?小學雞黎郊遊啊!?哈哈哈
突然班普魯士兵住部爬低 突然訓低晒做咩啊!?係咪準備野餐啊!?哈哈哈
嘭!!
一下槍聲個奧地利兵就訓低左
咩事!?咩事!?
然後係草地中不斷傳黎槍聲 奧地利軍一個個應聲倒下
佢地竟然爬係地下開槍!?點做到架!?
冇錯火槍係冇可能爬係地下射既 因為你就算爬係地下開槍你地都要企返起身揸實支槍打住飛機咁上子彈
但普魯士軍既火槍唔係係槍管入子彈既前膛火槍 而係係槍管後面入子彈既後膛槍

以往火槍射擊方法都係係槍口先入火藥再入子彈再塞實佢先可以開槍
呢個過程係非常晒時間 所以步兵要分成好多排戰列逐排上彈逐排射擊
而今次普魯士既新式步槍就解決左呢個問題
佢地將火藥預先塞實係一個彈殼入面 再係彈殼上面裝上彈頭 咁就完成一粒完整既子彈
而佢既火槍就係後方開一個彈倉打開彈倉將子彈放入去 入面有支撞針
禁著板機支撞針就會快速插入子彈底部噠著入面既火藥彈頭就會被炸出去
射完之後打返開彈倉入面就剩低個空既彈殼 揼左佢換個新子彈上去
咁就每個士兵都可以快速射擊唔洗再排成動作遲鈍既戰列
另一方面因為從後方入彈 士兵唔洗再企起身上彈 佢地就可以爬係地下射擊減少左對方射擊既面積

MET60.00S9 2019-6-14 21:23:20 普軍一邊快速掃射住揸住支槍打飛機既奧地利軍 一邊匍匐前進
係森林中既奧地利一隊隊被擊退 係後方既奧地利軍只好們更多既兵力入去
但全部都慌惶逃出 最後普軍既第七師就好似蜥蝪一樣咁係森林中躝出黎
咩話...!?只係一支師就打退左我成支中路!?普魯士既步兵係怪物黎架!?叫左翼既人返黎同我死都將班普魯士人拖出森林!!
突然有炮從奧軍既右方轟向奧軍既右翼 係普軍第二軍團趕到
而家係戰場上普軍有廿二萬人 無論係裝備定人數普軍都超越左奧軍戰況逆轉
晏晝2點第二軍團先頭騎兵再上演多次窩打老奔襲後方既戲碼直衝奧軍後方既炮兵高地
而家輪到奧軍享受單方面炮擊既滋味

克尼格雷茨戰役 普軍死二千傷七千 奧軍死六千 傷七千 降二萬二 八千失蹤
一場戰役就決定左奧地利既命運 德意志科技力量世紀第一!!
7月22日普奧停火
8月23日普魯士奧地利簽署布拉格條約
普魯士吞併石勒蘇日格-荷爾斯泰因 漢諾威王國 黑森-卡塞爾 拿叟公國 法蘭克福自由市
奧地利解散德意志邦聯 普魯士成立北德意志邦聯奧地利不得參與及干預




克尼格雷茨戰役


https://youtube.com/watch?v=Myv6vlJbS_U

1867年4月16日通過北德意志邦聯憲法 北德意志邦聯成立
除南德既巴伐利亞王國 符騰堡王國 巴登大公國之外大部份德意志邦國都加入左北德意志邦聯
北德意志邦聯加盟國有全部既自治權 邦聯間既事務由普選既邦聯議會負責
普魯士國王任邦聯主席並總領邦聯既軍事同埋任免邦聯首相
咁邦聯首相唔洗問當然就係俾斯麥啦

MET60.00S9 2019-6-14 21:24:44
藍色為北德意志邦聯

北德意志邦聯會議

而冇左德意志主導權既奧地利只好乖乖返佢既老家安安份份做佢既奧地利皇帝
但係對住冇左德意志主導權既奧地利皇帝 佢地既臣民就唔會安份啦
奧地利境內各民族又要求擴大佢地既自治權 弗朗茨·約瑟夫一世當然冇可能一一答應
但佢可以答應一個

5月29日奧地利匈牙利通過折衷方案 匈牙利以幫手鎮壓其他民族換取奧地利給予自治權
弗朗茨·約瑟夫一世加冕為匈牙利國王同奧匈帝國皇帝 奧匈帝國成立
奧地利同匈牙利分別成立權力對等既政府 兩國奉共同君主 由奧匈帝國皇帝負責軍事同外交

弗朗茨·約瑟夫一世加冕匈牙利國王

奧匈帝國政區劃分 紅色歸維也納政府管轄 綠色歸布達政府管轄 黃色遲D再講

雖然德國仲未完全統一 但佢既故事可以到此為止
之後我地就聽D無關重要既故事啦
1833年9月29日西班牙國王斐迪南七世過身
王位繼承既問題就好似詛咒一樣幾百年黎一直纏繞住呢個國家

斐迪南七世四十幾歲人結過三次婚叉燒都生唔到塊
不過唔知好唔好彩 到佢45歲結第四次婚時娶左個兩西西里公主瑪麗亞·姬絲汀娜
佢兩個生左兩個女 一個叫伊莎貝拉 一個叫路易莎·費南德
之後斐迪南七世就一病不起

不過斐迪南七世生個兩個都係女 咁如無意外斐迪南七世死後就會由佢細佬唐·卡洛斯繼位
唐·卡洛斯係個不下於佢啊哥既激進保守派 咁瑪麗亞·姬絲汀娜就趁佢老公病懵左就走去同議會傾啦
如果你地修改繼承法比我個女上台既我就比條好自由既憲法比你地
咁西班牙議會就改左繼承法比女人可以繼承王位 令斐迪南七世兩個女既繼承順位都爬左唐·卡洛斯既頭
然後佢地再將唐·卡洛斯流放到葡萄牙
冇耐斐迪南七世就死左由佢3歲既大女繼位為伊莎貝拉二世
係葡萄牙既唐·卡洛斯又宣稱自己係西班牙國王號召國內既保守派做反
兩邊就打左七年既卡洛斯戰爭到1839年先結束
係到西班牙軍有個將軍漸露頭角 佢叫胡安·普里姆

伊莎貝拉二世

胡安·普里姆

1843年瑪麗亞·姬絲汀娜過身 13歲既伊莎貝拉二世親政
1846年伊莎貝拉二世下嫁一個GAY佬弗朗西斯科·德·阿西西·德·波旁
不過好衰唔衰伊莎貝拉二世成世人最中意就係扑野
但佢又唔係咩男人都岩 佢最中意就係耶撚同軍佬
就咁一大班耶撚同軍佬就靠伊莎貝拉二世關係入到政府日日同自由派既議會你鬥我鬥你

然後到1861年1月11日一個叫貝尼托·胡亞雷斯既法官係美國既支持下當選墨西哥總統
呢個西班牙既前殖民地繼承左佢地前宗主既宗教教狂熱 全國人民一直都係忠貞既大公教徒
呢點對佢個以新教為主既鄰居美國黎講一D都唔舒服 基於門羅主義令墨西哥更世俗更遠離歐洲既影響完全係美國既利益所在
美國支持墨西哥既自由派對抗墨西哥政府令墨西哥陷入連年既內戰
最後美國親自出兵將胡亞雷斯呢個墨西哥自由派既代表挾上台

胡亞雷斯上台後就驅逐晒墨西哥既羅馬神父 沒收羅馬教會財產
最後仲宣佈停止償還外國既欠債 佢三個最大債權國英國法國西班牙宣稱要出兵回收欠債
挑 你夠膽咪黎囉 我後面有美國佬撐腰
點知4月21日美國南北戰爭爆發
10月31日英法西三國簽訂1861年倫敦條約共同出兵墨西哥
12月8日三國聯軍登陸墨西哥 西班牙軍帶兵個個係胡安·普里姆


貝尼托·胡亞雷斯

MET60.00S9 2019-6-14 21:25:32 聯軍登陸墨西哥後係巴黎既拿破崙三世就發起佢既春秋大夢啦
反正都係打架啦 不如就索性以墨西哥為基地征服全個南美洲建立南美公教帝國啦 到時可以牽制北美兩個新教國家 又可以爭取到國內保守派支持 一於咁做啦
但英西知道法國準備長期駐兵之後
我剩係黎收數架咋 我邊有咁多錢係到養軍隊啊!?4月9日英西撤兵
唔緊要啊 我一個都夠抽 1863年6月7日法軍攻入墨西哥城

拿破崙三世吸收左佢啊叔既教訓 今次個位打返黎唔係比自己 唔係比自己既親戚 而係比佢係歐洲既盟友
嗯搵邊個好呢...奧地利!!岩岩我係義大利跣左你一鑊唔好意思啊 墨西哥皇帝個位就比你細佬前倫巴第-威尼托總督馬克西米連啦
咁馬克西米連就傻更更咁去做佢既墨西哥皇帝馬西米連諾一世啦
點知岩岩去到南北戰爭就打完 美軍來了墨西哥人帶路
法軍節節敗退最後奧匈皇帝個細佬馬西米連諾一世仲比墨西哥人拖左去打靶添
偷雞唔成蝕揸米 呢鋪拿破崙三世無論國際定國內都柒到甩碌
因為拿破崙三世既ON9而冇左個細佬既弗朗茨·約瑟夫一世更發誓永遠同拿破崙三世反面
為重建佢既威望佢要快D搵場仗打啦

馬西米連諾一世


處決馬西米連諾皇帝

話說當年維也納會議中盧森堡大公國併入荷蘭既奧良治家族中
但荷蘭同盧森堡中間又夾住佢既世仇比利時令奧良治家族對盧森堡既管治感到意興闌珊
咁荷蘭國王威廉三世就諗住搵人賣左盧森堡去啦 聞到陣除既拿破崙三世就彈出黎啦
呢單生意做得成既我國內既支持一定大大提升姐!! 咁佢就走左去搵威廉三世傾啦
不過盧森堡係前德意志邦聯成員國所以普魯士係佢國內有駐兵 但德意志邦聯解體後佢又冇加入北德意志邦聯而普魯士亦冇撤兵
而且佢雖然係前神聖羅馬帝國同德意志邦聯成員 但佢國內大多數卻係法國人
咁呢單買賣一出街就出事啦

法國佬要侵略我地德國人既土地啊!!
乜撚野你地既土地啊!?個到都係法國人黎架!!
咁你咪帶你D人走留返達地比我地囉!!
OK俾斯麥你係比亞里茨應承過會支持我合併萊茵河東岸個喎 你唔比盧森堡我既我就要黑森同巴伐利亞!!
嗯?我有應承過你D咩?如果係有既你一定會攞到D証據出黎啊 咁你有冇?相反...為保護我地德國民族既領土我地普魯士願一馬當先絕不退讓!!
仆街俾斯麥你跣我!?你想打啊話!?正好我想搵人開刀!!
不過係佢兩個準備開拖前威廉三世已經搵黎英國主持公道

全部唔好打!!普魯士撤兵 法國放棄盧森堡 以後盧森堡為永久中立國 仲有冇人有意見!?
1867年5月英法普奧俄義簽訂倫敦條約保證盧森堡永久中立
為此普法兩國就留低左牙齒印 德國人都認定法國佬密謀入侵德國重建萊茵邦聯
而仲未加入北德意志邦聯既南德各國佢地同都普魯直建立起軍事同盟


拿破崙三世向俾斯麥要求中立既代價

MET60.00S9 2019-6-14 21:25:59
日爾曼尼亞請求俾斯麥從獅子拿破崙三世手上保護德國羔羊

另一方面當胡安·普里姆返到佢祖國時 佢女王既啊媽當年留底既改革已經比伊莎貝拉二世塊西破壞到盪然無存
全國上下都比佢D狗公搞到烏煙瘴氣 胡安·普里姆聯合起西班牙既自由派密謀發起政變
最後1868年9月西班牙光榮革命胡安·普里姆帶兵攻入馬德里 伊莎貝拉二世流亡法國 胡安·普里姆當選國會主席
咁問題黎啦 你地趕走左國王邊個黎做國家個啊頭?
......
既然冇人肯做既就要搵過第個國王啦
咁就最好搵個信奉大公教既大國王室啦
你講奧地利啊?佢地點會再攬多個民族上身
咁...有!!霍亨索倫!!
你ON9啊佢地新教個喎
當然而家普魯士王室既霍亨索倫法蘭克尼亞支系係新教徒
但佢地既士瓦本-錫格馬林根支系仲信緊大公教個喎 咁就請普魯士前首相錫格馬林根伯爵卡爾·安東個仔利奧波德黎做國王啦!!

其實佢又唔係唯一既候選人 但對法國黎講呢個絕對係個威脅
如果成事既話霍亨索倫就會取代哈布斯堡成為新一代神聖羅馬帝國 返到西班牙王位繼承戰爭前對法國前後夾擊
呢種可能絕對要盡早消滅 就咁法國駐柏林大使就走去搵俾斯麥傾啦

就咁!?哈哈哈放心啦我地普魯士同霍亨索倫係愛好和平同負責任既新興大國 我地對其他國家冇野心 隨非佢地搵唔到其他人我地先免為其難考慮下啦
點知佢地真係搵唔到
1870年2月26西班牙樞密院顧問正式去普魯士要請利奧波德出任西班牙國王
咁就係個大問題啦
西班牙向普魯士發出要請之後法國下議院一片宣戰既叫聲 對拿破崙三世黎講又一次爭取支持既機會
深知拿破崙三世呢隻餓狗係到周圍搵緊獵物 威廉一世都唔敢再作挑釁 對外宣佈普魯士唔會繼承西班牙王位
本來件事可以就咁結束 但係6月25日拿破崙三世說服流亡係巴黎既伊莎貝拉二世退位比佢個仔阿方索
但西班牙政府拒絕承認阿方索個王位 佢地更急切要求各候選人盡快回應西班牙王位要求
7月12日威廉一世親自去搵利奧波德說服左佢拒絕王位
到呢到威廉一世總算從拿破崙三世甩身可以鬆返一口氣

咁佢就走左去萊茵蘭既溫泉聖地埃姆斯渡假放鬆下
7月13日朝早9點威廉一世從佢既行宮出門諗住散下步 點知一出門口法國駐柏林大使又搵上門
陛下早晨啊 我拎住巴黎新黎既指示 佢地希望你承諾以後唔會再對西班牙王位有所要求
仲傾呢D野?呢件事已經告一段落啦 有咩返柏林再講啦
講完兩人就分開左 威廉一世既隨從循例將呢段對話電報返柏林

係柏林收到呢份電報既係一直對呢件事保持沈默既俾斯麥 佢終於等到佢既機會啦
...人黎...我要呢段對話聽日見報...

法國大使係埃姆斯"巧遇"威廉一世

MET60.00S9 2019-6-14 21:26:27 第二日報紙頭版 法國大使下令威廉一世放棄西班牙王位 威廉一世驅逐法國大使:以後唔理洗黎搵我!!
威廉一世拿住張報紙嚇到手震
俾...俾...俾斯麥...段對話唔係咁個喎!?你做乜改成咁啊...咁係代表住宣戰啊...!!
冇錯啊陛下 就係宣戰啊

同一日同一段新聞都係法國瘋傳 普魯士國王羞辱法國大使威脅開戰
我地溫文有禮既外交官比粗暴既德國軍佬羞辱啊!!
我地親愛既白鬍蘇國王比法國既乸形外交官威嚇啊!!
兩國上下萬眾一聲 打啊!!打啊!!
咁咪打囉 俾斯麥帶住奸笑睇住德法兩國全速衝入佢既圈套
7月15日法國對普魯士宣戰 7月19日北德意志邦聯 巴伐利亞 符騰堡 巴登對法國宣戰


https://youtube.com/watch?v=-xjzEw7mPeo

普魯士雖被譽為陸上最強既國家 但佢對手法國都唔弱
當時法國係常備軍制 有40萬專業士兵跟隨拿破崙既野心轉戰天下南北
無論墨西哥定克里米亞 第二次鴉片戰爭定太平天國都有留底過佢地既腳毛
相反普魯士只係個徵兵制國家 佢地有120萬個容克農奴等待隨時比佢地既主人拖去餵子彈
但係軍制上普魯士既軍隊由參謀總部統一指揮 而法軍師級以上編制只有開戰時先會臨時組織
當法軍既軍團師長比拿破崙三世匆匆趕去前線時佢地根本就搵唔到自己既部隊

8月2日開戰大半月法軍先開始零零碎碎既進攻
最初普軍既戰略係利用自己兵力同鐵路網既優勢固守萊茵河 等擊退左法軍主力後再乘機還擊
佢地預計法軍可能發起進攻既地方有兩個
一個係法國東部最突出既一角史特拉斯堡 另一個就係佢西北面既梅斯
史特拉斯堡同梅斯中間隔左座山叫孚日山脈 而法國通住萊茵邊境既鐵路只有一條 總站係梅斯
姐係話法軍有可能係梅斯一落車就直衝入德國 又或者落車後先行去史特拉斯堡集合再進攻
但8月2日普軍係邊境擊退左法軍零碎既進攻後佢地意識到一樣野
法軍根本未組織好!!要攻就趁而家啦!!

普法戰爭七月尾

8月4日百萬普軍拔營渡河 果然法軍無力抵擋節節敗退
係史特拉斯堡 諗住學佢啊叔係前線點兵過下威風既拿破崙三世揼低佢支從未出現過既萊茵軍團向西逃跑
目標係法國東部最後一座大城 最後一個火車站 最堅固既要塞 梅斯

普法戰爭八月頭

當拿破崙三世黎到梅斯聚集返佢既殘兵諗住返巴黎重新組織過攻勢 但巴黎已經派左人黎搵佢
陛下...而家巴黎局勢非常不穩...你一返到去可能就發生兵變架啦...首相建議你幾大都進攻...
進攻!?一開始我咪進攻左囉!?而家我得返廿萬人你仲想我點!?出面有一百萬人衝緊埋黎啊!!
陛下你係拿破崙再世黎架嘛...你總有辦法既...如果呢到唔係你既奧斯特里茨咁就係你既萊比錫啦...

MET60.00S9 2019-6-14 21:27:53
梅斯圍城戰

8月19日普軍以十三萬人開始包圍廿萬人既梅斯 而主力軍繼續北上巴黎
為解救法軍既主力拿破崙三世逃出梅斯組織起兩支新既軍團共十二萬人南下解圍
點知係8月30日遇上普軍正在北上既廿萬主力拿破崙三世只好退入鄰近既小鎮
個到叫色當

9月1日普軍用克虜伯工廠精心打造既巨炮以絕對優勢既射程單方面咁轟炸色當市內既法軍
色當中既法軍頂住普軍猛烈既炮火多次試圖突圍不果 拿破崙三世向對面既普軍送信
我願意親自將我既配劍獻比你地既陛下...
9月2日拿破崙三世出城投降 9萬法軍被俘

色當會戰

拿破崙三世向俾斯麥交出配劍

色當會戰後俾斯麥會見拿破崙三世

色當會戰後勃蘭登堡門 標語寫住:色當 由神引領既新時代

得到拿破崙三世出降既消息巴黎既軍人推翻法蘭西第二帝國建立國防政府繼續抵抗普軍
但即使拿破崙三世投降都唔足以令普軍結束戰爭
9月19日普軍包圍巴黎 普軍將指揮部搬入凡爾賽宮 9月27日史特拉斯堡投降 10月27日梅斯投降
11月16日義大利國王維托里奧·埃馬努埃萊二世個仔當選西班牙國王為阿瑪迪奧一世
不過已經冇人在乎啦


https://youtube.com/watch?v=dxzTg2Ge9SA

1月19日被包圍係巴黎內既國防政府彈盡糧絕出城投降 法國正式戰敗
同日下晝 凡爾賽宮鏡廳 齊集德意志各邦國君主 普魯士上下大小軍官 俾斯麥同威廉一世
係眾人既環視下俾斯麥緩緩步向大廳盡頭既威廉一世
陛下...臣代表德意志各國懇切請求陛下成為德意志各國既保護人加冕為德意志帝國皇帝...
朕接受...
HEIL KAISER!!HEIL KAISER!!

威廉一世係凡爾賽宮鏡廳稱帝 中間白衫係俾斯麥

5月10日德意志帝國 法蘭西第三共和國簽訂法蘭克福條約
法國割讓阿爾薩斯-洛林予德國
法國係四十九年內賠償德國五十億法郎
承認普魯士國王威廉一世為德意志帝國皇帝
法國償還所有賠款前必須接受德軍佔領


https://youtube.com/watch?v=NZqRMZIxwd4

大家而家聽緊既呢首歌叫普魯士光榮作於色當會戰後
1871年2月23日德軍就係奏住呢首歌係凱旋門下操過

德軍對法國東北部既佔領一直維持到1874年 俾斯麥下令要比法國佬感受下戰爭既殘酷佢地先會識得珍惜和平
係呢三年間德軍每日殺人放火姦淫擄掠無惡不作 法國上下全民節衣縮食終於嘔出五十億法郎請走德軍
但呢段屈辱將永遠刻印係法國人民心中
原來普魯士既光榮就係對法國既污辱!!呢個仇我地總有一日會報!!

下集巴黎公社

1896年有隻黎自亞洲既黃種馬騮黎到德國旅行 D人稱呼佢為東方既俾斯麥 咁俾斯麥聽到就緊係有興趣去見下佢啦
同佢吹過幾輪水之後俾斯麥心諗...或者你可以當自己係東方既俾斯麥既...但我絕對唔會想比人叫做西方既李鴻章囉...

如果瘀之後 2019-6-14 21:31:15 push

MET60.00S9 2019-6-14 21:32:39 仆街我又back up少左一集 好想睇返呢集 原作者仲有無留底

:^(

:^(

:^(

:^(

膠登仔都睇得明既簡易西史入門第廿三.五集-睇一個國家點樣滅亡-三分波蘭

MET60.00S9 2019-6-14 21:34:19 唔知呢集講咩既其他巴打可以睇住wiki先

:^(

:^(

講大洪水時代
https://zh.wikipedia.org/wiki/%E5%A4%A7%E6%B4%AA%E6%B0%B4%E6%97%B6%E4%BB%A3
大洪水時代（波蘭語：Potop；立陶宛語：Tvanas）是波蘭立陶宛聯邦17世紀中期的一個歷史時代，其中包括一系列戰役。廣義上講這個時代以1648年的赫梅利尼茨基起義為始，以1667年的安德魯索沃休戰為終，這樣俄波戰爭與第二次北方戰爭中的波蘭階段便也處在這一時期[5]。狹義上講，大洪水時代指的是瑞典帝國對聯邦的入侵與占領時的這一階段，這樣便只包括第二次北方戰爭中的聯邦階段（1655年-1660年），這也被稱為「瑞典大洪水時代」（立陶宛語：Švedų tvanas，波蘭語：Potop Szwedzki）[6]。

波蘭立陶宛聯邦在戰爭中喪失了其大約三分之一的人口與大國地位[7]。

MET60.00S9 2019-6-14 21:37:29 [寫係佔中前]膠登仔都睇得明既簡易西史入門第四十集:這是最後的鬥爭-巴黎公社

今集BGM


https://youtube.com/watch?v=kB9wELkGn9c


1809年1月15日法國貝桑松一個釀酒工生左個仔
佢叫皮埃爾-約瑟夫 一個非常普通既大眾名 係法國一街都係 而呢家人姓普魯東

普魯東大個左之後入城讀扑扑齋 19歲畢業後就走左去做印刷廠
因為係印刷廠既工作令佢經常接觸到教會既刊物 係到佢學識左拉丁文 希伯來文同好多神學智識
之後佢就開始自費出版一D文法 神學既書比人睇中左攞左筆獎學金入巴黎讀書
入到巴黎之後普魯東開始接觸到工人運動同社會主義思想 1840年佢就出左本書叫什麼是私有權?
咩係私有權?私有權就係強盜!!

皮埃爾-約瑟夫·普魯東

係最初人類係自然狀態之下人類係平等既 但佢地為解決個人無法解決既問題佢地選舉出君主
君主得到社群既管治權去分配呢個社群既職位 而呢種分配做成職位世襲同階級分化
為解決呢個問題社群又收返君主既管治權改為由選舉產生

雖然管治權改為由選舉產生但人既職位依然由管治權所分配 但社群依然被人所支配
跟住歷史既發展經驗變成習慣 習慣娛成風俗 風俗變成法律
最後發展愈深厚既文化 人對人既權威就愈低落 所有人都活係一個唔存在既陰影之下互相壓迫
所以無論管治權係世襲制定民主制都係不合法既 因為管治權存在本身就代表住壓迫
咁呢種壓迫係點黎既呢?
就係私有權

最初係自然狀態中財產係公有既 只有係你使用財產個刻財產先屬於你既
但每個人既私心都希望得到更多 所以每個都去阻止其他人享用財產並搶係其他人之前享用更多既財產
而呢種鬥爭既方式最終演變成奴隸制
當奴隸群起反抗 管治權就為社群建立起私有權保障每個人都可以擁有私人財產不被侵犯
但私有權既結果卻係做成貧富分化 有錢既奴隸去剝削冇錢既奴隸
咁呢種剝削又係點黎架?
一句講晒 錢作怪

係自然狀態人與人交易既係產品同服務 但進入左私有制之後出現左貨幣
係以前你想要一件野你只要攞你手頭上有既野去同人交換就得 而雙方都得到件可以用既野
但有左貨幣之後你想要一件野 你首先要諗辦法去換錢再去買野
但同一件野係唔同時間空間又會有唔同既價錢 咁有產生左一班不事生產只靠賺取差額為生既商人
呢班人唔係為滿足自己生理需要而賺錢 佢地純粹為賺更多既錢而賺錢
而有錢冇貨既佢地靠控制市場價格黎操控有貨冇錢既勞動階級
最後所有壓迫 剝削 私有權都只係黎自一個錢字

公有制社會違反人既獨立性 私有制社會破壞人既平等
最後普魯東提出理想既社會應該係冇人可以擁有任何野 冇人可以管理任何人
所有人憑理性同良知去同其他人建立平等契約既自由社會 一切壓迫同剝削將永遠消失

同樣既說話係四十年前巴貝夫已經講過一次 結果巴貝夫比拿破崙拖左去打靶
係奧爾良朝下普魯東只係比人沒收左獎學金 但佢既理論已經令佢成為無政府主義既領袖人物
1844年佢仲係巴黎識左兩條友 一個叫馬克思 另一個係個俄國佬叫米哈伊爾·亞歷山德羅維奇·巴枯寧

米哈伊爾·亞歷山德羅維奇·巴枯寧

巴枯寧本來係個俄國貴族個仔 當過兵 退役後就走左去讀哲學
結果一讀就讀上腦變左個憤青周圍搞革命 黎到巴黎佢就深受普魯東既影響變左個無政府主義者
冇耐俄羅斯皇帝就落左通緝令廢除佢貴族身份並流放到西伯利亞
不過巴枯寧家陣係法國你吹得佢漲?

點知1848年歐洲革命 巴枯寧去左波希米亞參加泛斯拉夫會議
當俄軍出兵鎮壓奧地利革命時佢就被捉左 跟手就比人掟埋去西伯利亞鏟雪啦

1848革命失敗後馬克思走難去倫敦 普魯東因為出書批評拿破崙三世就比人困左三年
出獄後普魯東繼續宣揚無政府主義 1858年佢又被判多三年
不過今次佢唔同你癲直接走難去布魯塞爾

1861年巴枯寧潛逃去日本經美國再返返黎歐洲
1860年代法蘭西第二帝國進入自由帝國時代 拿破崙三世開放政治自由特赦政治犯
一大班因為反對過佢而流亡外國既人 例如阿道夫·梯也爾同埋普魯東都返返去法國
梯也爾返到法國後好快又重建起共和派既勢力向拿破崙三世要求更多既自由
而普魯東返到去冇耐1863年1月19日就心臟病死左
三日後波蘭人就用另類型式幫佢送賓


1月22日波蘭全國各地同時武裝起義驅逐俄羅斯軍隊
不過波蘭既起義軍分兩個組織領導 一個主要由教士地主智識份子組成以民族主義號召既白黨
另一個係由農民工人窮人組成以共產主義號召既紅黨
最初以紅黨既勢力最大 但當俄軍返黎鎮壓時死傷最慘重既都係紅黨
等紅黨死到七七八八時白黨就跪住向俄羅斯投降
我條命好寶貴架 我剩係諗住愛與和平和理非非佔領波蘭架咋 送死既野留比班窮撚做啦
最後1864年4月11日一月起義鎮壓完畢 二萬幾人被流放西伯利亞
歐洲各國工會都發起運動要求自己國家介入但都不得要領
咁馬克思9月28日係倫敦成立第一屆國際工人聯會 號召全歐洲工會聯合起黎共同對抗
呢個就叫第一國際

再見歐洲 參與一月起義被流放西伯利亞既波蘭人

但呢班黎自歐洲各地既工會代表齊集一齊咩都未做又有野拗啦
因為英國係當時歐洲最民主既國家 好多野都可以係議會入面傾掂
佢地就提議全歐洲既工會一齊收集簽名上書請願 用愛與和平既眼神打動自己既國王
屌!!你知唔知咩係國王啊!?用愛與和平既眼神就可以打動佢地既路易十六就唔洗死啦!!

當時英法兩國係歐洲工業化最深既國家 所以第一國際主要係英法兩國既工會代表
我地法國人五十年間就搞左三次革命 我地最叻就係同政府講道理 有咩就立齊架生拆一兩座政府部門先再算啦!!
哇痴線架!?咁把你自己攞支槍上山打遊擊啦 馬克思!!你係第一國際總書記你黎評道理
嗯...呢個係英國既資產階級政治家滲透無產階級革命既陰謀!!打倒英國資產階級議會主義!!
屌成班山賊黎既!!我唔撚玩啦你地自己玩飽佢啦!!
哈哈哈總書記英明!!扯啦資產階級既走狗!!係呢總書記 唔知你有冇睇過普魯東D書呢?我地法國佬好撚中意架
咩話!?普魯東!?佢反對勞動階級直接參與階級鬥爭 佢支持保留小量既私有財產 佢既革命主張唔夠徹底!!佢係小資產階級社會主義!!打倒小資產階級普魯東社會主義!!
下英國個套你又話唔得 普魯東個套你又話唔得 咁總書記我地應該要點做呢?
呃...呃...無...無產階級專政!!為徹底消滅資本主義剝削制度無產階級應該要建立只屬於無產階級既政黨去消滅一切屬於資本主義既制度!!
聽到馬克思咁講有人係會場既角落細細聲講左句

...咁係無產階級專政啊 定係對無產階級既專政啊?
佢係還繞世界一圈從西伯利亞返黎既流放犯巴枯寧
即使係最熱心既革命家只要比佢得到全部既權力佢就會變成比沙皇更殘酷既暴君...在坐大家都係法國人相信大家都仲記得個個人掛...似乎大家既總書記好渴望做同樣既角色咁喎...
比巴枯寧咁駁一駁馬克思立時語窒...打...打倒...階級...階級...主義...主義...鬥爭...鬥爭...
...巴...巴枯寧係空想社會主義者!!我個D係科學社會主義!!只有我既共產主義係唯物既 係真正既共產主義!!共產主義係我發明既!!我就係共產主義!!
嘿 難怪全世界都咁憎猶太人啦...而家羅富齊擁有半個世界 而馬克思就似乎要攞埋剩底個一半...而且以我所知馬克思背後都係羅富齊資助既...睇黎第一國際只係猶太人征服世界陰謀既一部分!!
!?...巴...巴枯寧係種族主義者!!佢煽動種族仇恨分化無產階級既團結!!佢係潛伏係無產階級內既反革命份子!!
就係場內嘈得不可交加時會場外突然傳黎一聲槍炮聲
一聲黎自色當既槍炮聲

拿破崙三世係色當投降既第二日1870年9月3日 拿破崙三世老婆帶住全家走難英國
驚慌憤怒既巴黎市民包圍到杜樂麗宮 共和派既領袖梯也爾希望籌建新政府
當然作為最大黨派領袖佢地有權力亦有責任咁做 但而家一街都係德國佬你建立個新政府出黎邊個保護你?
咁梯也爾就走去搵奧爾良派既巴黎總督路易·朱爾·特羅許
哼...一班民粹主義者走黎求我啊...好啊不過你地要應承我保證教會同私有財產唔受侵犯...唔係我即時反你台!!
9月4日共和派之一既萊昂·甘必大係巴黎市政廳宣佈法蘭西第三共和國成立
由特羅許建立國防政府 甘必大出任內政大臣 另一個共和派既人朱爾·法夫爾做外交大臣
而梯也爾就負責巡迴歐洲尋求國際援助

MET60.00S9 2019-6-14 21:38:21
老年阿道夫·梯也爾


路易·朱爾·特羅許


萊昂·甘必大


甘必大係巴黎市政廳宣佈法蘭西第三共和國成立
國防政府後特羅許本應重整軍隊抵抗普魯士入侵 但到9月19日普魯士軍就已經打到入巴黎
普軍圍攻巴黎都唔緊要 特羅許仲可以調動外地既軍隊向巴黎解圍
但到9月27日巴黎電報被切斷 史特拉斯堡投降 成個法國東門大開 百萬普軍如入無人之境
而特羅許手上指揮到既軍隊就只係得返五萬人 國防政府上下一片慘狀
佢地而家為一既考慮就係點樣說服普魯士接受佢地既投降

但除左國防政府手上個五萬正規軍之外 巴黎一百萬人口入面仲有三十萬由身心健全既成年男性所組成既國民衛隊
因為佢地係後備民兵既關係所以佢地仲未武裝起黎
就咁巴黎既市民源源不絕湧向巴黎市政廳門外黎向佢地要求武器
國難當前匹夫有責!!三十萬巴黎人一人一支槍一陣間就可以打走晒班德國佬!!快D派武器啊!!
睇見人民咁撚熱情特羅許就反而更加驚
ON9一人一支槍!?法國大革命係點開始架!?比你地攞到槍就唔只係殺德國佬架啦
當然派槍係唔可取 但我地得返五萬人又聯絡唔到出面你諗住點突圍呢?不如咁呢 我坐熱氣球去外而搵援兵 呢段時間你地點都要守住唔好投降啊!!
就咁10月7日甘必大承載住全巴黎市民既希望坐上熱氣球飛出巴黎
...只要比佢去到打到電報既地方就好快有援兵黎解圍...一定係咁!!

包圍巴黎既普軍

MET60.00S9 2019-6-14 21:39:30 巴黎民兵

甘必大離開巴黎
10月27日巴黎市民終於收到城外既消息 梅斯十五萬守軍向普魯士投降
十五萬!?整整十五萬!?咁大支軍隊都降左我地仲邊到有人黎解圍啊!?
梅斯失守既消息傳入巴黎全市陷入恐慌 10月31日又有萬幾人包圍到巴黎市政廳
不過佢地今次唔只係要求武器
你根本打唔贏場仗仲霸住晒D武器!!國防政府即刻落台!!還返槍同選票比我地!!
呢萬幾個暴民係工人領袖路易·奧古斯特·布朗基帶領下強攻巴黎市政廳
不過法軍及時趕到驅散左示威民眾


路易·奧古斯特·布朗基

包圍巴黎市政廳既市民
包圍巴黎市政廳既市民

11月5日巴黎20個區區長選舉 大量激進派當選
其中包括第十八區蒙馬特區區長 由一個29歲既醫生佐治·克列蒙梭當選

巴黎20區 第一區 (皇宮區) 第二區 (證券所區) 第三區 (教堂區) 第四區 (市政廳區) 第五區 (先賢祠區)第六區 (盧森堡區) 第七區 (波旁宮區) 第八區 (愛麗舍區) 第九區 (歌劇院區) 第十區 (倉庫區)
十一區 (博班古區) 十二區 (勒伊區) 十三區 (戈布蘭區) 十四區 (天文台區) 十五區 (沃吉拉區)
十六區 (帕西區) 十七區 (巴蒂尼奧勒-蒙梭區) 十八區 (蒙馬特區) 十九區 (紹蒙區) 二十區 (梅尼爾蒙東區)

青年克列蒙梭

12月嚴冬降臨 冬天既巴黎每日只有零下十幾度
被普軍包圍左三個幾月食物 醫藥 木柴 外界既資訊 基本上除左空氣同陰謀論之外巴黎咩都短缺
...聽講班德國佬買通左國防政府準備裡應外合殺晒我地啊...
係啊係啊 似啦似啦 所以點解佢地死都唔肯派槍比我地啦...

咻~~

突然頭上傳黎劃破空氣既聲音 然後聲音既目的地就被炸成一堆瓦礫
1871年新年後普軍開始無差別炮擊巴黎 每日有四五百發炮彈跌到巴黎市民頭上
巴黎市民既忍耐終於到達極限
1月22日幾百個武裝市民帶齊架生再次包圍巴黎市政廳
咩撚野國防政府啊!?你地既控制範圍根本離唔開巴黎!!要求立即成立全民普選既公社並由佢地黎控制巴黎既軍隊!!
國防政府又召黎軍隊驅散 雙方爆發槍戰死左六個示威 八十三人被捕 即日國防政府宣佈禁止出版自由
...其實我地真係打唔落去架啦...不如...出城投降啦?...
咁邊個夠膽出去做呢個角色?...
1月25日特羅許辭職 外交大臣法夫爾接手國防政府

MET60.00S9 2019-6-14 21:40:13 包圍巴黎既普軍炮兵

逃出左巴黎既甘必大去到遠離前線法國西南部既圖爾
因為巴黎對外界既聯絡已經完全被切斷所以佢地係圖爾再另立一個臨時政府反攻巴黎
另一方面巡迴歐洲尋找盟友既梯也爾亦都返到法國去到圖爾同甘必大佢地會合
點啊梯也爾有冇人肯介入啊!?
...只可以講拿破崙三世既外交政策太樣衰...而家全世界都想睇法國仆街...
拿破崙都落左台啦!!點可以要我地代佢受罪架!!
...不過我路經普魯士時見左俾斯麥 佢向我開左投降既條件...
佢肯受降!?咁已經係好大突破黎喎!!咁係咩條件啊!?
...佢要...阿爾薩斯-洛林同五十億法郎...
冇可能!!呢種條件點都冇可能!!你不如索性吞晒我地成個國家!?
咁唔係你諗住場仗要點打落去啊!?佢而家真係可以打到成個法國返去架!!
唔打都要打!!我就同戰至一兵一卒睇佢係咪真係咁大胃口!!

1月28日巴黎西城門打開 國防政府主席法夫爾坐住馬車駛向凡爾賽宮
呢坐代表住波旁家族過往輝煌同暴政既紀念物 而家淪為一班日爾曼軍佬既指揮部
成立左九日既德意志帝國佢地既總理俾斯麥係到接見左法夫爾
俾斯麥向法夫爾遞上左一張紙 上面寫滿左一堆法國地名同數字
法夫爾已經冇辦法理解呢堆地名同數字既意義 佢只知道係呢張紙上面簽個名百萬巴黎市民都會因此得救
個晚法夫爾離開凡爾賽宮 係五十年前一班巴黎師奶走過既路上返返巴黎
呢晚再聽唔到德軍既炮火聲 就只係得返個大男人既號哭聲

咩話!?國防政府降左!?佢地憑咩簽和約啊!?唔係...呢個消息一定係德軍偽做既!!就算巴黎政府降左我地圖爾政府永不投降!!
1月30日收到國防政府投降既消息甘必大帶住佢地最後既法軍強攻奧爾良 法國最後一支軍隊都死埋係到
2月5日甘必大解散圖爾政府將軍隊指揮權交返比巴黎國防政府 普法戰爭結束國防政府解散

因為巴黎已經比戰爭摧毀 臨時政府就將首都去波爾多係到籌備全國大選建立正式既新政府
2月8日選舉結束 城市既議席大多數都由左派當選 巴黎既42席中有37席由左派當選其中包括維克多·雨果 加里波底 克列蒙梭同布朗基
但佔更多議席既農村就多由保王黨當選
個選舉結果引起左巴黎既不安 法國已經冧過三個王朝啦...佢地都仲想復辟君主制啊!!
2月17日新成立既議會推舉梯也爾為臨時政府行政首腦 2月26日德法簽署臨時和約

新政府成立後首要工作就係重建行政秩序 特別係佢地既正式首都被圍城半年既巴黎
巴黎音信斷絕半年後重新開城 公務員重新派駐到巴黎
映入佢地眼簾既係一片頹垣敗瓦 遍地既餓俘...同埋街上四百碌大炮
呢堆大炮邊到黎架...?
哦 佢地係法夫爾投降後我地巴黎廿個區夾錢同軍隊買返黎自衛用既
咁而家仗都打完 德國佬走晒法國軍隊又返返黎啦...唔知可唔可以賣返比我地呢...?
咩啊!?你想點啊!?呢d我地既資產黎架嘛!!我地話賣就賣唔賣就唔賣 幾時到你過問!?

政府想搶我地既大炮 巴黎各區既國民衛隊要組織起黎保護自己!!
3月15日國民衛隊中央委員會成立 佢地推舉朱塞佩·加里波底做委員長
但係義大利既加里波底拒絕左 佢地就改為推舉布朗基做委員長

呢件事好快就寫成報告送到去波爾多梯也爾張台上
班左膠孭左四百碌炮上身!?我地冇可能係咁既條件下遷都返巴黎個喎...更何況而家法國東北部一街都係德國佬 容乜易比佢地挑起新既戰爭架!?即刻叫軍隊沒收個四百碌炮!!
但我地D軍隊岩岩打敗仗士氣低落政治上亦唔可靠 叫佢地做呢D野隨時可能引發兵變個喎
你地自己諗辦法!!如果收唔返個四百碌炮既話...我就只好遷都到凡爾賽再召集軍隊反攻巴黎架啦...
事態咁嚴重3月17日巴黎警方就趁布朗基去市郊探朋友時靜靜雞搭左佢走

18日朝早兩個旅既士兵爬上巴黎最高點 蒙馬特區既蒙馬特山 四百碌炮中就有一百七十碌係個到
法軍個計畫本來係先派步兵控制大炮再搵馬黎拖佢地走 但蒙馬特區區長克列蒙梭收到消息就即刻帶住國民衛隊趕到
係佢地雙方爭執間引黎愈黎愈市民圍觀塞滿蒙馬特山周圍大小馬路令馱馬難以接近
見形勢愈黎愈危急 個法國將軍就下令士兵開火驅散群眾
咩話!?叫我射擊自己既同胞!?你仲係法國人黎既!?我唔撈啦!!
班法軍聽到反而調轉槍頭拖個將軍落馬 就係呢隻賣國賊!!打德國佬又唔見你咁兇狠!?殺自己同胞就最賣力!!
成班憤怒既市民同國民衛隊圍上去一輪刺刀槍托 最後亂槍射殺

從蒙馬特山既衝突開始 巴黎各區既市民同國民衛隊紛紛走上街頭
賣國政府要搶我地既大炮將我地攞去餵德國佬啊!!
一日之內巴黎市民就控制晒住市各地共四百碌大炮再將法軍全部趕出巴黎


婦女兒童幫手將大炮推上蒙馬特山

巴黎既路障

出事啦!!出事啦!!梯也爾!!巴黎真係出事啦!!
唉...下令全國正規軍向巴黎集結 巴黎入面所有政府部門撤出巴黎!!封鎖晒巴黎既資訊!!千其唔好比外面既人知道巴黎發生咩事!!我地要去凡爾賽啦...

第朝國民衛隊攻向空無一人既巴黎市政廳 入面既人早就溜夜逃走晒
賣國政府已經撤左出巴黎!!而家巴黎係我地無產階級架啦!!
咩你地啊!?你地只係控制左巴黎咋 就算法國岩岩打輸仗出面仲有成四十萬正規軍啊!!我地應該要派人去同凡爾賽政府談判!!
乜撚野凡爾賽政府!?係無產階級革命面前乜撚野都係紙老虎!!克列蒙梭係混入革命內部既反革命份子!!我地要驅逐克列蒙梭出國民衛隊中央委員會同廢除佢蒙馬特區區長資格!!
18日晚國民衛隊中央委員會宣佈巴黎公社成立 以大紅旗為國旗 公社版馬賽曲為國歌 恢復共和歷 並會係3月26日舉行公社選舉
唉...兩邊都陷入瘋狂既循環...所有人都無撚得救啦...

3月26日公社選舉 候選人都係各種形式既左派份子
係有錢人多既巴黎中心區投票率只有兩三成 但係外圍既工人地區投票率則高達七成
選舉後巴黎公社鼓勵國民衛隊主動進攻城外既法軍
因為無產階級革命係真理 係道路 係生命 所有人都會主動投靠無產階級革命就好似當日係蒙馬特山咁 所以大家放心開槍啦!!


巴黎公社選舉

MET60.00S9 2019-6-14 21:40:48 4月2日巴黎公社宣佈天主教會係君主制既共犯沒收教會既資產 禁止宗教教育
同日幾千個國民衛隊西出巴黎行向凡爾賽 點知一出門就遭到法國炮兵轟炸
冇騎兵冇炮兵 就佢地幾千個武裝平民就只好避返入城內 但有五個走唔甩被俘
SIR!!我地笠左五個降兵要點處置啊?
降兵...?唔係!!佢地係逃兵!!佢地全部違反軍事法!!全部拖去打靶啊!!

凡爾賽反革命政府射殺我地既降兵啊!!反革命資產階級亡我之心不死!!我地宣佈通過人質法所有協助凡爾賽政府既人都會被逮捕成為巴黎既人質 只要凡爾賽政府處死我地巴黎公社既人我地就會殺返三倍既人質!!
4月6日凡爾賽政府回應人質法宣佈成立廿四小時既軍事法庭 所有參與巴黎公社既人都會送去個到打靶

4月12日巴黎公社為呼籲全球無產階級加入革命下令拉倒紀念拿破崙既旺多姆圓柱
哈哈哈!!打倒波拿巴大國沙文主義!!全球無產階級團結起來!!
響應巴黎公社既呼籲就有隻波蘭佬膽粗粗搵上門啦
我叫雅羅斯拉夫·東布羅夫斯基...本來係個俄國將軍...我唔係巴黎既居民...我係當年一月起義失敗後流亡黎巴黎既...唔知有冇咩我幫得上忙呢...?
哇緊係無任歡迎啦 你係我地最高級既職業軍人啊 即刻封你做國民衛隊總司令 咁將軍你有咩高見呢...?
嗯...首先軍紀太差 因為國民衛隊都係民兵 因為佢地個個都住係屋企落落去既命令根本冇人執行 以後我要佢地住係軍營等命令 第二係巴黎南面同凡爾賽之間有坐伊西堡我地要搶係法軍之前駐入個到


拉倒旺多姆圓柱後社員合照

雅羅斯拉夫·東布羅夫斯基

MET60.00S9 2019-6-14 21:41:52 4月13日國民衛隊駐入伊西堡
表面上佔據巴黎同凡爾賽之間既伊西堡可以緩和凡爾賽對巴黎既直接威脅
但單獨一坐從巴黎突出黎既堡壘反而容易被敵人包圍
法軍發現到國民衛隊駐入伊西堡後用大炮包圍日夜轟炸
法軍向伊西堡入面既國民衛隊開出條件 只要係地自願撤退我可以保證你地既人身安全返到巴黎
4月30日伊西堡降下巴黎公社既大紅旗升起共和國既三色旗 國民衛隊退入巴黎
本來用黎保衛巴黎既伊西堡而家反而成為法軍既前進基地

凡爾賽資產階級反革命份子打到入黎啦!!
而家巴黎市民只要企高一D都可以睇到城外法軍係伊西堡附近既調動 巴黎全市都陷於瘋狂
巴黎公社仿照當年法國大革命成立公共安全委員會 將所有未積極參與巴黎公社既人捉晒去做人質
佢地又將梯也爾係巴黎既屋企抄家充公 將入面搶出黎既野分晒比窮人
5月20日法軍進駐布洛涅-比揚古
21日法軍穿過防守既空檔進入帕西區

入到黎啦!!而家帕西區一街都係法軍啊!!大家返去自己既路障緊守崗位!!
點解佢地咁易入到黎既!?條波蘭佬唔係好勁架咩!?
肯定係佢背叛左我地!!唔好再信上面發落黎既命令!!大家自己顧自己!!
22日巴黎街頭貼滿公社既傳單
呢到係法國既光榮 一切革命既起源 亦係正義同團結既居所 呢到注定會係世界既模範 向敵人進攻!!去展示革命既力量!!即使有人出賣巴黎我地都唔會放棄!!冇人可以征服巴黎!!巴黎公社會清算你地!!
攞起武器!!為巴黎搭起路障 再次為戰爭而吶喊 為尊嚴吶喊 為反抗吶喊 為勝利吶喊 路障中既巴黎係不可戰勝既!!


協和廣場既路障

巴黎市政廳前里沃利街既路障

里沃利街既路障

梯也爾衝鋒

MET60.00S9 2019-6-14 21:42:34 的確 多次既革命已經証明左路障中既巴黎真係不可戰勝既
但係拿破崙三世在位時對巴黎重新規劃 以凱旋門為中心建起星形廣場以輻射線鋪出多條寬闊既大道貫穿整個巴黎市
其中最出名既係東西橫貫巴黎既香榭麗舍大道 係呢D大路上必須以大量人手防守 但卻容易被正規軍既騎兵同炮兵衝破
法軍從帕西區進入巴黎後沿香榭麗舍大道直入星形廣場所在既歌劇院區
因為各條大道被法軍所佔 國民衛隊被切斷分散係橫街小巷入面各自為戰再被逐個擊破

23日巴黎西部已大至被鎮壓 法軍從星形廣場北上蒙馬特區
係革命起點蒙馬特山 個到既國民衛隊已奮戰一日一夜 到晏畫終於失守
法軍從四面八方圍向蒙馬特山 山上既民兵走既走死既死
最後有四百幾個男女老幼被俘 佢地全部被拖入馬德萊娜教堂就地打靶

國民衛隊總司令雅羅斯拉夫·東布羅夫斯基戰死街頭 臨死前大嗌仲有冇人話我係叛徒!!
節節敗退下絕望既國民衛隊只可以作象徵式既反抗
佢地周圍向政府既建築放火 其中杜樂麗宮更被付之一炬

女人路障

雅羅斯拉夫·東布羅夫斯基奮戰

被燒毀既杜樂麗宮

24日巴黎公社既核心成員都易服剃鬚準備逃出巴黎並下令向巴黎市政廳放火
法軍既轟炸 公社既縱火 呢個時候巴黎全市已被火災既濃煙蒙罩
殺紅眼既法軍已經唔會分辨軍民 佢地將見到既所有人一律射殺
大量平民逃出巴黎 然後再不明不白既死係某條後巷
而仍留係巴黎既國民衛隊已經放棄抵抗改為屠殺被囚既人質

被燒毀既巴黎市政廳


25日巴黎只係得返東部既11區博班古 12區勒伊 13區戈布蘭 19區紹蒙 20區梅尼爾蒙東仍有零星抵抗
26日全部退守梅尼爾蒙東區
27日最後一批國民衛隊被包圍係拉雪茲神父公墓
法軍以大炮掃射 新既屍體 舊既屍體 全部血肉橫飛
法國外籍軍團挺住刺刀穿插係碑石間 踩住翻起既屍體向前製造更多既屍體
6點夜幕降臨 再見唔到路障上既大紅旗 再見唔到花都巴黎既繁華
拉雪茲神父公墓暗角既牆後 再聽唔到德軍既炮聲 再聽唔到法軍既槍聲 只聽到年青人哭饒聲
一陣槍聲 巴黎回歸寂靜

MET60.00S9 2019-6-14 21:44:08

公社社員既屍體

被突破後既里沃利街路障

拉雪茲神父公墓

牆

巴黎既居民 法軍黎解放你地啦 巴黎自由啦!!我地既士兵岩岩佔領左最後一處暴動據點 今天戰鬥已經結束 秩序同安全將會重建

戰鬥過後 殘存既四萬個巴黎市民二百人一組被徒步押向凡爾賽受審
其中萬三人被判有罪 九十五人死刑 二百五十人勞改 五千人驅逐出境 五千人入獄其中千三人無期徒刑
七日既流血周做成六萬人死亡 普法戰爭前百幾萬人口既巴黎被屠之一空

公社社員既屍體

巴黎市民為公社社員收屍

法軍押解囚犯向凡爾賽

法軍處決公社社員
巴黎公社被鎮壓後法國軍隊繼續係街上巡邏搜捕巴黎公社關係者
係巴黎某處某小屋既閣樓 有個巴黎公社殘存者係到繼續佢最後既鬥爭
佢叫尤金·鮑狄埃 生於拿破崙一世倒台第二年1816年10月4日一個貧民家庭 成長於經濟最蓬勃貧富最沿殊既奧爾良朝
佢自企得起身一日開始就一直係工廠中工作 直到佢幾廿歲人冇話致富就連飯都冇一餐食得安飽
而且唔只佢一個 佢身邊仲愈黎愈多人走上佢既舊路 後來佢接觸到共產主義成為活躍既工人領袖
係巴黎公社流血周中佢脊骨中彈半身不遂 被佢既同伴帶黎呢到避難
鮑狄埃軟癱係陰濕既閣樓中勉力抬起佢最後一隻手 寫低一句句歌詞

這是最後的鬥爭 團結起來到明天 Internationale(國際工人聯會) 就一定要實現

MET60.00S9 2019-6-14 21:45:10
尤金·鮑狄埃

太完美啦!!呢場簡直係共產主義革命實踐最有力証明!!經過呢場運動大家都知道要點樣推翻資產階級專政啦!?
錯啦馬克思!!根據你既理論無產階級專政既共產革命係由一個無產階級政黨去領導革命 而巴黎公社只係一堆小社群既聯合所以佢係無政府主義革命!!
唔係!!佢係共產主義!! 唔係!!佢係無政府主義!!
我動議將巴枯寧一干空想社會種族主義反革命分子開除出第一國際!!而家表決!!
馬克思係極權主義反革命分子!!唔洗你趕我扯!!唔妥佢既就跟我走!!

為團結全球無產階級而成立既第一國際依然嘈得不可交加
1972年9月2日馬克思將巴枯寧開除出第一國際
佢地開口埋口無產階級 有邊個在乎過無產階級
1876年費城會議後馬克思宣布第一國際解散
係巴黎 梯也爾踩下佢腳下既鮮血又繼續上路

因為係新當選既議會中由保王派佔多數 法國無可避免要重返君主制
但問題係法國有三個王室要由邊個做國王?
係色當會戰後拿破崙三世個老婆已經帶住佢地個仔拿破崙四世·尤金·路易·波拿巴去左英國
如無意外佢都冇興趣返黎食回頭草 更何況呢到既保王派都唔係波拿巴派
係到主要既保王派係波旁派其次係奧爾良派
咁如無意外波旁派就會捧返係三月革命被趕走查理十世既後人尚博伯爵亨利
但諗到波旁暴政復辟佔少數既共和派就同奧爾良派聯合推舉係二月革命被趕走路易·腓力一世既後人巴黎伯爵路易·腓力·艾伯特
咁到呢鋪真係如無意外既話奧爾良家族既路易·腓力·艾伯特就可以復辟奧爾良朝做法國國王
但意外依然發生 尚博伯爵亨利就同巴黎伯爵路易達成協議由尚博伯爵亨利做一任國王死後再比返奧爾良家族去世襲
最後終於確認由波旁家族尚博伯爵亨利加冕為法國國王亨利五世


拿破崙四世·尤金·路易·波拿巴

尚博伯爵亨利

巴黎伯爵路易·腓力·艾伯特
但最後都係發生左意外 當亨利五世進入巴黎時佢就停低左
咩事呢陛下? 亨利五世指住滿街既法國國旗 呢D咩黎?
咪法國國旗囉 好奇咩?
唔係!!法國國旗唔係紅白藍三色旗!!而係白底鳶尾花旗!!
一塊布姐...唔洗咁啊話...?
就係因為只係一塊布!!如果我連一塊布都改唔到既我仲做咩國王啊!?你地唔改既我就扯!!
哦 咁你扯囉

波旁白底鳶尾花旗

因為波旁家族同奧爾良家族協議係要等亨利五世死後先到奧爾良家族繼承王位
而家亨利五世ON99咁揼低個王位走左 係佢死之前再冇人合法繼承法國王位
咁梯也爾就成立法蘭西第三共和國作為過渡政府
最後1883年8月4日亨利五世過身 如無意外巴黎伯爵路易·腓力·艾伯特終於可以繼承法國王位
但佢就話而家大家行民主行得好高興啊仲何必講君主呢?國王既野唔洗預我啦
路易·腓力·艾伯特主動放棄法國王位 臨時過渡既第三共和國反而變成正式既共和國 亦係法國一百年革命以黎第一個長命既共和政權
因為你十年前發一個脾氣就成就左我地今日既共和國 尚博伯爵亨利原來係法國既華盛頓啊
個日克列蒙梭係報紙上咁樣寫

下集最終回:大戰之路

1873年7月24日法國議會提出係巴黎公社爆發地既蒙馬特山上興建一座聖心教堂以示愧疚
巴黎議員 曾經係巴黎公社領袖之一既克列蒙梭即刻彈起身拍台
呢D唔係道歉!!呢D係污辱!!你以為你做過呢D野有得平反架咩!?

MET60.00S9 2019-6-14 21:45:34
巴黎聖心堂

立鴨 2019-6-14 22:12:21 呢排唔得閒排版
暫時閣置住先

:^(

MET60.00S9 2019-6-14 23:14:14 下集最後一集 敬請期待

MET60.00S9 2019-6-15 00:11:10 總共miss左兩集
一集西班牙收復失地運動
一集波蘭大洪水時代

法比加拿斯尼 2019-6-15 00:15:30 明白嘅，大家呢排都辛苦

:^(

法比加拿斯尼 2019-6-15 00:15:40

:^(

:^(

:^(

:^(